1-2. Na teea tu ka akaaiteia tetai Kerititiano mei tetai are teitei rava atu? (1 Korinetia 15:58)

 I TE 1978, kua patuia tetai are teitei rava atu i Tokyo, Tiapani. Umere te tangata e akapeea teia are teitei e tu ei no te mea maata te ngaruerue enua e tupu ana i taua oire. Akapeea teia i tupu ei? Kua akanoonoo e kua akatanotano te aronga parani o taua are e kia tu te reira e kia kore e tipatipa i te tuatau ngaruerue enua. Mei taua are teitei te tu o te au Kerititiano. Na teea tu?

² E mea tau kia matutu e kia vai tiratiratu te Kerititiano. Ka anoanoia kia maroiroi e kia vai ngaueue kore aia me akono i ta Iehova au ture e tana au turanga. (E tatau ia 1 Korinetia 15:58.) Kua ‘papa ua aia i te akarongo’ e kia tiratiratu. Tetai tua, ka akaari aia i te “maru” me umuumuia mai. (Iako. 3:17) Ko te Kerititiano tei ariki i teia manako kare e maro e kare katoa e tukutuku ua atu. I teia atikara, ka uriuri tatou akapeea tatou me akaari i te tu ngaueue kore. Ka kite katoa tatou e rima au ravenga ka taangaanga a Satani i te akaparuparu i ta tatou ikianga e ka apii akapeea tatou me patoi atu i tana angaanga.

3. Eaa te au ture ta te Tuku Ture i akakite mai ia Angaanga 15:28, 29?

³ Ko Iehova te Tuku Ture, e kua akataka meitaki mai aia i tana au ture ki tona iti tangata. (Isa. 33:22) Ei akaraanga, e toru au mea ta te pupu akaaere o te anere mataiti mua i taiku mai kia vai tiratiratu ua te au Kerititiano: (1) e patoi i te akamori itoro, e akamori ia Iehova, (2) akangateitei i te tu tapu o te toto, e te (3) akono i te au kaveinga a te Pipiria. (E tatau ia Angaanga 15:28, 29.) Akapeea te au Kerititiano o teia tuatau me akarongo tiratiratu ki teia au manako e toru?

4. Akapeea tatou me akamori ia Iehova? (Apokalupo 4:11)

 ⁴ Kopae tatou i te akamori itoro, e akamori ia Iehova. Kua akaue aia i to Iseraela kia akamori iaia anake ua. (Deu. 5:6-10) Te timata anga te Tiaporo ia Iesu, kua akakite mai a Iesu e ko Iehova anake ua ta tatou ka akamori. (Mata. 4:8-10) No reira, kare tatou e akamori i te au itoro. Kare tatou e akamori i te au tangata​—kare katoa e akariro i te au arataki akonoanga, aronga poritiki, aronga rongonui tipoti, teata, me kore aronga imene—​mei tetai atua rai. Ka turu e ka akamori tatou ia Iehova ko tei “anga i te au mea ravarai.”​—E tatau ia Apokalupo 4:11.

5. Eaa tatou ka akarongo ei ki ta Iehova au ture no te tu tapu o te ora e te toto?

⁵ Ka akarongo tatou ki ta Iehova au ture no te tu tapu o te ora e te toto. No teaa ra? No te mea, karanga ra a Iehova e tei te toto te ora, e mea akaperepereia no ko mai iaia. (Levi. 17:14) To Iehova akatika anga kia kai te tangata i te kiko, kua akaue aia e auraka ratou e kai i te toto. (Gene. 9:4) Kua akakite akaou aia i teia akauenga te oronga anga i te Ture a Mose kia Iseraela. (Levi. 17:10) E kua akaue aia i te pupu akaaere o te anere mataiti mua kia akakite ki te au Kerititiano katoatoa e ‘auraka e kai i te toto.’ (Anga. 15:28, 29) Ka akono katoa tatou i teia akauenga me rave i tetai ikianga no te rapakau maki. b

6. Eaa ta tatou ka rave me akono i to Iehova au turanga ngateitei?

⁶ Ka akono meitaki tatou i to Iehova au turanga ngateitei. (Ebe. 13:4) Na roto i tetai akatutuanga, te ako maira te apotetoro ko Paulo e kia “tamate” tatou i to tatou au mero kopapa​—koia oki, kia akaatea takiri i te au anoano tarevake. Kare tatou e akara me kore e rave i te ainga tau kore. (Kolo. 3:5; Iobu 31:1) Me ka timataia mai tatou, e kopae viviki atu tatou i te reira manako kia kore to tatou pirianga vaitata ki te Atua e akakinoia.

