E TANGATA MATAORA AINEI KOE? Eaa te tumu i mataora ai koe? No toou ngutuare tangata, taau angaanga, me no te akonoanga? Penei te tapapa ra koe i tetai apinga ka mataora koe, te akaoti anga i taau apii, rauka tetai angaanga meitaki, me kore oko mai anga i tetai motoka ou.

Maata te au tangata tei kite i te mataora no te akatupu anga i tetai akakoroanga, me kore te rauka anga tetai apinga i anoanoia. Eaa ra te roa no teia mataora? Maataanga o te taime, ka poto ua tona tuatau, e ka tupu mai te maromaroā.

Kua akatakaia mai te mataora ei turanga akatinamou meitakiia, na roto i te manako ngakau kia mareka ua e tae ua atu ki te rekareka maata, e te inangaro anga kia vai ua rai te reira.

Pera katoa rai, kia noo mataora ua tatou, kare tatou e anoano i te au mea ravarai, mari ra kia mareka ua tatou i te reira. Me ka karanga tatou e, “Ka mataora au me rauka iaku teia mea me kore i tera mea,” noatu rai kare roa tatou e mataora.

Ei akatutuanga, e akaaite i te mataora ki te oraanga kopapa meitaki. Akapeea tatou e mataora ai i te tu kopapa meitaki? Ka aru tatou i tetai kaveinga meitaki no te tu o te kai, akamatutu i te kopapa, e te tauianga i te oraanga. Mei te reira katoa, ka tupu mai te mataora me akono meitaki i te oraanga, na te akono anga i te au kaveinga tau.

Eaa te au kaveinga me kore te au tu o te oraanga te akataka maira i te mataara no te mataora? Mei te mea e puapinga atu tetai o teia au kaveinga i tetai atu, e puapinga katoa rai teia au tu i raro akenei:

• MAREKA UA E TE ORONGA UA

• KOPAPA MEITAKI E TE MAROIROI

• AROA

• AKAKORE I TE ARA

• AKAKOROANGA O TE ORAANGA

• MANAKONAKOANGA

Akakite maira tetai puka tei āriki maataia e: “E ao [mataora] to te aronga apa kore i te arataa.” (Salamo 119:1) Ka akara ana tatou i teia au kaveinga.