Kua tutu aere a Iesu i te karere ‘au. Inara i tetai atianga kua akakite aia ki tana au apotetoro: “Auraka e manako e, i aere mai ei au e apai mai i te au i te enua nei; kare au i aere mai e apai mai i te au, e tamaki ra. I aere mai nei au e akatupu i te tamaki i te metua tane raua ko te tamaiti, te metua vaine raua ko te tamaine, te metua ongoai vaine raua ko te unonga vaine.” (Mata. 10:34, 35) Eaa te aiteanga o ta Iesu tuatua?

Kare a Iesu i aere mai i te akatakake i te ngutuare tangata, inara kua kite aia e ka riro tana apiianga ei akatupu i te ke. No reira, ko te aronga te anoano ra kia riro ei pipi na Karaiti e kia papetitoia, kia kite ratou e eaa te ka tupu mei ta ratou ikianga. Me tupu te takinokino mei to ratou tokorua kare i roto i te tuatua mou, e mei tetai o te ngutuare, ka ngatā rai i te akono tiratiratu i ta Karaiti apiianga.

Kua akamaroiroi te Pipiria i te au Kerititiano “kia noo au ua kotou i roto i te tangata katoa nei.” (Roma 12:18) Ka riro katoa ta Iesu apiianga ei akatupu i “te tamaki” ki te ngutuare tangata. Ka tupu teia me āriki tetai o te ngutuare i te apiianga a Iesu e kua patoi tetai pae i te reira. E ka riro te kopu tangata​—to roto i te ngutuare—​ei “enemi” ki te tangata apii i te tuatua mou.​—Mata. 10:36.

Te au pipi a Iesu e noo ra i te au ngutuare tukeke te akonoanga, ka tupu te manamanata no to ratou inangaro ia Iehova e Iesu. Ei akaraanga, penei ka marō tetai o te kopu tangata ia ratou kia akono i te au orote akonoanga. Me tupu teia, koai ta ratou ka akamareka? Karanga a Iesu: “Ko tei maata tona inangaro i tona metua tane e tona metua vaine, e mea ngiti iaku, kare aia e tau iaku.” (Mata. 10:37) Kare a Iesu i tuatua ana kia akamareka iaia ka akaiti mai tana au pipi i to ratou inangaro i to ratou metua. Mari ra, te akakite ra aia i te mea puapinga tikai. Me patoi te kopu tangata i ta tatou akamorianga ia Iehova, ka aroa ua atu tatou ia ratou, inara ko Iehova ta tatou ka akaperepere maata.

Kare e ekoko e ka tupu te mamae me patoi pakari te ngutuare. Noatu rai, ka akamanako te au pipi a Iesu i tana tuatua: “E tei kore e rave i tona uaorai satauro, ka aru mai ei iaku, kare aia e tau iaku.” (Mata. 10:38) Tera te aiteanga, ka āriki ua te au Kerititiano i te patoianga a te ngutuare tangata ei takinokinoanga ki te au pipi a Karaiti. Ka tapapa ua ratou e na to ratou tu akono meitaki e akakeu i tetai o te ngutuare tangata kia aroa mai e kia apii i te karere Pipiria.​—1 Pete. 3:1, 2.