“KO TE MANAKONAKOANGA . . . TE MEA PUAPINGA I TO TATOU ORAANGA PAE VAERUA,” i akakite ei te puka Hope in the Age of Anxiety. “E ko te vairakau meitaki rava atu ïa i te tauturu i te akakore atu i te au manako puapinga kore, te akamatiroeroe, e te mataku.”

Kua akakiteia mai i roto i te Pipiria to tatou anoano no te manakonakoanga, e te akamatakite  katoa maira i te au manakonakoanga pikikaa. “Auraka e irinaki ki te ui ariki, i te tamaiti a te tangata nei, kare oki ona ora,” karanga ra a Salamo 146:3. Auraka tatou e irinaki atu i te au tautaanga a te tangata ei akaora ia tatou, mari ra kia irinaki ki Tei Anga mai ia tatou, tei iaia te mana i te akatupu pouroa i tana au taputou. Eaa tana i taputou mai kia tatou? Akamanako ana i teia.

KA OPE TE KINO; TUPU TE ‘AU MUTU KORE NO TE ARONGA TUATUA TIKA: “E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra,” i akakite mai ei a Salamo 37:10, 11. Te akakite katoa maira te irava 29 e ko “te aronga tuatua-tika, ka noo tamou rai ratou” i te enua nei.

KORE TE TAMAKI: “Kua akakore [a Iehova] i te tamaki e tae rava akenei ki te openga enua; kua aati aia i te ana, e kua tipupu i te korare: e kua taʼuia te kariota ra i te ai.”—Salamo 46:8, 9.

KORE RAVA TE MAKI, TE MAMAE, E TE MATE: “Tei ko te tangata ra te puakapa o te Atua . . . E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:3, 4.

MAATA TE KAI NA TE KATOATOA: “E manga sitona okotai rima i ki i te enua nei, i runga i te take o te au maunga ra.”—Salamo 72:16.

MANA TUTARA TAU OKOTAI KAVAMANI—PATIREIA O TE MESIA: “Kua orongaia kia [Iesu Mesia] te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia: tona mana, e mana mutu kore ïa, kare ïa e kore, e tona basileia, kare ïa e pou.”—Daniela 7:14.

Akapeea e papu ei ia tatou taua au taputou ra? Iaia i te enua nei, kua akapapu mai a Iesu ki mua i te katoatoa i tona tikaanga ei Ariki Ikiia. Kua rapakau aia i te aronga maki, angai i te putaua, e kua akatu akaou mai i tei mate. Te mea puapinga roa atu, ko tana au apiianga, te kapiti maira te au kaveinga te ka tauturu i te au tangata kia noo taokotai ma te ‘au e tuatau ua atu. Kua totou katoa mai a Iesu i te au mea ka tupu a te tuatau ki mua, pera katoa te au akairo no te tuatau openga o te akatereanga o teianei ao.

Kua totou mai a Iesu e ka akairoia te tuatau openga, kare na roto i te ‘au e te tinamou, mari ra na roto i tetai ravenga ke! Kapiti mai i roto i tana akairo no “te openga o teianei ao” ko te tamaki a te au pa enua, te onge, te maki mate, e te au ngaruerue enua. (Mataio 24:3, 7; Luka 21:10, 11; Apokalupo 6:3-8) Kua akakite katoa mai a Iesu e: “E no te mea e maata te kino i te tupu anga, ka riro te rai o te tangata i te mea ngiti te anoano.”—Mataio 24:12.

Kua kitea maataia teia tu, tei akataka meitakiia mai e tetai tata Pipiria. Ia 2 Timoteo 3:1-5, ka tatau tatou e “i taua tuatau openga ra,” ka akaperepere ua te tangata ia ratou uaorai, te noinoi moni, e te akanavenave ra. Ka riro ratou ei aronga akatietie e te rotoriri. Ka kore te aroa i roto i te au ngutuare, e ka akarongo kore te tamariki ki to ratou metua. I te au ngai ravarai ka kiteaia te tu pikikaa o te au akonoanga.

Te akapapu maira taua au tu kino mei te uriia rai e tei roto teianei ao i te tuatau openga. Te akapapu katoa maira te reira e te vaitata maira te tutaraanga maru o te Patireia. Tika rai, kua kapiti mai a Iesu i teia au akapapu anga i roto i tana totou no te tuatau openga: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”—Mataio 24:14.

E akamatakiteanga teia nuti meitaki ki te aronga kino e e manakonakoanga ki te aronga tuatua tika, e kare e roa atu ana ka tupu te au akameitakianga tei taputouia ki te aronga tuatua tika. Ka inangaro ainei koe i te kite eaa taua au akameitakianga? Me koia ia, e akara i te kapi openga o teia makatini, ine.