1. Eaa te au tuatua mou taau i kite te apii mua anga i te Pipiria?

 MAARA ainei ia koe toou apii mua anga i te Pipiria? Penei kua poitirere koe te kite anga e ingoa to te Atua. Penei kua mataora koe te kite anga kare te Atua e tamamae ana i te tangata ki roto i te aʼi vera. Kua rekareka koe e ka kite akaou koe i te aronga akaperepereia tei mate e ka noo kapiti kotou i roto i te parataito i te enua nei.

2. Te apiianga i te au tuatua mou Pipiria, eaa atu taau i rave? (Ephesia 5:1, 2)

² Te maata atu taau apii i te Tuatua a te Atua, te maata atu taau akaperepere ia Iehova. Na te reira tu akaperepere i akakeu ia koe kia taangaanga i taau e apii ra. Kua rave koe i te au ikianga meitaki tei akanooia ki runga i te au kaveinga Pipiria. Kua meitaki atu toou tu akono no te mea kua inangaro koe i te akamareka i te Atua. Mei tetai tamaiti tei aru i tona metua aroa, kua aru koe i toou Metua i te rangi.​—E tatau ia Ephesia 5:1, 2.

3. Eaa te au uianga penei ka ui tatou?

³ Penei ka ui tatou: ‘E maata atu ainei taku akaperepere ia Iehova i teianei ki te taime i riro mai ei au ei Kerititiano? Mei toku papetitoanga, te aite ra ainei toku manako e taku e rave ra ki ta Iehova​—ma te akaperepere i toku au taeake e te au tuaine?’ Me kua akaanuanu toou “inangaro mua,” auraka e taitaia. Kua tupu katoa teia ki te au Kerititiano o te anere mataiti mua. Kare a Iesu i akangaropoina ana ia ratou, e kare katoa aia e pera ia tatou. (Apo. 2:4, 7) Kua kite aia e ka rauka ia tatou te akaora akaou i to tatou inangaro mua te apiianga i te tuatua mou.

4. Eaa ta tatou ka uriuri i teia atikara?

⁴ Ka uriuri teia atikara akapeea tatou me akaperepere maata atu ia Iehova e te au taeake. E ka akara tatou i te  au akameitakianga ka rauka no tatou e te au taeake me akamatutu tatou i to tatou aroa.

5-6. Eaa te manamanata ta te apotetoro ko Paulo i kite i roto i tana tutu aere, e eaa tei akakeu iaia kia tavini ua atu ia Iehova?

⁵ Kua mataora te apotetoro ko Paulo i tetai oraanga meitaki te tavini ia Iehova, inara e maata tona manamanata. Kua teretere mamao a Paulo, e kare te reira i te mea mama i te reira tuatau. I tona au tere, kua rokoia a Paulo e te “mate i te vai, e te mate i te anana keia.” Kua takinga kinoia aia e te aronga tei patoi mai iaia. (2 Kori. 11:23-27) E kare te au taeake Kerititiano o Paulo i ariki ua ana i tana tauturu.​—2 Kori. 10:10; Phili. 4:15.

⁶ Eaa tei tauturu ia Paulo kia maroiroi ua te tavini ia Iehova? E maata ta Paulo i apii mei te au Tuatua Tapu no to Iehova tu e tona uaorai oraanga. Kua papu ia Paulo e te akaperepere maira a Iehova iaia. (Roma 8:38, 39; Ephe. 2:4, 5) E kua akaperepere maata aia ia Iehova. Kua akaari a Paulo i tona akaperepere ia Iehova na te “matuapuru [anga] i te aronga tapu, e te matuapuru ua” atu.​—Ebe. 6:10.

7. Eaa tetai mataara ka akamatutu tatou i to tatou aroa no Iehova?

⁷ Ka tupu to tatou akaperepere ia Iehova me tatau putuputu tatou i tana Tuatua. Ia koe e tatau ra i te Pipiria, akara eaa ta te reira e akakite maira no runga ia Iehova. E ui kia koe: ‘Akapeea teia irava te akaari anga mai e te akaperepere ra a Iehova iaku? Eaa ta te reira e akakite maira kia akaperepere au ia Iehova?’

