I AKARONGO ANA KOE KA MATAORA E KA TUPU TE PUAPINGA NA ROTO I TE APINGA NUI? E mirioni ua atu aronga te angaanga roa ra ma te roiroi kia maata mai ta ratou moni. Inara, ka akatupu ainei te moni e te au apinga i te mataora? Eaa ta te akapapuanga e akaari maira?

Akakite maira te Journal of Happiness Studies, me rauka mai te au mea ta tatou e anoano ra, kare te reira e oronga mai i te mataora me kore i tetai oraanga meitaki noatu e maata te moni. Kare e ko te moni te manamanata. Ko “te aruaru anga kia maata mai te [moni] kua akatupu te reira i te tu mataora kore,” ta tetai makatini Monitor on Psychology, i akakite mai. Aiteite te reira au tuatua ki te akoanga Pipiria mei te rua tauatini mataiti i topa ake nei: “Ko te anoano maata oki i te moni te tumu o te au kino katoa nei . . . i te umuumu anga i te reira, e kua ko mama rava ia ratou uaorai i te iriea [mamae] e manganui.” (1 Timoteo 6:9, 10) Eaa te kapitiia maira ki taua mamae ra?

TAITAIA E TE RAVA KORE TE MOE NO TE PARURU I TE APINGA NUI. “E meitaki te moe o te tangata rave angaanga ra, iti oti, e rai oti, tana kai: no te ki kopu ra o te tangata apinga nui ra i ngere ei aia i te moe.”—Koheleta 5:12.

MAREKA KORE NO TE MATAORA KARE I TUPU MAI. I tetai tua, kua tupu mai te taitaia no te mea kare taua anoano no te moni i rauka ana. “Ko tei inangaro i te ario ra, kare ïa e mareka i te ario; e tei inangaro i te apinga nui ra, kare ia e mareka i te apinga e kia maata ra.” (Koheleta 5:10) Pera katoa, ko tei inangaro maata i te apinga nui penei ka kopae aia i te au mea puapinga te ka akatupu i te mataora, mei te oronga meitaki anga i te taime ki te ngutuare e te au oa, me kore te au angaanga i te pae vaerua.

MAMAE E TE MANAMANATA ME KARE E MONI I RAUKA MAI. “Auraka e akaope i te ririnui ki te apinga kia maata; auraka e irinaki ki toou uaorai pakari. Ka anaana rai koe i o mata ki runga i te mea e kare nei ïa? te rave nei oki te reira i te peau; te rere ke nei mei te aeto ki runga i te rangi ra.”—Maseli 23:4, 5.

MAREKA UA. “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.” (1 Timoteo 6:7, 8) Ko te au tangata te mareka ua ra kare ratou e kopekope ana, e ka paruru te reira tu ia ratou mei te vareae. No te mea kare ratou e inangaro kia maata atu te apinga, kare ratou i reira e apiapi e e taitaia ana.

ORONGA UA. “E mea meitaki i te oronga atu i te rave mai.” (Angaanga 20:35) E aronga mataora te aronga oronga ua no te mea e reka ana ratou i te akarekareka i tetai ke, noatu e iti ua to ratou taime e te maroiroi i te oronga atu ki tetai ke. E maata atu te ka rauka mai ia ratou, i ta te moni ka oronga mai—te aroa, ngateitei, e te au oa mou, te ka oronga ngakau tae mai kia ratou!—Luka 6:38.

TUKU I TE TANGATA NA MUA AKE I TE AU APINGA. “Meitaki ïa kai anga i te kai kinaki kore anake ra ma te aroa, i te puakatoro matu ma te riri.” (Maseli 15:17) Eaa te akakoroanga o teia irava? Puapinga maata atu te pirianga aroa ki tetai ke, i te au apinga. No runga i te aroa, e puapinga tikai te reira ki te mataora, ta tatou ïa ka kite mai i muri ake.

Kua kite mai a Sabina, no Marike Tonga mai, i te puapinga o te au kaveinga Pipiria. Kua akarukeia aia e tana tane, no reira e mea ngata ia Sabina i te akono iaia e tana nga tamaine kia rauka te au mea o te oraanga. E rua ana ngai angaanga, e i te au rā ravarai ka tu mai aia i te ora 4 i te popongi. Noatu tana angaanga pakari, kua iki a Sabina i te apii i te Pipiria. Eaa tei tupu mai?

Kare tona turanga i te pae moni i taui ana. Inara kua taui meitaki mai tona tu no runga i te oraanga! Ei akaraanga, kua tupu mai te mataora kiaia no te akono anga i tona anoano pae vaerua. (Mataio 5:3) E au oa mou tona i rotopu i te au taeake irinaki. E kua kite mai aia i te mataora no te oronga ua na te akakite anga ki tetai ke i tana i apii mai.

“E akatikaia ra te pakari e tana ra au tamariki,” i karanga ai te Pipiria. (Mataio 11:19) No runga i taua turanga, kua riro te tu mareka ua e te oronga ua, e te tuku katoa i te tangata na mua ake i te au apinga ei mea tika tikai ïa e ei mea akangateiteiia!