E ririnui te apiianga a te Pipiria no te akameitaki i te oraanga tangata. Akamanako ana i teia nga akaraanga: Ko Ricardo e Andres.

RICARDO: Te tae anga toku mataiti ki te 15, kua piri atu au ki tetai pupu tangata kino. Kua riro toku au oa ou ei akakeu anga pakari iaku. Inangaro au i te akapou e tai ngauru mataiti i roto i te are auri! E manako neneva te reira. Inara, i roto i to matou oire e akangateiteiia ana te au tangata mouauri. No reira, kua inangaro au kia aite mei ia ratou rai.

Kua kite au i te au mea e tupu ra i roto i te oraanga o te pupu tangata kino, te kai apinga akakona, te āinga, e te angaanga kino. I tetai po kua ō atu au ki roto i tetai pupui anga. Kua manako au e ka mate au, inara kua ora mai au. Te tupu anga te reira, kua akamanako au i toku oraanga, toku akakoroanga, e kua iki i te taui i te reira. Ka akapeea ra? Ka kimi au i te tauturu kiea?

Kare te maataanga o toku kopu tangata e mataora ana. To ratou oraanga e oraanga manamanata. Kare ra teia tu i tupu ana ki tetai tungane o toku mama. Kua kite au e e aronga meitaki tona ngutuare, e kua kite rai au e te aru ra ratou i te au kaveinga Pipiria. Na ratou i akakite mai i te ingoa o te Atua, ko Iehova. No reira i muri ake te pupuiia anga au, kua pure au kia Iehova, na te taiku anga i tona ingoa e te pati anga i tana tauturu. Poitirere tikai au, no te mea i tera mai rā, kua topapa mai tetai o te Au Kite o Iehova i toku ngutupa! Koia toku puapii Pipiria.

Kare i roa ana kua tupu te manamanata. E ringi putuputu mai ana toku au oa i mua ana iaku, pati mai ratou kia akapou au i toku taime kia ratou. E ākā manamanata teia, inara kua akakite atu au e, kare. Kua tauta au i te rave i taku apii Pipiria, e kua mataora au i te reira! Kua meitaki toku oraanga i teianei.

Maara iaku te akakite anga ki te Atua e kua inangaro au i te aere ki te are auri e tai ngauru mataiti kia akangateiteiia e te pupu tangata kino. No reira kua pati au kia akatika mai aia iaku kia tutu aere e tai ngauru mataiti ei tauturu i tetai ke. Kua pau mai te Atua i taku pure, e e 17 mataiti toku rave anga i te angaanga tutu aere! E te akakite atu nei au e, kare roa au i aere ana ki te are auri.

Inara, te maataanga o toku au oa taito, tei roto rai ratou i te are auri. Kua mate tetai pae. Me akamanako au, te akameitaki nei au i toku kopu tangata tei riro mai ei Au Kite. Kua āriki puareinga ua ratou i te taui, e kua aru i ta te Pipiria apiianga. Ka akameitaki maata au ia ratou e kare ko te pupu tangata kino. Te mea puapinga roa atu, te akameitaki nei au i te Atua no te apii mai iaku no runga i tetai oraanga meitaki rava atu.

 ANDRES: Kua anauia au e kua maata mai i roto i tetai oire putaua, e tupu ana te oraanga kai apinga akakona, te raverave apinga a tetai ke, te tā tangata, e te akaturi. E tangata kai kava e te kai cocaine toku papa. E tātā ua ana raua ko mama, ma te akakino e te takinga kino ia raua.

Mei toku meangiti anga, kua akamata au i te kai kava e te kai i te au apinga akakona. Maataanga o toku taime e noo ana au ki runga i te mataara, i te keia e te okooko i te au apinga taku i keia mai. Iaku e maata maira, kua tauta toku papa i te akavaitata mai kiaku na roto i tetai tu kino. Kua apii aia iaku e ka akapeea me apai uuna mai i te au apinga akakona me kore te au apinga i tureia ki te enua e te oko aere anga i te reira. Maata tikai taku moni i rauka mai​—e te viviki rai. I tetai rā kua aere mai te akava ki toku kainga. Kua mou au, e kua peiia ki roto i te are auri e rima mataiti no te tauta i te tamate i tetai tangata.

I tetai popongi, kua tae mai tetai akakiteanga na roto i te pu akatangi o te are auri, i te patianga i te aronga mouauri me ka inangaro ratou i te aere ki tetai uriuri anga Pipiria na te Au Kite o Iehova. Kua iki au i te aere atu ki reira. Reka tikai au i taku i akarongo, no reira kua akamata au i te apii i te Pipiria ma te Au Kite. Kare ratou i akakite ua mai i tetai tuanga o te irava, mari ra kua akaari mai ratou i ta te Atua turanga teitei.

Kua kite katoa au e kare e rauka iaku i te rave i te au taui anga me kare te tauturu, tera tikai me tae mai te au tuatua akakino a te au mouauri kare ratou e reka ana i taku e rave ra. No reira, kua pure au no te maroiroi e te pakari, e kua tauturu mai a Iehova iaku. Kare au i tuku ua atu ki ta ratou tuatua akakino, mari ra kua tuatua au ma te mataku kore ki tetai au mouauri no runga i te Pipiria.

Te tae anga ki te tuatau ka akaruke au, kua mataku tikai au kare au e inangaro i te akaruke i te are auri! Iaku e akaruke ra, maata te au mouauri tei aere mai i te tarevareva iaku. Kua tuatua aroa mai tetai pae kiaku, “Aere maru ua e te orometua.”

Mataku au i te akamanako anga e mei teaa rai te tu o toku oraanga naringa kare au i akatika i te Atua kia apii mai iaku. Mataora tikai au no to te Atua aroa e te irinaki anga e kare au i te tangata puapinga kore. a