Te irinaki ra ainei koe e ka rauka i te tangata i te akatikatika i to tatou manamanata, tei takinokino i te oraanga tinamou no te tuatau ki mua? Kia akatikatikaia te manamanata, ka kimi tatou i te tumu i tupu ei te reira.

Ei akatutuanga, kua makiia a Tom e kua mate i muri mai. Eaa ra aia i mate ei? “Te tupu mai anga tona maki, kare te taote i kimi ana i te tumu i maki ei aia,” i karanga ai tetai taote tei akono ia Tom, i mua ake i mate atu ei aia. Kua oronga ua te au taote i te vairakau kia Tom.

Te akatikatika ra ainei te tangata i te manamanata o teianei ao, mei taua tu rai? Ei akaraanga, ko teia ta ratou ka rave, ka tapu i te kino, ka tuku i te ture, ka tamou i te vitio nenei, e ka akaketaketa atu i te mana o te akava. Meitaki ua teia, inara, kare ratou e kimi ana i te tumu tikai o te manamanata. No te mea, te akaari maira te tu o te tangata i ta ratou e irinaki ra e manako ra e e anoano ra.

Karanga mai a Daniel, tei noo i tetai enua putaua i Marike Apatonga e: “Meitaki ua to matou oraanga i mua ana. Kare matou e mataku ana i te aronga keikeia. I teianei, kare to matou oire e au ana. No teia tu putaua, te kite nei matou i te tu o te tangata​—te tu noinoi, kare e akangateitei i te oraanga me kare te apinga a tetai ke.”

Kua akakite mai tetai tangata ko Elias tei oro ke mei te tamaki i te Middle East, tei apii i te Pipiria i muri mai. Karanga aia: “Ko te au mapu tane i roto i to matou oire, kua akamaroiroiia e to ratou ngutuare tangata, te au tangata poritiki e te au akonoanga kia ō atu ratou ki roto i te tamaki e kia riro mai ratou ei au mapu rongonui. Te rave katoa ra te au enemi o tetai au enua ke i teia! No teia tumu, kare au e irinaki atu ana i te au tutara a te tangata.”

Te akakite meitaki maira te Pipiria e:

• “Kino uaorai te manako o te ngakau tangata mei tona tamariki mea riki anga mai.”​—Genese 8:21.

• “E pikikaa maata to te ngakau i te au mea katoa nei, e kua kino takiri: koai te kite?”​—Ieremia 17:9.

• “No roto mai oki i te ngakau te manako kikino, te ta tangata, te moeaana, . . . te keia, te tapepe pikikaa.”​—Mataio 15:19.

Kare e rauka i te tangata i te akakore i te au tu kino i roto ia tatou te ka takino i tetai ke. No reira, te kino ua atura teia au tu, mei tei akakiteia i roto i te atikara i mua akenei. (2 Timoteo 3:1-5) Te tupu nei rai teia, noatu te tu kite e te ravenga karangaranga a te tangata ki tetai e tetai! Eaa ra i kore ei i rauka ia tatou i te akatupu i te oraanga tinamou? Te tauta ra ainei te tangata i te akatikatika i te reira? Ka tupu ainei taua oraanga tinamou i te ao nei?

Noatu e ka rauka te tu kino o te tangata i te akatikatikaia, kare ra e rauka ia tatou i te akatupu i te oraanga tinamou i teianei ao. No teaa ra? No to tatou tu apa ua.

Teia te tikaanga: “Kare tei te tangata . . . i te akono i tona uaorai takainga tapuae.” (Ieremia 10:23) Ae, kare tatou i angaia kia akaaere ia tatou uaorai. Kare katoa tatou i angaia kia akaaere i te au tangata, e kia noo ki roto i te moana e ki runga i te vananga tiaorangi!

 Akamanako ana i teia: Ka āriki ainei te tangata i te tuatua a tetai ke, e kia akapera ratou e kia akono i tetai oraanga tau? Ka mataora ainei te tangata me akakite tetai pae kia ratou e eaa ta ratou ka rave no runga i te titiri pepe, te āinga tau kore, e ka akapeea me āko i ta ratou tamariki? Ko teia tetai au manamanata e tupu nei ki te au tangata. Noatu e ngatā i te āriki i te reira, kua tika rai ta te Pipiria. No reira, kare o tatou tikaanga kia akaaere i te au tangata. Ka kimi i reira tatou i te tauturu kiea?

No te pauanga meitaki rava atu, ka aere tatou ki Tei Anga mai ia tatou no te tauturu. No te mea nana i anga ia tatou! Kare e ngaropoina iaia ia tatou mei ta tetai aronga rai e manako ra. Tika rai, te akakite maira te Pipiria e te manako maira aia ia tatou. Me mārama tatou i teia puka, ka kite katoa tatou i to tatou uaorai tu. E ka mārama rai tatou i te tumu i tupu ei te kino ki te tangata. Te kite nei tatou, mei ta tetai tangata Tiamani i tata, “kare te au tangata e te au kavamani i aru ana i te akaraanga o te oraanga tangata i taito, e kare katoa ratou e akono ana i te au kaveinga.”

Te karanga ra a Iesu e “akatikaia ra te pakari e tana katoa ra au tamariki,” me kore tana i akatupu. (Luka 7:35) Tei roto ia Isaia 2:22 tetai akaraanga no taua ākoanga pakari, te karanga ra e: “Kua oti ana i te irinaki i te tangata.” Ka tauturu te reira akoanga tau ia tatou e auraka e manako atu i tetai ua atu apinga ke kare i tupu ake. Karanga ra a Kenneth, te noo ra i roto i tetai oire e maata tikai te kino i Marike i Tokerau: “Mei tetai tangata poritiki ki tetai kua taputou mai ratou e ka meitaki te au mea ravarai, inara kare te reira i tupu ana. E aati ua ana ratou i ta ratou taputou, e te akapapu maira teia e e tika rai te pakari o te Pipiria.”

Kua tata mai a Daniel, tei taikuia i mua ana e: “I te au rā ravarai kua akapapuia mai kiaku e kare e rauka i te tangata i te akaaere meitaki ia ratou uaorai. . . . Noatu e maata taau moni i roto i te bank, me kare te moni pakari a te aronga angaanga, kare rai te reira e akatupu i tetai oraanga tinamou. Kua kite au i te au tangata e taitaia maata ra no teia turanga ngatā.”

E maata atu te tauturu a te Pipiria kia kore tatou e manako atu i tetai apinga ke kare i tupu ake. Ka oronga katoa mai i te manakonakoanga kia tatou, ko ta tatou ïa ka kite i teianei.