Kare e roa atu ana ka akatupu te Patireia o te Atua​—e kavamani na te Atua i akanoo—​i te au e te rotai anga takapini i teianei ao. Kua taputou mai te Salamo 72:7 e ka “maata roa oki te au.” Inara, aea te Patireia e tutara ai? Eaa ta te reira ka rave? E akapeea koe e puapingaia ai mei te tutaraanga Patireia?

Kua akakite mai te Pipiria i tetai au mea te ka tupu ei akaari mai e te vaitata maira te Patireia o te Atua. Kua riro teia au mea ei “akairo” te kapiti anga mai i te tamaki i te ao katoa, te onge, te maki, te ngaruerue enua, e te au kino.​—Mataio 24:3, 7, 12; Luka 21:11; Apokalupo 6:2-8.

Te akakite maira tetai totou e: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, ei noinoi, . . . ei akarongo kore ki te metua, ei mareka kore, ei viivii, Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, . . . ei ngakau akateitei, ei anoano i te au mea e navenave ei ra, kare i anoano i te Atua.” (2 Timoteo 3:1-4) Ko te tu rai teia o tetai pae tangata. Te kite katoaia nei teia au tu i teia tuatau.

Kua tupu taua totou i te mataiti 1914. Tika rai, kua akakite mai te aronga tuatua enua, te tumu korero porotiki e te aronga tata no runga i te tauianga o te enua. Ei akaraanga, kua tata te tangata tuatua enua, ko Peter Munch o Denmark e: “Te tupu anga te tamaki i te mataiti 1914, kua taui maata te turanga o te oraanga tangata. I mua ake i te 1914, kua manako te maata anga o te tangata e ka meitaki roa atu to ratou oraanga, . . . inara kua tupu mai te tuatau tumatetenga, rikarika, e te makitakita, e te tinamou kore i te au ngai ravarai.”

Inara, ka tupu tetai tauianga maata. Te akaari maira taua au turanga ra e te vaitata maira te tutaraanga o te Patireia. E nuti meitaki tikai teia. Kua akakite mai a Iesu eaa te ka raveia i taua tuatau openga ra: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

Ko taua nuti meitaki te tumu manako maata o te au karere a te Au Kite o Iehova. Ta ratou makatini e tuʼa aere ana ko Te Punanga Tiaki Akakiteanga i te Patireia o Iehova. Te uriuri putuputu ra te reira i te au mea manea ta te Patireia o te Atua ka rave no te tangata e te enua.

E a pauanga puapinga maata:

1. Kare roa te Patireia e angaanga na roto i te aronga mana porotiki o teianei ao.

2. Ka patoitoi ua atu te aronga mana porotiki o teianei ao i te tutaraanga a te Patireia o te Atua ma te mou piri anga ki to ratou turanga mana.​—Salamo 2:2-9.

3. Ka takore te Patireia o te Atua i te au kavamani o teianei ao tei inangaro i te tutara ki rungao i te tangata. (Daniela 2:44; Apokalupo 19:17-21) Kua kapikiia teia tamakianga openga i te ao katoa, ko Aramagido.​—Apokalupo 16:14, 16.

4.   Te au tangata te ka kauraro ki te Patireia o te Atua ko ratou te ka ora mai ia Aramagido e aere atu ki roto i te ao ou ma te au. Ko ratou ta te Pipiria e karanga ra e e “aronga maata rava,” penei e mirioni ua atu te numero.​—Apokalupo 7:9, 10, 13, 14.

Te takainga mua ta te iti tangata o te Patireia o te Atua ka rave ko te apiianga. Kua tuatua a Iesu na roto i te pure ki te Atua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Me apii te au tangata e koai te Atua ko Iehova, ka puapingaia ratou. Akamanako ana i teia e rua: Te mea mua, ka akamatutu ratou i to ratou akarongo iaia. Te akapapu maira te reira akarongo, tei akatumuia ki runga i te au akapapuanga, e e tika tikai te Patireia o te Atua e te vaitata maira tana tutaraanga. (Ebera 11:1) Te rua, ka ketaketa ua atu to ratou aroa no te Atua e no te tangata tupu. Ka akakeu te aroa i te Atua ia ratou kia akarongo kiaia ma te ngakau tae. E te aroa i te tangata tupu ka akakeu katoa ia ratou kia aru i ta Iesu au tuatua puapinga rava atu. Te na ko anga: “E ta kotou e inangaro ia etai ke ra, ka akapera katoa atu kotou kia ratou.”​—Luka 6:31.

Mei tetai metua aroa rai, te inangaro ra Tei Anga ia tatou kia rauka te meitaki ia tatou. Inangaro aia kia rauka ia tatou i ta te Pipiria e karanga ra e ko “te ora mutu kore.” (1 Timoteo 6:19) Kare te oraanga o teia tuatau i te ‘oraanga mutu kore.’ No te mirioni ua atu tangata, to ratou oraanga e oraanga ngatā e te taitaia​—e te kino katoa. Kia kite koe eaa te “ora mutu kore,” e akara i te au mea manea ta te Patireia o te Atua ka rave no tona iti tangata.