1. Eaa toou manako no runga i te tuatua mou?

 AKAPEREPERE te iti tangata o Iehova i te tuatua mou mei roto i tana Tuatua. Kua akatumuia to tatou akarongo ki runga i te reira. (Roma 10:17) Kua irinaki tatou e kua akanoo a Iehova i te putuputuanga Kerititiano ei “pou e te rangorango [me kore ei turuturu i] te tuatua-mou.” (1 Timo. 3:15) E mareka ana tatou i te kauraro ki te “au arataki” ia ratou e akamārama maira i te tuatua mou no roto mai i te Pipiria e te oronga mai i te aratakianga tei rotai ki to te Atua anoano.—Ebe. 13:17.

2. Ia Iakobo 5:​19, eaa te ka tupu kia tatou i muri ake i te apii anga i te tuatua mou?

² Inara, i muri ake i te āriki anga tatou i te tuatua mou e te aru i te aratakianga mei te akaaerenga a te Atua, penei ka akavareia rai tatou. (E tatau ia Iakobo 5:19.) No te mea kua inangaro a Satani ia tatou kia kore e irinaki i te Pipiria e te akono i te aratakianga a te akaaerenga a Iehova.—Ephe. 4:14.

3. Eaa ra tatou ka akono ei i te tuatua mou? (Ephesia 6:​13, 14)

³ E tatau ia Ephesia 6:​13, 14. Kare e roa atu ana, ka akavare a Satani i te au pa enua na roto i te au tuatua pikikaa kia patoi ia Iehova. (Apo. 16:​13, 14) E ka tauta pakari a Satani i te akavare i te iti tangata o Iehova. (Apo. 12:9) No reira, e mea puapinga kia tereni ia tatou uaorai  kia kite i te tuke i rotopu i te tuatua mou e te pikikaa e kia akono tatou i te reira. (Roma 6:17; 1 Pete. 1:22) Ka anoanoia teia e ora ai tatou i te mate maata!

4. Eaa ta tatou ka uriuri i roto i teia atikara?

⁴ I teia atikara, ka apii tatou e rua tu tei anoanoia kia kite tatou i te tuatua mou mei te Pipiria e kia aru i te aratakianga no ko mai i te akaaerenga a te Atua. Aru mai, ka uriuri tatou e toru ravenga te ka tauturu ia tatou kia akono i te tuatua mou.

AU TU TEI ANOANOIA KIA KITE TATOU I TE TUATUA MOU

5. Akapeea te mataku ia Iehova me tauturu ia tatou kia kite i te tuatua mou?

⁵ E mataku ia Iehova. Me mataku tatou ia Iehova, ka akaperepere maata tatou iaia e kare tatou e rave i te au mea te ka akamareka kore iaia. Ka inangaro tatou i te apii i te tika e te tarevake, te tuatua mou e te pikikaa kia rauka ia tatou i te akamareka ia Iehova. (Mase. 2:​3-6; Ebe. 5:14) Kia maata to tatou inangaro ia Iehova e auraka e mataku i te tangata no te mea ko ta te tangata e mareka ra, kare a Iehova e mareka ana.

6. Akapeea te mataku i te tangata me apai ke i te tai ngauru aronga tutaka o Iseraela mei te tuatua mou?

⁶ Me mataku tatou i te tangata, ka apai ke te reira ia tatou mei te tuatua mou. Akamanako i te akaraanga o te 12 rangatira tei tutaka i te enua ta Iehova i taputou i te oronga ki te ngati Iseraela. E tai ngauru ia ratou tei mataku i te ngati Kanaana. Kua akakite ratou ki to Iseraela: “Kare e tika ia tatou kia tiki e tamaki i te reira aronga; e ririnui oki to ratou i to tatou nei.” (Nume. 13:​27-31) Mei ta ratou akara anga, e ririnui atu te ngati Kanaana i to Iseraela. Inara, ko tetai ua atu tei tuatua e kare te ngati  Iseraela e autu i to ratou au enemi, kare ratou i akamanako ana i ta te Atua Mana Katoatoa ka rave. Naringa te aronga tutaka e tai ngauru i akamou ki runga i ta Iehova ka rave no Iseraela, kare ratou e mataku. Naringa katoa ratou i akamanako i ta Iehova i rave no te iti tangata i mua ana, ka kite i reira ratou e ririnui atu a Iehova i te ngati Kanaana. Tei tuke ki te aronga tutaka e tai ngauru, kua akamareka a Iosua raua ko Kaleba ia Iehova. Karanga raua ki te iti tangata: “Kia mareka mai a Iehova ia tatou nei, nana tatou e arataki ki taua enua ra, e nana e oronga mai no tatou.”—Nume. 14:​6-9.

