E MEA UMERE TIKAI TE TU O TE TANGATA—KA RAUKA IA TATOU I TE TATA, TE PENI, TE ANGA, E TE AKAMANAKO I TE AU UIANGA PUAPINGA O TE ORAANGA: Eaa te ao rangi e pini ua ake i akamata ai? Akapeea tatou te akamata anga? Eaa te akakoroanga o te oraanga? Eaa te ka tupu a te tuatau ki mua?

E kopae ana tetai aronga i teia au uianga, no te mea e ngata roa te au pauanga. Karanga tetai pae e kare taua au uianga e puapinga ana, no te mea, e mea tupu ua mai te oraanga. “Kare e atua, kare e akakoroanga,” i karanga ai a William Provine, e professor aia no te apii i te oraanga tangata, te manu e te rau rakau. Karanga katoa aia: “Kare rai e tumu anga no teia au kaveinga, e e puapinga kore ua te oraanga.”

Kare tetai aronga e āriki ana i taua manako papu kore. Te kite ra ratou i tetai ao rangi e pini ua ake tei akatereia ma te au ture mako, te manea, e tei tau ki te kite taieni. Umere ratou i te tu i angaia ai te au mea o te enua, e kua kopi ratou i te reira ei maani i te au apinga. E i te au rā e apii ra ratou i te reira, kua kite mai ratou e kua maaniia te au mea ravarai e tetai Tei Anga.

Kua akakeuia tetai aronga tei irinaki i te au mea tupu ua kia akamanako akaou i ta ratou e irinaki ra. Akamanako ana i teia nga akaraanga.

TANGATA VAʼI RORO DR. ALEXEI MARNOV. “Kua aere au ki te au apii tei apii kare e Atua e kua tupu ua mai te au mea ora,” i nana ai. “Ko tetai ua atu tangata tei irinaki i te Atua, kare ratou i apiiia.” Inara, i te 1990, kua taui tona manako.

“E tauta ua ana au kia mārama i te tikaanga tau no te au mea ravarai,” i akamārama ai aia, “e pera katoa te roro o te tangata. Kua karangaia teia mero umere tikai e ko te mea ngata roa atu na te tangata kia mārama. Inara kua angaia ainei te roro kia rauka mai te kite e te tu karape, e oti ka mate atu ei? Kare teia manako e tano ana e kare katoa e tau ana. No reira, kua akamata au i te akamanako: ‘Eaa to tatou akakoroanga? Eaa te akakoroanga o te oraanga?’ Muri ake i te akamanako anga i te reira, ko teia taku i kite mai, e te ora ra Tei Anga mai ia tatou.”

Te kimikimi anga no runga i te akakoroanga o te oraanga kua akakeuia a Alexei kia akara ki roto i te Pipiria. Kua akamata katoa tana vaine, e taote rai aia tei irinaki ana e kare e Atua, i te apii i te Pipiria—i te akamataanga ei akapapu e e tarevake tana tane! I teianei, kua irinaki raua i te Atua e kua mārama katoa eaa tona akakoroanga no te tangata ravarai tei akamāramaia mai i roto i te Pipiria.

TANGATA TAIENI NO TE PLASMA DR. HUABI YIN. Kua apii a Huabi Yin no runga i te au mea o teianei ao, e no tetai au mataiti, kua rave aia i te kimikimi anga no runga i te plasma. Akamanako ana i te tuanga a o te au mea o teianei ao, te plasma (no runga i te rā) koia oki no roto mai te maata anga o te reira i te au electron e te au ion.

“Me apii ana matou te aronga taieni, i te au mea natura o te ao rangi e pini ua ake,” i karanga ai a Huabi, “kua kite mai matou i te tu tau, na roto i te au mea mako tikai. ‘Akapeea ra teia au mea i te tupu mai anga?’ taku ia i manako ana. ‘Pera katoa me tunu ana i te kai ka tau rai kia ka meitaki ua te ai, naai i akaaere i te au mea o te rā?’ Aere ua rai, kite mai au i te pauanga tau tikai i roto i te akakiteanga mua a te Pipiria: ‘I muatangana ra, kua anga iora te Atua i te rangi e te enua.’”—Genese 1:1.

Akapapu maira te apii taieni no runga i teia au uianga: Akapeea te roro o te tangata te angaanga anga? Akapeea te rā te akatupu anga i te vera e te marama? Mei ta Alexei raua ko Huabi i kite mai, ka rauka i te Pipiria i te pau i te au uianga puapinga mei teia rai: Akapeea te ao rangi e pini ua ake i te akamata anga? Akapeea te reira me akaaereia? Eaa te tumu i ora ai tatou?

No runga i te enua, karanga ra te Pipiria: “Kare ra [te Atua] i anga ei mea puapinga kore ua; kua anga ra aia kia tangataia.” (Isaia 45:18) Ae, e akakoroanga to te Atua no te enua, e mei ta te atikara ka aru mai e akaari maira, te piri vaitata ra te reira akakoroanga ki to tatou manakonakoanga no te tuatau ki mua.