1. Eaa ta tatou i papu, e eaa te tumu?

 ME AKARA tatou i te turanga o teianei ao, e ngata i te akara i te reira ma te manako papu? Te kino ua atura te oraanga ngutuare. Te kino ua atura te tu karapii e te makitakita o te tangata. E manganui kare e irinaki ana i te aronga mana. Inara e akapapu anga teia kia tatou. Eaa te tumu? No te mea te rave ra te tangata i tei totouia i roto i tetai totou umere no “taua tuatau openga.” (2 Timo. 3:1-5) Noatu eaa te tu te tupu nei teia totou, no te mea te akapapu maira e kua tutara a Iesu Karaiti ei Ariki no te Patireia o te Atua. Inara te vai atura tetai au totou no te Patireia. Ka akamaroiroiia te akarongo me akara tatou i tetai au totou tei akatupuia i teia au mataiti nei.

2. Eaa ta tatou ka uriuri i teia atikara, e eaa te tumu? (E pau mai no te tutu i te kapi mua.)

² I teia atikara, ka uriuri tatou (1) te totou kia kite tatou e kua akanooia te Patireia, (2) te au totou kia kite tatou e te vai ua ra a Iesu ma te kitea koreia ei Ariki no te Patireia o te Atua, e te (3) te au totou tei akaari mai akapeea te au enemi o te Patireia o te Atua me takoreia. Ka kite tatou e ka kapiti teia au totou mei te jigsaw puzzle rai tei akataka meitaki i tetai tutu e teiea tatou i roto i ta Iehova akakoroanga.

3. Eaa te akapapu anga ta te totou ia Daniela 7:13, 14 e akakite maira no te Ariki o te Patireia o te Atua?

³ Te akapapu maira te totou ia Daniela 7:13, 14 e ko Iesu Karaiti te Tutara tau no te Patireia o te Atua. Ka rekareka te iti tangata i te au pa enua i te ‘tavini iaia,’ e kare atu e Tutara. Kua akakite tetai akaou totou i te puka a Daniela e ka rauka to Iesu Patireia i te openga o te itu ua atu tuatau. Ka kitea ainei aea teia e tupu ei?

4. Akamārama mai akapeea a Daniela 4:10-17 te taki anga ia tatou ki te mataiti me tutara a Karaiti ei Ariki no te Patireia. (Akara katoa i te tuatua rikiriki i raro.)

⁴ E tatau ia Daniela 4:10-17. Te “itu ua atu tuatau” e 2,520 mataiti te reira. Kua akamata te reira i te 607 M.T.N. te akaatea anga to Babulonia i te ariki openga mei te terono o Iehova i Ierusalema. Kua ope te reira i te 1914 T.N. te akaterono anga a Iehova ia Iesu​—“te pu tikai”—​ei Ariki no te Patireia o te Atua. *​—Eze. 21:25-27.

5. Eaa tetai ravenga e puapinga ai tatou mei te totou no te “itu ua atu tuatau”?

⁵ Akapeea tatou e puapinga ai mei teia totou? Na te kite anga i te “itu ua atu tuatau” te akapapu maira kia tatou, e ka akatupu a Iehova i tana au taputou i te tuatau tau. Mei tana akanoo anga meitaki i tona Patireia, ka akapapu katoa aia e ka akatupuia tetai au totou kia tau ki tona akakoroanga. Ae, “kare e tavarevare” to Iehova rā!​—Haba. 2:3.

6. (a) Eaa tei tupu e kua tutara a Karaiti i te rangi? (e) Akapeea teia te akapapuia anga e te totou ia Apokalupo 6:2-8?

⁶ I te openga o tana angaanga tutu aere i te enua nei, kua totou a Iesu i tetai au tupuanga i teianei ao kia kite tana au pipi e kua tutara aia i te rangi. Tetai au mea, ko te tamaki, te onge, e te ngaruerue enua. Totou katoa aia i te maki mate, me kore maki kino, “i tera ngai, i tera ngai”​—mei te maki kino COVID-19. Te kapiki ra te Pipiria i teia ko “te akairo” e kua tae mai a Karaiti. (Mata. 24:3, 7; Luka 21:7, 10, 11) Tere atu i te 60 mataiti i muri ake i tona mate e kua oki ki te rangi, kua akapapu a Iesu ki te aposetolo ko Ioane e ka tupu teia au mea. (E tatau ia Apokalupo 6:2-8.) Kua tupu teia au mea e kua tutara a Iesu ei ariki no te Patireia i te 1914.

