4 Akakoroia Ainei Tatou Kia Mamae?
Te Tumu i Puapinga Ai
Ko te pauanga ki teia uianga ka tauturu ia tatou kia kite i te tumu o te oraanga.
Kia Akamanako
Kua tau ainei e kua anga te Atua i teia enua manea e kua akatupu i te mamae kia tatou?
Manako tetai pae i te mamae e e tumu no te ekoko i to te Atua akakoroanga—e me te ora ra aia. Irinaki ratou kua tupu te mamae, te tumu (1) Kare o te Atua mana i te akakore i te reira, (2) Kare te Atua e manako mai ana i te akakore i te reira, e te (3) Kare e Atua.
Ko teia ua ainei te au tumu?
APII UA ATU
Akara i te vitio Akapeea Tatou e Papu ei e te Tika ra te Pipiria? i runga i te jw.org.
Akakite ra te Pipiria
Kare te Atua i anga ia tatou kia mamae.
Inangaro aia kia mataora tatou.
“Kare atu e meitaki i taua au mea ra, mari ra kia rekareka te tangata e kia takinga-meitaki i te ora anga nei. Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.”—KOHELETA 3:12, 13.
Oronga mai te Atua i te akamata anga meitaki no te nga tangata mua.
Kare aia i akakoro ana ia raua—e ta raua uanga—kia mamae.
“Kua tuatua maira te Atua kia raua, Kia anau korua, e kia maata roa, e e akaki i te enua nei, e e akavi.”—GENESE 1:28.
Akarongo kore te nga tangata mua i te Atua.
Tei tupu, kua akatupu raua i te mamae kia raua uaorai e ta raua uanga.
“No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”—ROMA 5:12. *
Kare te Atua i anga ia tatou kia kore e aru i tana aratakianga.
Mei te tangata kare e rauka i te akaea i roto i te vai, kare katoa e rauka i te tangata i te tutara iaia uaorai.
“Kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.”—IEREMIA 10:23.
Kare te Atua e inangaro ia tatou kia mamae.
Inangaro aia ia tatou kia kopae i te au manamanata, i te ngai ka rauka.
“Angairi koe i akarongo mai ki te au akauenga naku! kua riro ïa toou au mei te vai taʼe ra.”—ISAIA 48:18.
^ para. 17 Roto i te Pipiria, te kupu “ara” te taiku ra i te au angaanga tarevake e te turanga o te tangata—tei ara.