7. Akapeea tatou me akamatutu i to tatou mataku ia Iehova? (Akara katoa i te tutu.)

⁷ Kia akamatutu i to tatou mataku ia Iehova, ka anoanoia tatou kia akamareka iaia me rave i ta tatou au ikianga. (Sala. 16:8) Ia koe e tatau ra i te au tua Pipiria, e ui kia koe, ‘Naringa e ko au tera, eaa taku ikianga ka rave?’ Ei akaraanga, akamanako ia koe e akarongo ra i te au tuatua ekoko a te rangatira Iseraela e tai ngauru. Ka irinaki ainei koe i ta ratou tuatua e ka mataku i te tangata? Me ka akaperepere koe ia Iehova e ka akamareka iaia? No ta ratou tuatua ekoko, kare te maataanga o Iseraela i irinaki i te tuatua mou ta Iosua raua ko Kaleba i akakite kia ratou. No te reira, kare a Iehova i akatika ia ratou kia tomo ki roto i te Enua Taputouia.—Nume. 14:​10, 22, 23.

8. Eaa te tu ka tauta pakari tatou i te akaari, e no teaa ra?

⁸ Tu akaaka. Te akakite maira a Iehova i te tuatua mou ki te aronga akaaka. (Mata. 11:25) Kua āriki akaaka tatou i te tauturu kia apii i te tuatua mou. (Anga. 8:​30, 31) Inara, kia matakite tatou eiaa e ngakau parau. Me akaparau tatou, ka ō mai te manako e puapinga atu to tatou manako i to te au kaveinga Pipiria e te aratakianga mei te akaaerenga a Iehova.

9. Akapeea tatou me vai akaaka ua?

⁹ Kia vai akaaka, ka akamaara tatou e iti ua e te puapinga kore tatou me akaaiteia kia Iehova. (Sala. 8:​3, 4) Ka pati tatou kiaia no te tauturu kia vai akaaka e te maru. Ka tauturu a Iehova ia tatou kia akono i tona au manako no roto mai i tana Tuatua e tana akaaerenga, kare i to tatou uaorai. I roto i taau tatauanga Pipiria, e akara i te au manako te akaari maira i to Iehova inangaro i te tu akaaka e tona rikarika i te tu ngakau parau, te akatietie e te nengonengo. Pera katoa, e tauta ua rai kia vai akaaka me orongaia mai te mana akaaere me kore me akapaapaaia mai koe.

E AKONO I TE TUATUA MOU

10. Koai ma ta Iehova i iki kia oronga i tana aratakianga ki tona iti tangata?

¹⁰ E irinaki ua i te aratakianga mei te akaaerenga a Iehova. I Iseraela taito, kua oronga a Iehova i tana ikuikuanga ki tona iti tangata na roto ia Mose e aru mai, ia Iosua. (Iosu. 1:​16, 17) Me akangateitei te ngati Iseraela i teia nga tangata ei mata no te Atua ko Iehova, ka akameitakiia ratou. I te au anere mataiti i muri mai, te akamataanga te putuputuanga Kerititiano kua oronga mai te 12 apotetoro i te aratakianga kia ratou. (Anga. 8:​14, 15) E oti, kua piri mai te aronga pakari i Ierusalema kia ratou. Na te akono anga i te aratakianga no ko mai i teia aronga tiratiratu, kua “tinamou atura te  au ekalesia i te akarongo anga i te tuatua, tupu atura i te maata anga, kare e rā i tivata.” (Anga. 16:​4, 5) I teia tuatau, ka akameitakiia tatou e Iehova me akono tatou i te aratakianga mei ta Iehova akaaerenga. Inara eaa to Iehova manako me patoi tatou i te aratakianga a te aronga tana i iki? Ka kite tatou i te pauanga me akamanako tatou i tei tupu ki to Iseraela ia ratou i roto i te metepara e aere atura ki te Enua Taputouia.

11. Eaa tei tupu ki te aronga tei patoi i ta Iehova ikianga ia Mose kia arataki ia ratou? (Akara katoa i te tutu.)

¹¹ Ia Iseraela e teretere atura ki te Enua Taputouia, kua patoi tetai aronga rongonui ia Mose e tana arataki anga no ko mai ia Iehova. Karanga ratou: “Te tapu katoa nei te uipaanga katoa e pini ua ake, e tei roto a Iehova ia ratou.” (Nume. 16:​1-3) Noatu e tapu “te uipaanga katoa” ki mua i te Atua, kareka ra kua iki a Iehova ia Mose kia arataki i tona iti tangata. (Nume. 16:28) Na te akakinoanga ia Mose, te akakino katoa ra te aronga meameaau ia Iehova. Kare ratou i akamanako i ta Iehova i inangaro; mari ra i to ratou anoano no te mana akaaere e te rongonui. Kua tamate te Atua i te aronga meameaau e te tauatini ua atu tei piri kia ratou. (Nume. 16:​30-35, 41, 49) I teia tuatau, kare a Iehova e mareka i te aronga tei patoi i te aratakianga mei tana akaaerenga.