7. Eaa i tupu ei te mate i te enua nei mei ta Iesu tutara anga?

⁷ Eaa teianei ao i kino roa atu ei te tutara anga a Iesu ei Ariki? Tei roto ia Apokalupo 6:2 tetai apinga puapinga​—ta Iesu angaanga mua ei Ariki akaterono ouia koia oki kia tamaki. Iaai? I te Tiaporo e tana au temoni. Ia Apokalupo pene 12, kua ruti a Satani i te tamaki, e kua tiriaia mai aia e tana au temoni ki te enua nei. Ma te makitakita, kua kave a Satani i tona riri ki runga i te tangata, “e mate ra oki to te enua.”​—Apo. 12:7-12.

8. Ia tatou e kite ra i te au totou no te Patireia e akatupuia ra, akapeea tatou e puapinga ai?

⁸ Akapeea tatou e puapinga ai mei teia au totou? Na roto i te au tauianga i teianei ao o te tu o te tangata e kite ei tatou  e kua tutara a Iesu ei Ariki. No reira kare tatou e taitaia me kite tatou i te au tangata karapii e te makitakita, no te mea te akatupu ra te reira i te totou Pipiria. Kua akanooia te Patireia! (Sala. 37:1) E ka kino ua atu te taitaia i teianei ao ia Aramagido e vaitata maira. (Mare. 13:8; 2 Timo. 3:13) Kare ainei koe e akameitaki i to tatou Metua aroa i te rangi no tei akamārama mai i teia au tuatau kino kia tatou?

9. Mei te totou ia Daniela 2:28, 31-35, akapeea te reira te akatutu anga i te mana tutara openga, e i naea i tutara ei?

⁹ E tatau ia Daniela 2:28, 31-35. Te kite ra tatou i teia totou e akatupuia ra i teia rā. Kua toʼu te moemoea a Nebukanesa ki te ka tupu i “te au rā openga,” i muri ake i te tutara anga a Karaiti. Te au enemi o Iesu i te enua nei, ka kapiti mai te mana tutara openga tei totouia e te Pipiria, tei akatutuia e te “nga vaevae auri e te karakaraea.” Kua tutara takere teia mana tutara. Kua tupu te reira i te tuatau o te Tamaki I o te Ao, te taokotai anga, a Peritane-Marike. E rua apinga tei totouia e te moemoea tiki a Nebukanesa no teia mana tutara tei tuke ki te au patireia i mua atu.

10. (a) Akapeea ta Daniela totou te akakite anga i te mana tutara Peritane-Marike? (e) Eaa ta tatou ka matakite? (Akara i te pia “ Kia Matakite i te Karakaraea!”)

¹⁰ Te mea mua, kare mei te au mana tutara i roto i te orama, kua akatutuia a Peritane-Marike e te kairo anga auri e te karakaraea, kare i te auro me kore ario. Te akatutu ra te karakaraea i “te uanga o te tangata nei.” (Dani. 2:43) Te kiteaia  ra to ratou, mana ikianga, mana akatere i te tangata, mana patoi, e te mana o te aronga angaanga, tei akaparuparu i teia mana tutara kia akatupu i tona akakoroanga.

11. Akapeea te Mana Tutara Peritane-Marike, i te akamaroiroi anga ia tatou e e tuatau openga teia?

¹¹ Te rua, mei tei akatutuia e te nga vaevae o te tiki maatamaata, ko Peritane-Marike te mana tutara openga tei totouia e te Pipiria. Kare aia e autuia e tetai atu mana tutara poritiki. Mari ra, ka aere viviki aia ki tona openga ia Aramagido me takore te Patireia o te Atua iaia e tetai ua atu kavamani a te tangata. *​—Apo. 16:13, 14, 16; 19:19, 20.

12. Eaa tetai akapapu anga i ta Daniela totou ei akapumaana ia tatou ma te manakonakoanga?

¹² Akapeea tatou e puapinga ai mei teia totou? Te oronga maira ta Daniela totou i te akapapu anga e te noo nei tatou i te tuatau openga. E 2,500 tuma mataiti i topa, kua totou a Daniela e i muri ake ia Babulonia, e a mana tutara ki rungao i te iti tangata o te Atua. Kua akakite katoa aia e ko te Mana Tutara Peritane-Marike, te mea openga. Te akapumaana maira teia e kare e roa ka takore takiri te Patireia o te Atua i tetai ua atu tutara anga tangata, e ka tutara te reira ki rungao i te enua.​—Dani. 2:44.

13. Eaa te akatutu ra i “te tokovaru” ariki e te ‘nga ariki tino ngauru,’ ia Apokalupo 17:9-12, e akapeea teia totou te akatupuia anga?

