Kare e tau ana me tupu te mamae ki te aronga meitaki. E kare i reira e puapinga me rave tetai i te meitaki.

Irinaki tetai pae me mate tetai tangata ka anau akaouia aia. Karanga ratou no te aronga rave i te meitaki, ka anau akaouia ratou ma te oraanga meitaki, kareka ra te aronga rave kino ka anau akaouia ratou ma te oraanga mamae. Kia tau ki teia irinakianga, ka tupu rai te mamae ki te tangata meitaki me rave aia i te angaanga kino i roto i tona “oraanga i mua ana.” Inara . . .

• Eaa te akakoroanga me mamae tetai, mei te mea ka anau akaouia aia kare e maaraia tona oraanga i mua ana?

• Eaa te tumu ka tauta pakari tatou kia matutu te oraanga e kia kopae i te tumatetenga, me ka akautungaia tatou no te au mea i rave ana tatou i mua ana?

  APII UA ATU

  Akara i te vitio Eaa ra te Atua i Akatika ai i te Mamae Kia Tupu? i runga i te jw.org.

Kare te mamae i te utunga na te Atua.

Tupu te reira i te tuatau manako koreia—maata anga o te taime ka tupu i te ngai e te ora tarevake.

“Kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteia mai; e tuatau ra, e te manuia ua, to te tangata katoa ra.”—KOHELETA 9:11.

Akatupu te tu apa ua i te mamae kia tatou.

Taiku ana te tangata i te tuatua “ara” ki te angaanga kino ta tetai tangata i rave. Inara i roto i te Pipiria, te taiku ra kua anauia te tangata ma te ara—tu meitaki e te kino.

“I na, i anau mai au ma te ara! e i toia au e taku metua vaine ma te kino.”—SALAMO 51:5.

Akatupu te ara i te kino ki te tangata.

Takino te reira i to tatou pirianga ki Tei Anga ia tatou e kua akatakake ia tatou mei te au mea angaia a te Atua. I tupu mai ei te mamae ki te tangata katoatoa.

“Kia anoano au i te rave i te mea meitaki ra, te vaitata ua nei te kino iaku i reira.”—ROMA 7:21.

“Te ngunguru anake nei te au mea katoa i angaia mei te mamae anau ra e tae rava akenei i teianei rā.”—ROMA 8:22.