“No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate.”​—ROMA 5:12.

Na te Atua i anga i to tatou nga metua mua ko Adamu e Eva ma te kopapa e te manako apa kore. Kua oronga katoa aia i tetai kainga parataito no raua i te enua nei​—tei kapikiia e ko te kainga i Edene. Akakite aia kia raua ka rauka ia raua i te kai i te au ua rakau pouroa i roto i te kainga, e okotai ua tei tureia. Inara, kua iki a Adamu e Eva i te kai mei tera tumu rakau tei tureia e kua ara iora. (Genese 2:15-17; 3:1-19) Muri ake i to raua akarongo kore anga, kua akaatea te Atua ia raua ki vao i te kainga, e kua ngata roa atu te oroanga no raua. I muri mai, kua anau tamariki raua, e kua ngata katoa te oroanga no ta raua tamariki. Kua ruaine iora ratou katoatoa e kua mate iora. (Genese 3:23; 5:5) Ka maki tatou, ka ruaine, e ka mate no te mea e tamariki tatou na Adamu e Eva.

“Te vai ua nei rai to te ao ravarai i raro ake i taua vaerua kino ra.”​—1 IOANE 5:19.

Ko Satani taua “vaerua kino ra.” E angera aia tei akarongo kore ki te Atua. (Ioane 8:44; Apokalupo 12:9) Muri mai, kua piri te au angera ke kia Satani i te akarongo kore. Kapikiia ratou e au temoni. Ka taangaanga teia au vaerua kino i to ratou mana ei akavare i te tangata e te akaariu ke ia ratou mei Tei  Anga mai. Ka akanauru ratou i te tangata kia rave i te kino. (Salamo 106:35-38; 1 Timoteo 4:1) E mea reka na Satani e te au temoni i te akatupu i te mamae e te taitaia.

“Ko ta te tangata e ruru ra, ko tana ra ïa e kokoti.”​—GALATIA 6:7.

Tukeke te mataara e mamae ana tatou, no te ara tei iri mai ki runga ia tatou e te ao kino o Satani. Inara, tetai taime na te tangata rai i akatupu i to ratou uaorai mamae. Akapeea ra? Me rave ratou i te angaanga kino me kore te ikianga neneva, ka kokoti ratou i te kino mei te reira. I tetai tua, me rave te tangata i te ikianga meitaki, ka kokoti ratou i te meitaki. Ei akaraanga, me rave tetai tane e te metua tane i te mea tika, me angaanga pakari aia e me akaperepere i tona ngutuare, ka kokoti aia i te au akameitakianga e ka mataora tona ngutuare. Inara me pere moni aia, me inu maata i te kava, e me kope, ka putaua aia e tona ngutuare. No reira e mea meitaki kia akarongo tatou ki Tei Anga mai ia tatou. Ka inangaro aia ia tatou kia kokoti i te au meitaki e manganui, kapiti mai te “au maata.”​—Salamo 119:165.

“I taua tuatau openga ra . . . E riro te tangata nei ei akaperepere ia ratou uaorai, ei noinoi, . . . ei akarongo kore ki te metua, . . . ei mako kore, ei rotoriri, ei akavaavaa i te tangata memeitaki ra.”​—2 TIMOTEO 3:1-5.

I teia tuatau, e maata ua atu te tangata te akaari ra i te au tu mei ta te irava i totou. Riro to ratou tu ei akapapu mai e tei roto tatou i “taua tuatau openga ra” o teianei ao. Kua totou ke ana te au irava e ka akairoia to tatou tuatau e te tamaki, te onge, te ngaruerue maata e te maki mate. (Mataio 24:3, 7, 8; Luka 21:10, 11) Ka akatupu maata teia au mea i te mamae e te mate.