¹³ E tatau ia Apokalupo 17:9-12. Kua riro te takore anga a te Tamaki I o te Ao kia akatupuia tetai akaou totou Pipiria no te au rā openga. Kua inangaro te au arataki o teianei ao i te ‘au no te ao katoa. Inara ia Tianuare 1920, kua akanoo ratou i te League of Nations, tei tupauia e te United Nations i roto ia Okotopa 1945. Te kapikiia ra teia akaaereanga ko “te tokovaru” ariki. Inara kare aia i te mana tutara. No ko mai tona ririnui i te au mana tutara poritiki tei turu iaia. Kua akatutu te Pipiria i te reira e ko te ‘nga ariki tino ngauru.’

14-15. (a) Eaa ta Apokalupo 17:3-5 e akakite maira no “Babulonia Maata”? (e) Eaa te tupu ra ki te aronga tei turu i te akonoanga pikikaa?

¹⁴ E tatau ia Apokalupo 17:3-5. Te akauruia anga e te Atua, kua kite te aposetolo ko Ioane i te orama no tetai vaine akaturi, ko “Babulonia Maata,” tei akatutu i te akonoanga pikikaa o teianei ao. Eaa ta teia orama e akakite maira? Kua taokotai te au akaaereanga akonoanga pikikaa ki te au mana tutara poritiki e kua akameitaki ia ratou. Kare e roa atu ana, ka tuku a Iehova ki roto i te ngakau o te au mana tutara poritiki “kia rave ratou i tona anoano.” Eaa te ka tupu mai? Ka takore te au mana tutara poritiki, te ‘nga ariki tino ngauru,’ i te au akaaereanga akonoanga pikikaa.​—Apo. 17:1, 2, 16, 17.

¹⁵ Akapeea tatou e kite ei e te vaitata maira te openga o Babulonia Maata? Ei pau i teia uianga, kia akamaara tatou e kua paruruia te oire taito o Babulonia e te Kauvai Eupharata. Kua akaaite te puka o Apokalupo i te mirioni ua atu aronga tei turu ia Babulonia Maata ki “te au vai” paruru anga. (Apo. 17:15) Te akakite katoa maira e ka “marō takiri,” te au vai e ka ngere te akonoanga pikikaa o teianei ao i tona aronga turuturu. (Apo. 16:12) Ei akatupu i te reira totou,  e maata te tangata i teia tuatau tei akaruke i te akonoanga pikikaa e kua kimi i ta ratou au pauanga ki te ngai ke.

16. Akapeea tatou e puapinga ai kia mārama i te au totou me tu mai te United Nations e me takoreia a Babulonia Maata?

¹⁶ Akapeea tatou e puapinga ai mei teia au totou? Te tu anga mai o te United Nations e te turanga puapinga kore o te akonoanga pikikaa, te akapapu maira e te noo nei tatou i te au rā openga. Noatu e te marō atura te au vai o Babulonia, kare na te reira e takore i te au akaaereanga akonoanga pikikaa. Mei tei taikuia, ka tuku a Iehova i te manako ki roto i te ngakau o te ‘nga ariki tino ngauru’​—te au mana tutara poritiki tei turu i te United Nations—​“kia rave ratou i tona anoano.” Ka tupu viviki te openga o te akonoanga pikikaa, e ka poitirere teianei ao. * (Apo. 18:8-10) Ka vinivini teianei ao me takoreia a Babulonia Maata e ka tupu te manamanata, inara e rua tumu ka rekareka  te iti tangata o te Atua. Ka takore takiriia teia enemi maata o te Atua ko Iehova e tuatau ua atu, e ka vaitata mai to tatou ora mei teia akatereanga kino!​—Luka 21:28.

17-18. (a) Akapeea tatou me akamaroiroi i to tatou akarongo? (e) Eaa ta tatou ka uriuri i te atikara ka aru mai?

¹⁷ Kua totou a Daniela e ka tupu “maata” te “kite” mou. Ae kua tupu rai! Kua mārama tatou i te kite oonu o teia au totou no teia tuatau. (Dani. 12:4, 9, 10) Umere rava tatou te tikaanga o teia au totou na Iehova e tana Tuatua akauruia. (Isa. 46:10; 55:11) E akamaroiroi i to kotou akarongo na te apii anga i te au Tuatua Tapu e te tauturu i tetai ke kia piri vaitata kia Iehova. Ka paruru aia i te katoatoa tei irinaki pu tikai iaia, e ka akatupu aia i te “au nuingangare” kia ratou.​—Isa. 26:3.

¹⁸ I te atikara ka aru mai, ka akara tatou i te au totou no te putuputuanga Kerititiano i te tuatau openga. Mei ta tatou ka kite, te tano meitaki ra teia au totou ki roto i te au tutu taka meitaki o te au rā openga. Ka akara katoa tatou i te akapapu anga no Iesu​—to tatou Ariki—​e arataki nei i tana au pipi tiratiratu.