Te Kite te ka Akavaitata ia Tatou ki te Atua
Kare Tei Anga mai ia tatou e mana ririnui ua. Mari ra e au tu manea tona. Inangaro aia kia apii tatou no runga iaia e kia akavaitata atu kiaia. (Ioane 17:3; Iakobo 4:8) No reira aia i apii ei ia tatou no runga iaia.
E Ingoa to Tei Anga Mai ia Tatou
“Kia kite ratou e, ko Iehova toou ingoa, e ko koe anake Tei Teitei i te enua katoa nei.”—SALAMO 83:18.
Kua apii mai te Pipiria e ko Iehova te Atua mou anake. Koia Tei Anga i te ao katoa e pini ua ake e te oraanga pouroa. E koia anake ua tei tau kia akamoriia.—Apokalupo 4:11.
E Atua Aroa a Iehova
“Ko te Atua oki te aroa.”—1 IOANE 4:8.
Na roto i te Pipiria e te ao natura takapini ia tatou, kua akaari mai a Iehova i tona au tu. Ko te aroa tona tu maata rava atu. Na te aroa e akakeu iaia kia rave i tetai ua atu angaanga. Te maata atu ta tatou ka apii no runga ia Iehova, ko te maata atu to tatou inangaro iaia.
Akakore a Iehova i te Ara
“Kareka koe, e Atua koe, e akakore mairai i te ara.”—NEHEMIA 9:17.
Kua kite a Iehova e tu apa ua to tatou. No reira aia i “akakore mairai i te ara.” Me tataraapa tatou kiaia e me tauta pakari kia akamutu i te rave i te kino, ka akakore mai aia i ta tatou ara e kare aia e akautunga ia tatou no ta tatou ara i rave.—Salamo 103:12, 13.
Te Pati Maira a Iehova Kia Pure Tatou Kiaia
“Te vaitata mairā Iehova i te aronga i kapiki atu iaia, . . . ka akarongo mai aia i ta ratou kapiki.”—SALAMO 145:18, 19.
Kare a Iehova e umuumu mai ia tatou kia aru i te peu akonoanga me kore kia taangaanga i tetai apinga ei akamori iaia. Ka akarongo aia ki ta tatou pure mei te nga metua aroa rai tei akarongo ki ta raua tamariki akaperepere.