7. Eaa ta tatou ka rave, e no teaa ra?

⁷ Inangaro a Iehova ia tatou kia “akarongo ma te ngakau katoa.” (Roma 6:17) Meitaki tikai tana aratakianga no tatou, e kare tana au ture e taui ana. (Isa. 48:17, 18; 1 Kori. 6:9, 10) Ka tauta tatou i te akarekareka ia Iehova e kia akaari i taua tu mei ta te tata salamo i akakite mai: “Te akaariu nei au i toku ngakau kia rave tamou i taau ra au akonoanga, e tae ua atu ki te openga.” (Sala. 119:112) Inara, ka tauta a Satani i te akaparuparu ia tatou. Eaa te au ravenga ka taangaanga aia?

8. Akapeea a Satani me taangaanga i te takinokinoanga ei akaparuparu ia tatou?

⁸ Takinokinoanga. Te taangaanga nei te Tiaporo i te takinga kino e te taomianga i te akaparuparu ia tatou. Inangaro aia i te ‘akapou’ ia tatou, kia takoreia to tatou pirianga vaitata kia Iehova. (1 Pete. 5:8) Kua tamatakutakuia te au Kerititiano o te anere mataiti mua, kua papaia e kua tamateia no to ratou tu tiratiratu. (Anga. 5:27, 28, 40; 7:54-60) Te rave nei a Satani i te takinokinoanga i teia tuatau. Te kite ra tatou i teia tu takinokinoanga ki to tatou au taeake e te au tuaine i Rutia e tetai atu au enua e te takinokino anga a te aronga patoitoi i te ao katoa.

9. Akamārama mai akapeea tatou e matakite ei i te au taomianga.

 ⁹ Au taomianga. Kapiti mai ki te takinokinoanga e taangaanga ana a Satani “i te ravenga pakari.” (Ephe. 6:11) Akamanako ana eaa tei tupu ki tetai taeake ko Bob, iaia i te are maki no tetai vai anga. Kua akakite aia ki te au taote e kare rava aia e ariki i te pamuanga toto. Kua ariki te taote i tana ikianga. Inara, i te po i mua ake ka vaiia ai aia, kua aere mai tetai taote ke ki ko ia Bob i te oki anga tona ngutuare ki te kainga. Kua karanga aia kia Bob e kare te au taote e pamu i te toto inara me ka inangaroia papa ua ratou i te pamu mai i te toto. Penei manako ra te taote e ka taui a Bob i tona manako me kare tona ngutuare i reira. Inara kua patoi pakari atu a Bob, te akakite anga e auraka te toto e pamuia ki roto iaia noatu eaa e ka tupu mai.

10. Eaa ra ka riro ei te au manako o te tangata ei mea kino? (1 Korinetia 3:19, 20)

¹⁰ Au manako tangata. Me aru tatou i te manako o te tangata, penei ka akamata katoa tatou i te kopae ia Iehova e tana au ture. (E tatau ia 1 Korinetia 3:19, 20.) “Te pakari oki o teianei ao” te akakeu maata ra i te anoano o te kopapa. Kua ariki tetai au Kerititiano i Peregamo e Tuatira i te manako tau kore o te au tangata o taua nga oire e kua akamori i te au itoro. Kua tuku atu a Iesu i te akoanga pakari ki te nga putuputuanga te akatika ua ra i te ainga tau kore. (Apo. 2:14, 20) Teia tuatau, te tupu nei te taomianga kia tatou kia aru i te au manako tarevake. Penei ka maro mai to tatou ngutuare e te au oa ia tatou kia aati i ta Iehova au ture. Ei akaraanga, penei ka karanga mai ratou e kare i te mea kino me aru ua i to tatou anoano e e mea taito te au apiianga a te Pipiria.

11. Ia tatou e vai tiratiratu ra, eaa ta tatou ka kopae?

¹¹ Tetai au taime, ka manako tatou e kare e taka roa ana ta Iehova au akakiteanga i orongaia mai kia tatou. Penei ka akakeuia tatou “kia rai to [tatou] manako i te tangata nei i tei tataia ra.” (1 Kori. 4:6) Kua apa te au arataki akonoanga o to Iesu tuatau i teia tu. Na te kapiti mai anga i te au ture a te tangata ki te Ture, kua akateiaa ratou i te apainga a te au tangata. (Mata. 23:4) Kua oronga mai a Iehova i te akakiteanga taka meitaki kia tatou na roto i tana Tuatua e tana akaaerenga. Kare e tau ia tatou kia kapiti atu i tetai mea ki tana ture. (Mase. 3:5-7) No reira, kare tatou e aka rai atu i tei tataia i roto i te Pipiria me kore e akanoo i te au ture no to tatou au taeake no runga i to tatou uaorai manako.

