I to ratou aere anga no tetai tere na te apii, kua akaapaia tetai au mapu tamaroa no te kukumianga āinga tau kore i tetai tamaiti. Te aere ra teia au tamariki tamaroa ki tetai apii tutaki maataia i Kanata. I muri ake, i te tupu anga teia manamanata, kua tata a Leonard Stern i roto i te nuti pepa Ottawa Citizen e: “Noatu te turanga kite, te apii meitaki, e te apinganui kare ra teia i tauturu ana i te au mapu kia kore e rave i te au angaanga kino.”

Kua akakite katoa a Leonard Stern: “Tei matauia, ka manako koe e ko te akakoroanga maata o te au metua, ko te apii i ta ratou tamariki i te mea tika e te mea tarevake. Inara, ko te mea puapinga ki te au metua, kia meitaki ta ratou tamariki i te apii e kia rauka te turanga teitei e kia maata ta ratou moni.”

E puapinga rai te apiianga. Noatu te tu meitaki o te apii kare te reira i tauturu i tetai tamaiti kia patoi i te rave i te au anoano kino e te tarevake. Na roto i teea apii e rauka ai i te akatikatika i te manamanata—te ka oronga mai i te aratakianga meitaki tikai?

Mei te io rai te Pipiria. Me akara tatou ki roto i reira, ka kite meitaki tatou i to tatou tu apa ua e te paruparu. (Iakobo 1:23-25) Ka tauturu te Pipiria ia tatou kia taui, te ka akamaroiroi i te pirianga au e te rotai. Ka kapiti mai i te tu meitaki, takinga meitaki, akakoromaki, akono meitaki e te aroa. Kua kapiki katoaia te aroa ko te “tatua apa kore ua ra.” (Kolosa 3:14) Eaa ra te aroa i riro ei ei mea puapinga tikai? Ka akara ana tatou i ta te Pipiria i akakite mai no runga i teia tu.

• “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore [kino], e rekareka ra i te tuatua-mou; E tapoki i te au mea katoa, . . . e akakoromaki i te au mea katoa. Kare ua te aroa e kore.”​—1 Korinetia 13:4-8.

• “Kare rava te aroa e takinga-kino i te tangata tupu.”​—Roma 13:10.

• “Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.”​—1 Petero 4:8.

Eaa toou manako me piri taokotai atu koe ki te aronga taau e aroa ra? Ka inangaro ainei koe i te noo meitaki ma te tinamou e te maru kia ratou? Ae, kua kite koe e te inangaro ra ratou kia tupu te meitaki kia koe, e kare ratou e akakino ia koe.

Ka akakeu te aroa i te au tangata kia rave i te meitaki ki tetai ke, kia taui i te oraanga, ei akapuapingaia  i tetai. Ei akaraanga, te riro mai anga a George ei papa ruau, inangaro tikai aia i te akapou i tona taime ki tana mokopuna. E manamanata ra tetai. E tangata kai avaava a George, e kare tana unonga e inangaro kia kai avaava aia i mua i te pepe. Eaa i reira ta George ka rave? Noatu e 50 mataiti i tona kai avaava anga, kua akaruke aia i teia peu no tana mokopuna. Ae, e mana ririnui te aroa!

Kua apiiia mai tatou no runga i teia tu o te aroa. Tei runga i te au metua i te apii i ta ratou tamariki akapeea me akaari i te aroa. Ka angai e ka paruru ratou i ta ratou tamariki, e ka akonokono i te tamariki me tupu mai te mamae me kore te maki. Ka apii e ka pukapuka te au metua ki ta ratou tamariki. Ka ako meitaki i te tamariki, na te apiianga i te au kaveinga no te mea tika e te tarevake. E ka akanoo katoa i te akaraanga meitaki no ta ratou tamariki.

Te mea tangi ra, kare tetai au metua e akanoo ana i te akaraanga meitaki. Ko te aiteanga ainei e kare ta ratou tamariki e riro mai ei au tangata meitaki? Kare! No te mea, kua taui tetai aronga pakarikari, e tetai aronga kare to ratou oraanga ngutuare e meitaki ana, e kua riro ratou ei au tangata irinaki mou e te maru. Ka kite tatou i teia i roto i te atikara ka aru mai, tei kapiti katoa mai i te aronga kare i manakoia ana e ka taui to ratou tu!