12. Eaa tatou ka irinaki ua rai i te akaaerenga a Iehova?

¹² Ka irinaki ua rai tatou i te akaaerenga a Iehova. Me anoanoia te akatikatikaanga no to tatou mārama i te Pipiria me kore tetai akanoonooanga no te angaanga Patireia, ka rave viviki te aronga e arataki ra i te au tauianga. (Mase. 4:18) Ka rave ratou i teia ei akamareka ia Iehova. Ka akatumu ratou i te  au ikianga ki runga i ta te Atua Tuatua, ko te akonoanga tuatua tika ïa.

13. Eaa “te akonoanga tuatua tikai,” e eaa ta tatou ka rave?

¹³ “E tāpu meitaki i te akonoanga tuatua tikai.” (2 Timo. 1:13) “Te akonoanga tuatua tikai,” te taiku ra i te au apiianga Kerititiano i roto i te Pipiria. (Ioa. 17:17) Ko te au apiianga te reira ta tatou e irinaki ra. Kua apii mai ta Iehova akaaerenga kia tāpu meitaki i te akonoanga tuatua tikai. Me pera tatou, ka akameitakiia mai tatou.

14. Akapeea tetai au Kerititiano i te aere ke anga mei “te akonoanga tuatua tikai”?

¹⁴ Eaa te ka tupu me aere ke tatou mei “te akonoanga tuatua tikai”? E akamanako i teia akaraanga. I te anere mataiti mua, kua akatotoa tetai pae Kerititiano i te tuatua pikikaa e kua tae mai te rā o Iehova. Penei e reta tetai ta te au Kerititiano i manako e na Paulo te reira i tata. No te mea kare ratou i akara meitaki ana me e tika te reira, kua irinaki tetai pae i Tesalonia i te reira tuatua pikikaa e kua akatotoa aere i te reira. Naringa ratou i akamanako i ta Paulo i apii kia ratou, kare ratou e akavareia. (2 Tesa. 2:​1-5) Kua ako a Paulo i tona au taeake, eiaa e akarongo ua i te au tuatua. Ei tauturu ia ratou, kua taopenga a Paulo i te rua o tana reta ki to Tesalonia i te na ko anga e: “Ko toku teia aroa anga atu ia kotou, to Paulo, na toku uaorai rima i tata, ko te akairo ïa i te au leta katoa; e na reira au kia tata.”—2 Tesa. 3:17.

15. Akapeea tatou me paruru ia tatou uaorai mei te au tuatua pikikaa? Oronga mai i tetai akaraanga. (Akara katoa i te au tutu.)

¹⁵ Eaa te apiianga mei ta Paulo au tuatua ki to Tesalonia? Me akarongo tatou ki te au tuatua kare e rotai ana ki ta tatou i apii mai no roto i te Pipiria, me kore me rongo tatou i te tua pikikaa e te umere, ka anoanoia tatou kia matakite. I Soviet Union, kua tuku te au enemi i tetai reta ki te au taeake tei tamanakoia e no ko  mai i te opati maata i Betela. Kua akakite te reta e kia akatakake te au taeake ia ratou e kia akamata i tetai akaaerenga ou. I te akaraanga e mea tika te reira. Inara kare te au taeake tiratiratu i akavareia. Kua kite mai ratou e kare te reira i rotai ki ta ratou i apii. I teia tuatau, te taangaanga nei te au enemi i te initaneti e te social media no te akatupu i te ke e te manako ekoko kia tatou. “Kia kore to [tatou] ngakau e ngaueue,” ka paruru tatou ia tatou uaorai, na te akamanako meitaki anga i ta tatou i akarongo e te tatau me kua rotai te reira ki te Pipiria.—2 Tesa. 2:2; 1 Ioa. 4:1.

16. Ia Roma 16:​17, 18, eaa ta tatou ka rave me aere ke atu tetai pae mei te tuatua mou?

¹⁶ Kia taokotai te aronga tiratiratu kia Iehova. Ka inangaro te Atua ia tatou kia taokotai me akamori iaia. Ka vai taokotai tatou me akono ua rai tatou i te tuatua mou. Ko tetai ua atu tei akakite i te pikikaa, ka akatupu aia i te ke i roto i te putuputuanga e no reira, kua akamatakite te Atua ia tatou kia “ariu ke atu kotou ia ratou” kia kore tatou e akaruke i te tuatua mou.—E tatau ia Roma 16:​17, 18.

17. Eaa te au akameitakianga me kite e me akono tatou i te tuatua mou?

¹⁷ Me kite tatou i te tuatua mou e te akono i te reira, ka maroiroi tatou i te pae vaerua. (Ephe. 4:​15, 16) Ka paruruia tatou mei ta Satani au apiianga e te au tuatua pikikaa e ka akaora a Iehova ia tatou i te tuatau o te mate maata. No reira, e akono meitaki i te tuatua mou e ka “noo te Atua au ra ki o kotou.”—Phili. 4:​8, 9.