12. Akapeea a Satani te taangaanga anga i te “pikikaa puapinga kore”?

¹² Pikikaa. Taangaanga nei a Satani i te “pikikaa puapinga kore” e te “apiianga mua o teianei ao” i te akavare e te akatakake i te au tangata. (Kolo. 2:8) I te anere mataiti mua, kua kapitiia mai te au apiianga akatumuia ki runga i te au manako o te tangata, te au apiianga tau kore a te ngati Iuda, e te apiianga e kia akono te au Kerititiano i te Ture a Mose. E mea pikikaa teia no te mea te arataki ke nei te reira i te manako o te tangata mei te Tumu tikai o te pakari, ko Iehova. Teia tuatau, taangaanga nei a Satani i te media e te social network i te akakite aere i te au tua taitoito e te au nuti pikikaa a te aronga poritiki. Kua kite mai tatou i teia i te tuatau o te maki  COVID-19. c Ko te Au Kite o Iehova tei akarongo ki te aratakianga a to tatou akaaerenga kare ratou e taitaia, kare mei te aronga rai te akarongo ra ki te au akakiteanga pikikaa.​—Mata. 24:45.

13. Eaa tatou ka matakite ei kia kore e tamanamanataia?

¹³ Tamanamanata anga. Eiaa e ngaropoina ia tatou “te au mea e maata ua atu te meitaki.” (Phili. 1:9, 10) Ka kaimoumou te tamanamanata i to tatou taime e te manako mei te au angaanga puapinga. Te au mea o te oraanga​—mei te kaikai, inuanga, tamataora, e te angaanga—​ka riro ei tamanamanata ia tatou me tuku tatou i te reira ko te mea puapinga i roto i to tatou oraanga. (Luka 21:34, 35) Pera katoa, i te au ra ravarai te akarongo e te tatau nei tatou i te au nuti patoitoi a te au tangata e te taumāro anga poritiki. Kare tatou e tuku i teia au taumāro anga ei tamanamanata ia tatou. No te mea, ka akakeu te reira ia tatou kia turuturu i te manako o tetai e tetai. Te taangaanga nei a Satani i teia au ravenga ei akaparuparu i to tatou akakoroanga i te rave i te mea tika. Ka akara tatou akapeea me patoi atu i tana timata anga e kia vai tiratiratu.

14. Eaa te ka tauturu ia tatou kia vai tiratiratu kia Iehova?

¹⁴ Akamanako i toou akatapuanga e te papetitoanga. Kua rave koe i taua au takainga no te mea inangaro koe i te turuturu ia Iehova. E akamaara eaa te tauturu tei akapapu mai kia koe e kua kitea mai e koe te tuatua mou. Kua kite mai koe ia Iehova e kua akangateitei e kua akaperepere iaia ei Metua noou i te rangi. Kua rauka toou akarongo e kua akakeuia kia tataraara. Kua akakeuia toou ngakau kia akaruke i te au angaanga tarevake e kia akono i to te Atua anoano. Kua rauka mai ia koe te maru e te akakore anga te Atua i te ara. (Sala. 32:1, 2) Kua aere mai koe ki te au  uipaanga Kerititiano e kua akamata i te akakite aere i te au mea taau i apii mai. Ei Kerititiano akatapuia e tei papetitoia, te aaere nei koe na te arataa ora, te tauta anga kia aaere ua rai na reira.​—Mata. 7:13, 14.

