Te turuturu nei te United Nations i te manako “taokotaianga i te iti tangata i te ao katoa.” Te akamaroiroi ra te reira i te katoatoa kia tauturu i tetai e tetai, kia akangateitei i te tikaanga o te tangata, e kia paruru i te ao rangi. Eaa ra te tumu? Mei ta Maher Nasser i akakite i roto i te UN Chronicle, te tupu nei “te tauianga reva, angaanga tika kore e te kino, te tu papakitai, tamaki, māroia kia neke ki tetai ngai ke, tamate tangata, maki piri, e tetai ua atu au tu takinokino . . . i te au pa enua ravarai.”

Kua akakite mai tetai aronga i to ratou manako, na te turuturu anga i tetai kavamani ou. Ko Dante (1265-1321) e tangata Itaria kimi kite, atu pee e e tumu korero poritiki, e pera katoa a Albert Einstein (1879-1955) e tangata kite karape taieni, ko raua tetai tei manako akapera. Kua irinaki a Dante kare e tupu te au i roto i tetai kavamani manamanata i te pae poritiki. Kua taiku aia i ta Iesu Karaiti tuatua: “Ko te basileia i mavete e rave iaia uaorai, e pou ïa.”​—Luka 11:17.

I muri ua ake i te Tamaki II o te Ao, e rua pomu tei akaaruruia, no reira kua tata a Albert Einstein i tetai reta ki te General Assembly of the United Nations i roto i tetai nuti pepa. Karanga aia, “Kia rave viviki te United Nations i te au mea ka anoanoia no te akanoo i tetai oraanga tinamou i te ao katoa na roto i tetai kavamani ou.”

No reira, ko te au tangata poritiki te ka riro ei tuanga no teia kavamani ririnui, ka irinaki ainei tatou e kare ratou e riro mai ei aronga pikipikikaa, tau kore e te kino? Me kare, ka kino atu ainei ratou mei tetai au tutara kino? Te akamaara maira teia nga uianga i te au tuatua a tetai tangata i roto i te kavamani o Peritane, ko Lord Acton e: “E akariro ana te tangata i to ratou mana akaaere ei takinga kino i etai ke.”

No reira, e rekareka ai te au tangata ravarai i te au e te rotai, ka anoanoia tatou kia taokotai. Akapeea teia e tupu ei? Ka tau ainei kia irinakiia te reira? Te pau maira te Pipiria, e ae. Ka rauka e ka tupu te reira. Na roto i teaa? Kare e na roto i tetai kavamani o teia ao e maata te au tangata poritiki pikipikikaa. Mari ra, na roto i te kavamani o te Atua. Pera katoa, na teia kavamani e akakite mai i tona tikaanga ei tutara i rungao i tana au mea i angaia. Eaa ra teia kavamani? Te akakite maira te Pipiria i te ingoa o te reira​—“te basileia o te Atua,” me kare to te Atua Patireia.​—Luka 4:43.

To Iesu Karaiti manako ïa no te Patireia o te Atua, te karanga anga aia i roto i tana pure: “Kia tae toou basileia. Kia akonoia toou anoano i te enua nei.” (Mataio 6:9, 10) Ae, ka rauka i te Patireia o te Atua i te akono i to te Atua anoano i te enua nei, kare e na roto i te anoano o te aronga mana noinoi.

Kua tapa katoaia te Patireia o te Atua e ko ‘te basileia o te rangi.’ (Mataio 5:3) Eaa ra te tumu? Ka tutara te reira ki rungao i te enua, kare ra e ka tutara mei te enua mari ra mei te rangi mai. Akamanako ana eaa ta te reira ka rave. Kare teia kavamani e anoano me kore e patipati moni no te tauturu. E mea pumaana teia ki tona iti tangata!

Mei ta te tuatua “basileia” e akakite maira, e kavamani ariki te Patireia o te Atua. Ko Iesu Karaiti​—tona Ariki—​e no ko mai i te Atua tona mana tutara. No Iesu, te karanga ra te Pipiria:

• “Ei runga i tona ra pakuivi te au vai ei . . . Kare e mutu te tupu anga o tona ra basileia, e tona au.”​—Isaia 9:5, 6.

•   “Kua orongaia maira te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia: tona mana, e mana mutu kore ïa, kare ïa e kore.”​—Daniela 7:14.

• “Ko te au basileia o teianei ao, kua riro ïa ei au basileia no to tatou Atu[a] e no tana Mesia.”​—Apokalupo 11:15.

Kia tau ki ta Iesu pure, ka akatupu te Patireia o te Atua i te anoano o te Atua i te enua nei. I raro ake i taua Patireia, ka apiiia te au tangata ravarai akapeea ratou me akono meitaki i te enua e kia tupu ruperupe te au mea ora.

Tei meitaki atu, ka apii te Patireia o te Atua i tona iti tangata. Aiteite ua te au turanga te ka apiiia ki te katoatoa. Kare te manamanata e tupu akaou. “Kare ratou e kanga, kare oki e mea e mate ei . . . no te mea, ka ki te enua i te kite ia Iehova, mei te vairanga tai e ki i te tai ra,” i karanga ai a Isaia 11:9.

Ka taokotai te au tangata ravarai o te enua e ka noo ratou ma te au, tei kore i rauka ana i te United Nations. “Ka rekareka ratou i te maata o te au ra,” i karanga ai a Salamo 37:11. Kare e roa atu, kare tatou e tuatua akaou i teia au tuatua mei te “tā tangata,” “kino te reva,” “putaua,” e te “tamaki.” Aea teia e tupu ei? Ae, aea te Patireia o te Atua e tutara ai i te ao katoa? Eaa ta te reira ka rave? E akapeea koe e puapingaia ai no teia tutara anga? Ka akara ana tatou i teianei.