8. Akapeea te pure me tauturu ia tatou kia akaperepere ua atu i te Atua?

⁸ Tetai mataara kia akaperepere ua atu tatou ia Iehova na te akatuera ua anga i to tatou ngakau kiaia na roto i te pure. (Sala. 25:4, 5) E ka pau mai a Iehova i ta tatou pure. (1 Ioa. 3:21, 22) Karanga a Khanh, e tuaine i Asia, e: “Kua akanooia toku aroa no Iehova ki runga i te kite, inara kua maata atu te reira aroa te pau anga mai aia i taku pure. E kua akakeu te reira iaku kia akamareka iaia.” b

9. Akapeea a Timoteo te akaari anga e te akaari ua ra aia i te aroa?

⁹ No tetai au mataiti i muri ake i tona taui anga, kua aravei a Paulo i tetai mapu tane ko Timoteo. Akaperepere a Timoteo ia Iehova, e kua akaperepere aia i te tangata. Akakite a Paulo ki te au Philipi: “Kare oki oku e tangata mei [ia Timoteo] nei te tu i te ngakau, i te akono tikai i ta kotou na.” (Phili. 2:20) Kare a Paulo i tuatua ana no runga i to Timoteo kite ei akaaere me kore ei vaa tuatua, inara kua umere aia i to Timoteo aroa no te au taeake e te au tuaine. Kare e ekoko anga kua tapapa atu te au putuputuanga i tona atoroanga ia ratou.​—1 Kori. 4:17.

10. Akapeea a Anna e tana tane te akaari anga i te aroa no te au taeake e te au tuaine?

¹⁰ Ka kimi katoa tatou i te au ravenga no te tauturu i te au taeake e te au tuaine Kerititiano. (Ebe. 13:16) Akamanako ana i te tua o Anna, tei taikuia i te atikara mua. I muri ake i tetai uriia, kua atoro raua ko tana tane i tetai pamiri Au Kite e kua kite mai kua pueu to ratou tauu are.  E kare o te pamiri kakau ma. Karanga a Anna: “Kua apai maua i to ratou kakau, kua puʼa e kua akaoki mai i te reira ma te auriia e te atuatuia. Kia maua, e mea iti ua te reira, inara kua akatupu tikai te reira i tetai pirianga oa vaitata kia ratou e tae mai ki teia ra.” Na te aroa o Anna e tana tane no te au taeake e te au tuaine i akakeu ia raua kia oronga ua i te tauturu.​—1 Ioa. 3:17, 18.

11. (a) Akapeea to tatou aroa te akakeu anga i te au taeake? (e) Ia Maseli 19:17, eaa ta Iehova ka rave me akaari tatou i te aroa?

¹¹ Me aroa takinga meitaki tatou i te au taeake, ka kite mai ratou i te reira me aru tatou i to Iehova manako e tana e rave ra. E ka ariki maata atu ratou i to tatou tu takinga meitaki. Kua maara ia Khanh, te aronga tei tauturu iaia. Karanga aia: “Rekareka tikai au i te au tuaine akaperepere tei apai iaku no te tutu aere. Kua tiki mai ratou iaku, kua apai iaku no te kaikai avatea, e kua akaoki mai iaku ki te kainga. Kua kite au i teianei e aka tauta anga te reira. E kua rave ratou i te reira ma te aroa.” E tika, kare te katoa anga e akameitaki mai ia tatou i ta tatou i rave. Karanga a Khanh no te aronga tei tauturu iaia: “Inangaro tikai au i te tutaki i to ratou tu takinga meitaki iaku, inara kare au i kite e noo ana ratou kiea. Inara, kua kite a Iehova, e te pure nei au kia tutaki aia ia ratou.” Tano rai ta Khanh. Te kite maira a Iehova i te au mea rikiriki ta tatou e rave ra ma te takinga meitaki i te au taeake. Te ariki ra aia i te reira ei atinga puapinga e ei kaiou nana no te tutaki.​—E tatau ia Maseli 19:17.

12. Akapeea te au taeake me akaari i to ratou aroa no te putuputuanga? (Akara katoa i te tutu.)

¹² Me e taeake koe, akapeea koe me akaari i te aroa no te au taeake ma te  tauturu atu ia ratou? Kua pati tetai taeake mapu ko Jordan ki tetai tangata pakari akapeea aia me tauturu maata atu i te putuputuanga. Kua akameitaki te tangata pakari iaia no tana e rave ra e kua akakite akapeea me rave maata atu. Ei akaraanga, kua pati aia ia Jordan kia tae vave mai ki te Are Uipaanga Patireia no te aravei i te au taeake, te paupau i te au uipaanga, te tutu aere putuputu ki tana pupu tutu aere, e oti e kimi i te au ravenga no te tauturu i te au taeake. Te rave anga a Jordan i te reira, kua apii aia i te au ravenga karape ou e kua tupu tona aroa no te au taeake e te au tuaine. Kua apii a Jordan e me riro mai tetai taeake ei tavini tauturu, kare aia e akamata i te tauturu i te au taeake; mari ra, ka tauturu ua atu aia ia ratou.​—1 Timo. 3:8-10, 13.