15. Eaa ka puapinga ai te apiianga e te akamanako marie?

¹⁵ Apii i te Tuatua a te Atua e kia akamanako marie i te reira. Ka tu ketaketa tetai pu rakau me e oonu te tumu o tona au aka, ka tu ketaketa rai tatou me kua aka oonuia to tatou akarongo i roto i te Tuatua a te Atua. Me tupu mai te pu rakau, ka toro oonu te au aka ki raro roa i te one. Me apii e me akamanako marie tatou, ka akaketaketa tatou i to tatou akarongo e ma te irinaki papu e meitaki atu te arataa o te Atua. (Kolo. 2:6, 7) Akamanako akapeea ta Iehova apiianga, akoanga e te paruru i te tauturu anga i tona au tavini i te tuatau taito. Ei akaraanga, kua kite atu a Ezekiela na roto i te orama te vaito meitaki anga tetai angera i te iero. Kua akamaroiroi teia orama ia Ezekiela, e e apiianga tau teia no tatou akapeea tatou me turuturu i to Iehova au turanga no te akamorianga mou. d (Eze. 40:1-4; 43:10-12) Ka puapinga katoa tatou me tuku tatou i te taime kia apii e kia akamanako marie i te au mea oonu i roto i te Tuatua a te Atua.

16. Akapeea te ngakau tiratiratu te paruru anga ia Bob? (Salamo 112:7)

¹⁶ Kia maroiroi te ngakau. Kua akakite te Ariki ko Davida na roto i te imene i tona aroa ngaueue kore no Iehova: “Kua mou toku ngakau, e te Atua.” (Sala. 57:7) Ka rauka katoa ia tatou te ngakau maroiroi, i te irinaki anga ia Iehova. (E tatau ia Salamo 112:7.) Akamanako ana akapeea teia te tauturu anga ia Bob, tei taikuia i mua ana. Kua akakiteia kiaia e ka akapaeia mai tona toto me ua ake ka inangaroia, kua pau viviki atu aia e me ka raveia te reira, ka akaruke aia i te are maki. Muri mai, karanga a Bob, “Kare roa au i ekoko ana i taku ikianga e kare au i manamanata ana.”

17. Eaa ta tatou ka apii mai i tei tupu kia Bob? (Akara katoa i te tutu.)

 ¹⁷ Maroiroi tikai to Bob manako no te mea kua iki takere aia i te aru tiratiratu ki tana ikianga i mua ake ka aere ei ki te are maki. Te mea mua, inangaro aia kia mataora a Iehova. Te rua, kua apii meitaki aia i ta te Pipiria e ta tatou au puka e akakite ra no runga i te tu tapu o te ora e te toto. Te toru, papu tikai iaia e ka rauka te au akameitakianga na te aru anga i ta Iehova akauenga. Ka rauka katoa ia tatou te ngakau maroiroi noatu eaa te au timata anga te ka tupu mai kia tatou.

18. Akapeea to Baraka akaraanga te apii mai anga ia tatou kia irinaki kia Iehova? (Akara i te tutu i te kapi mua.)

¹⁸ Irinaki kia Iehova. Akamanako ana ia Baraka te autu anga no te mea kua irinaki aia ki ta Iehova aratakianga. Noatu kare a ratou apinga tamaki mei te paruru me kore te korare, kua akaue a Iehova ia Baraka kia aere e tamaki atu i te nuku vaeau o Kanaana i raro ake i te rangatira vaeau ko Sisera. (Aka. 5:8) Kua akakite te peroveta vaine ko Debora kia Baraka kia aere mei te maunga ki tetai ngai titika ua i te tamaki ia Sisera e tona 900 au kariota. Noatu te tere viviki o teia au kariota i runga i teia ngai titika ua, kua akarongo ua a Baraka. E aere maira te vaeau mei te Maunga ko Tabora, kua akatopa mai a Iehova i te ua maata. Kua piritia te au kariota o Sisera ki roto i te vari, e kua oronga a Iehova i te rē kia Baraka. (Aka. 4:1-7, 10, 13-16) Pera katoa rai, ka oronga mai a Iehova i te rē kia tatou me irinaki tatou ki runga iaia e tana aratakianga tei orongaia mai na roto i tana akaaerenga.​—Deu. 31:6.

19. Eaa tatou ka inangaro ei kia maroiroi ua rai?

¹⁹ Ka tauta tatou kia maroiroi ua rai i roto i teia tuatau openga. (1 Timo. 6:11, 12; 2 Pete. 3:17) Ka tauta ua rai tatou kia kore e akangaueueia e te takinokinoanga, te au taomianga, te au manako o te tangata, te au pikikaa, e te au tamanamanata anga. (Ephe. 4:14) No reira, ka vai tiratiratu tatou kia Iehova ma te ngaueue kore e te akarongo anga ki tana au akauenga. I taua taime rai, ka anoanoia kia akaari tatou i te manako maru. I te atikara ka aru mai, ka uriuri tatou akapeea a Iehova raua ko Iesu i riro ei ei akaraanga meitaki no te akaari anga i te manako maru.