Kua na roto a Nicolas e Céline i tetai akatanotano anga tuke. Kua āriki raua i te patianga mei ko mai i te opati Betela i Varani kia neke ki tetai putuputuanga ou. Karanga raua: “I te akamataanga, kua mataora tikai maua inara i muri mai kua mii maua i to maua au oa. No te mea kare maua i mātau ake i te au taeake i roto i te putuputuanga ou.” a Noatu e ngatā te reira, akapeea koe e puapinga ai me neke ki tetai putuputuanga ou? Eaa ta tetai ke ka rave no te tauturu? Akapeea koe me akamaroiroi i tetai ke e kia akamaroiroi katoaia mai koe i roto i taau putuputuanga ou?

AU KAVEINGA E Ā EI TAUTURU IA KOE KIA AKATANOTANO

1. Irinaki kia Iehova. (Sala. 37:5) Kua akaruke a Kazumi no Tiapani mai i tana putuputuanga i piri ana no tetai 20 mataiti, te rauka anga te ngai angaanga ou a tana tane. Akapeea aia i te ‘uri anga i tona aerenga kia Iehova’? Karanga aia: “Kua riringi au i toku ngakau kia Iehova i te akakite i toku apiapi, maromaroa e te tu taitaia. Tei tupu, kua akamaroiroiia au.”

Akapeea koe me irinaki maata atu ia Iehova? Mei tetai tumu rakau tei anoano i te vai kia tupu ruperupe, pera katoa to tatou akarongo ka anoanoia kia akaketaketaia te reira. Ko Nicolas tei taikuia i mua ana, kua akamanako aia i te au akaraanga o Aberahama, Iesu, e Paulo tei akaatinga ia ratou uaorai no te rave i te anoano o te Atua e kua papu iaia e ka tauturu mai a Iehova iaia. Me apii putuputu koe i te Pipiria, ka tauturu teia ia koe kia akakoromaki i te au  tauianga i roto i toou oraanga e kia taangaanga i taau e apii ra i roto i taau putuputuanga ou.

2. Kopae i te manako iriiri. (Kohe. 7:10) Te neke anga a Jules ki Marike mei Benin mai, kua anoanoia aia kia akatanotano ki te au peu tuke o tera enua. Karanga aia, “Me aravei au i tetai, ka akakite ua rai au i toku oraanga kia ratou.” No te tuke i teia ki tana i mātau, kua kopae aia i te au taeake e te au tuaine i roto i te putuputuanga. Inara, te kite meitaki anga aia i te au taeake e te au tuaine, kua taui tona manako. Karanga aia: “I teianei kua irinaki au e aiteite ua te au tangata noatu e noea mai ratou. E tuke ua ta ratou ka tuatua e ka rave. E mea puapinga kia āriki ua tatou i te tangata.” No reira, e kopae i te manako iriiri no taau putuputuanga ou. Mei ta tetai tuaine painia ko Anne-Lise i tuatua: “Kua neke au no toku inangaro i te kite e te apii i te au mea ou, kare kia akono i taku i akaruke.”

Eiaa katoa te aronga pakari e akaaite i ta ratou i mātau i roto i ta ratou putuputuanga o mua ana ki te putuputuanga ou. No te mea e tuke ta ratou au ravenga, kare te reira e tarevake. E mea meitaki kia apii i te au turanga o te ngai ou i mua ake ka akakite ei koe i toou manako. (Kohe. 3:​1, 7e) E apii i te au taeake na roto i toou akaraanga meitaki e eiaa e māro ia ratou kia aru i taau e rave ra.—2 Kori. 1:24.

3. E angaanga pakari i roto i te putuputuanga ou. (Phili. 1:27) Noatu e ngatā i te neke ki tetai ngai ou e ka pou te tuatau, e mea puapinga kia aere ki te au uipaanga i roto i taau putuputuanga ou. Ka anoanoia te au taeake e te au tuaine i roto i taau putuputuanga i te kite putuputu ia koe e rauka ai ia ratou i te piri mai kia koe e te tauturu ia koe. Karanga a Lucinda tei neke e tana nga tamaine ki tetai oire maata i Aperika Apatonga: “Kua akamaroiroi toku au oa iaku kia akavaitata atu ki te au taeake i roto i taku putuputuanga ou, kia angaanga kapiti i te tutu aere e te paupau i ko i te au uipaanga. Kua oronga katoa matou i to matou kainga no te au uipaanga tutu aere.”

“Ko te uapou anga” koia oki te rave maroiroi i te au angaanga pae vaerua ma te au taeake e te au tuaine i roto i taau putuputuanga ou, e ravenga meitaki te reira no te akatupu i “te akarongo i te evangelia nei.” Kua akamaroiroiia a Anne-Lise, tei taikuia i mua ana e te aronga pakari kia angaanga kapiti ki te katoatoa i te tutu aere. Eaa tei tupu? Karanga aia “e ravenga meitaki teia kia piri ki te putuputuanga ou.” Pera katoa, me tauturu koe i te tamā e te akono i te Are Uipaanga Patireia, te akaari ra koe ki te au taeake e te au tuaine e ko teia taau putuputuanga ou. Me rave koe i teia, ka ārikiia  koe e te au taeake e te au tuaine i roto i taau putuputuanga ou e ka riro ratou ei pamiri noou.

