Maata te tangata tei kopae i te Atua no te mea kua akaapa ratou iaia no te mamae.

Apii te au arataki akonoanga e kua akatupu te Atua i te mamae kia tatou. Ei akaraanga, karanga ratou:

• E utunga na te Atua te tumatetenga natura.

• Mate te tamariki no te mea kua inangaro te Atua ia ratou ei angera i te rangi.

• E tauturu ana te Atua i te tamaki—te tumu i maata ai te mamae.

Kare ainei kua pikikaa te au arataki akonoanga i te apii no runga i te Atua? Penei kua kopae te Atua ia ratou?

Kare te Atua e akatupu ana i to tatou mamae.

Me koia ïa, kare te reira i rotai ki tona au tu i roto i te Pipiria. Ei akaraanga:

“Tika rava [ta te Atua] angaanga . . . e tuatua-tika tana, e te tiratiratu!”—DEUTERONOMI 32:4.

“Kia atea ke atu te tuatua kino i te Atua; e te ara i te Mana katoatoa.”—IOBU 34:10.

“Kare oki te Mana katoatoa e taruri ke i te tuatua-tau.”—IOBU 34:12.

Patoi te Atua i te akonoanga te pikikaa ra iaia.

Kapiti mai te au akonoanga e apii ra na te Atua e akatupu ana i te mamae, e tei piri atura ki te tamaki e te tā ua.

“E pikikaa ta te au peroveta i totou i [to te Atua] nei ingoa: kare au i tono ia ratou, e kare i akaue atu ia ratou, e kare rai au i karanga ua atu kia ratou: e orama pikikaa, . . . e te pikikaa o to ratou uaorai ngakau, ko ta ratou ïa i totou mai ia kotou.”—IEREMIA 14:14.

Akaapa a Iesu i te au apiianga pikikaa.

“Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra. E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.”—MATAIO 7:21-23.