13. Akapeea te aroa o tetai taeake ko Christian te akariro akaou anga iaia ei tangata pakari?

¹³ Akapeea me kua tavini ana koe ei tavini tauturu me kore ei tangata pakari? Maara ia Iehova taau angaanga i rave i mua ana e toou aroa tei akakeu ia koe kia rave i te reira. (1 Kori. 15:58) Te kite katoa ra aia i toou aroa ua anga i te au taeake. Kua mii tikai tetai taeake ko Christian te akakoreia anga aia ei tangata pakari. Inara, karanga aia: “Kua rave au i te au mea ravarai taku i inangaro i te tavini ia Iehova no toku aroa iaia​—noatu me e tangata pakari au e me kare.” Kare i roa, kua tavini akaou aia ei tangata pakari. Karanga a Christian e: “Kua manga matakutaku rai au te tavini akaou. Inara kua manako mai au e kua akatika a Iehova, ma tona tangi aroa mai iaku, kia tavini akaou ei tangata pakari, e ka rave au i te reira no toku  akaperepere iaia e te au taeake e te au tuaine.”

14. Eaa taau i apii mai mei te tuatua a tetai tuaine no Georgia mai?

¹⁴ E aroa katoa ana to Iehova au tavini i to ratou tangata tupu. (Mata. 22:37-39) Ei akaraanga, karanga a Elena, e tuaine i te enua ko Georgia, e: “I te akamata anga, na toku akaperepere ia Iehova i akakeu anake iaku kia tutu aere. Inara i toku aroa no toku Metua i te rangi e maata maira, kua tupu maata katoa toku aroa no te tangata. Kua akamanako au i to ratou manamanata e eaa te tumu manako ka pakia to ratou ngakau. Te maata atu taku manako anga ia ratou, te maata atu taku inangaro i te tauturu ia ratou.”​—Roma 10:13-15.

15-16. Mei tei akaariia i roto i te au tutu, eaa te au akameitakianga me aroa ua tatou i te au taeake?

¹⁵ Me akaari tatou i te aroa ki te au taeake, kare ko ratou ua te ka puapingaia. Te akamata anga te maki COVID-19, kua tauturu tetai taeake ko Paolo e tana vaine i te au tuaine pakarikari akapeea me taangaanga i ta ratou apinga apaipai no te tutu aere. I te akamata anga kua ngata i tetai tuaine te taangaanga i tana apinga apaipai inara kua kite aia i muri mai. Kua taangaanga aia i te reira no te pati i tona au kopu tangata ki te Akamaaraanga. E ono ngauru ia ratou tei aere mai na runga i te vitio karangaranga! Kua puapingaia te tuaine e tona  kopu tangata mei te tauturu a Paolo e tana vaine. I muri mai, kua tata te tuaine kia Paolo: “Meitaki maata no te apii ia matou aronga pakarikari. Kare rava e ngaropoina iaku to Iehova aroa e taau tauturu maroiroi.”

¹⁶ Kua riro teia au tua ei apiianga puapinga kia Paolo. Kua maara iaia ko te aroa te mea puapinga rava atu kare te kite e kare te tu karape. Kua maara iaia: “I tavini ana au ei akaaere kotinga. I teia ra, te kite nei au e noatu kua ngaropoina i te au papuritia taku au akoanga, te maara nei rai ia ratou taku tauturu.”

17. Koai ma tetai ka puapingaia me akaari tatou i te aroa?

¹⁷ Me aroa tatou i te au taeake, ka puapinga katoaia tatou. Kua akapapu mai a Jonathan i teia, e noo ana aia ki Nu Tireni. I tetai Maanakai avatea vera, kua kite aia i tetai painia e tutu aere ra i te pae mataara. Kua manako a Jonathan i te piri atu ki te painia i te au Maanakai avatea. Kare aia i kite ana e ka puapingaia aia mei te reira tu takinga meitaki. “I te reira taime i toku oraanga,” i na Jonathan ei, “kare au e reka ana i te tutu aere. Inara iaku e akarongo ra ki te painia e apii ra e kua kite i te puapinga o tana tutu aere, kua akakeu te reira iaku kia akaperepere i teia angaanga. Kua riro katoa mai teia taeake ei oa piri mou noku tei tauturu iaku kia tupu i te pae vaerua, kia mataora i te tutu aere, e kia akavaitata kia Iehova.”

18. Eaa ta Iehova e inangaro maira ia tatou kia rave?

¹⁸ Te inangaro maira a Iehova ia tatou katoatoa kia akaperepere ua atu iaia e te au taeake. Mei ta tatou i apii mai, ka akamatutu tatou i to tatou aroa no Iehova na te tatauanga i tana Tuatua e te akamanako oonu anga i te reira e te tuatua putuputu kiaia na roto i te pure. Ka akaperepere ua atu tatou i te au taeake e te au tuaine me tauturu tatou ia ratou. Me aroa ua tatou, ka akavaitata atu tatou kia Iehova e to tatou pamiri pae vaerua. E ka mataora tatou i te au pirianga oa e tuatau ua atu!