4. Akatupu i tetai pirianga oa ou. (2 Kori. 6:​11-13) Ko te ravenga meitaki no te akatupu i tetai pirianga oa, na te akaari anga i toou inangaro ki tetai ke. No reira, i mua ake i te au uipaanga e i muri mai, e aravei atu i te au taeake kia kite no runga ia ratou. E tamou i to ratou ingoa. Me mou ia koe to ratou ingoa e me akaari i te tu oaoa e te takinga meitaki, ka piri mai ratou kia koe e ka riro ei oa noou.

Eiaa e manata me kare koe e ārikiia mai, mari ra e tuku i tetai tuatau kia kite te au taeake e te au tuaine no runga ia koe. Mei ta Lucinda i tuatua, “No te mea kua pati matou i tetai ke ki to tatou matou kainga, kua rauka te au pirianga oa i teianei.”

“KIA ĀRIKI KOTOU IA KOTOU UAORAI”

Me tomo tetai pae ki roto i te Are Uipaanga Patireia no te taime mua, tetai taime ka rū ratou. No reira, akapeea koe me tauturu i te au taeake ou? Kua akamaroiroi te apotetoro ko Paulo “kia āriki kotou ia kotou uaorai, mei te Mesia i āriki mai ia tatou nei.” (Roma 15:7) Na te aru anga ia Karaiti, ka āriki te aronga pakari i te aronga ou. (Akara i te pia “ Eaa te ka Tauturu ia Koe me Neke ki Tetai Putuputuanga Ou?”) Inara, pouroa te au taeake i roto i te putuputuanga, kapiti mai i te au tamariki, e tuanga ta ratou no te āriki i te au taeake ou.

Penei ka pati koe i te au taeake ou ki toou kainga e te oronga i te tauturu. Ei akaraanga kua oronga tetai tuaine i tona taime no te turoto atu i te oire ki tetai tuaine ou e te akamārama kiaia akapeea me aere na runga i te bus e te rerue. Kua akapumaana teia i te tuaine ou e kua tauturu iaia kia akatanotano ki tona kainga ou.

 KIA TUPU MAATA I ROTO I TE TUATUA MOU

Mei tetai tāpaki, me pakari mai te reira ka tauiui tona pakiri i mua ake ka rere ei aia. Pera katoa me neke koe ki tetai putuputuanga ou, ka anoanoia koe kia tauiui i toou tu kia tere ki mua i roto i ta Iehova tavinianga. Karanga a Nicolas e Céline “e terenianga meitaki me neke koe ki tetai ngai ou. Me akatanotano koe ki te au tangata i te au ngai ou, ka akamaroiroi te reira ia koe kia akatupu i te au tu ou.” Karanga a Jean-Charles, tei taikuia i te akamata anga, akapeea tona pamiri te puapinga anga: “I roto i ta matou putuputuanga ou, kua tere ta maua tamariki ki mua i te pae vaerua e kua piri vaitata raua kia Iehova. I te au marama i muri mai, kua āriki ta maua tamaine i tetai tuanga no te uipaanga epetoma e kua riro ta maua tamaiti ei papuritia kare i papetitoia.”

Akapeea me kare e rauka ia koe i te neke ki tetai ngai tei anoano maataia te tauturu? Penei ka rauka ia koe i te taangaanga i te au ravenga tei taikuia i roto i teia atikara. E irinaki ia Iehova, e angaanga pakari i roto i taau putuputuanga, e angaanga kapiti ki tetai ke i roto i te angaanga tutu aere, e akatupu i te pirianga oa ki te au taeake e kia akamaroiroi ia ratou. Penei ka rauka ia koe te tauturu i te au taeake ou. No te mea te akataka ra te aroa i te au Kerititiano mou, me tauturu koe i tetai ke, ka akavaitata te reira ia koe kia Iehova. (Ioa. 13:35) E mea papu e “te pereperekavana ra oki te Atua i te reira atinga.”—Ebe. 13:16.

Noatu te au manamanata, e maata te au Kerititiano tei puapingaia e tei mataora i te neke anga ki tetai putuputuanga ou, e ka rauka katoa ia koe! Karanga a Anne-Lise, “Te tauianga taku putuputuanga, kua tauturu iaku kia angaanga kapiti ki tetai ke.” Kua papu ia Kazumi na te neke anga, “kua tauturu a Iehova iaku na roto i tetai ravenga kare au i kite ana i mua ana.” Karanga a Jules: “Kua tauturu toku au oa iaku kia mataora i taku putuputuanga ou. I teianei kua piri vaitata au ki taku putuputuanga e ka ngatā iaku i te akaruke i te reira.”