I taua taime rai, kua kiteaia mai e tetai pae e me akapou maata te au mapu i to ratou taime i runga i te Initaneti, ka akamata ratou i te . . .

• akarakara ua i ta ratou apinga apaipai.

• tuatua kino ki tetai ke.

• akarakara i te au tutu viivii noatu me kare ratou e inangaro i te akara i te reira.

AKARAKARA UA

Tetai au angaanga e te apinga kangakanga i runga i te Initaneti, kua akanoonooia kia kore koe e akamutu i te taangaanga i te reira. “Kua maaniia te au app i runga i ta tatou tereponi kia akarakara ua tatou i ta tatou tereponi,” karanga ai te puka Reclaiming Conversation. Te roa atu ia tatou i te akara i te au app, te maata atu te moni a te aronga na ratou te reira app.

AKAMANAKO ANA: Pou ua ainei te taime o taau tamariki ki runga i ta ratou apinga apaipai? Akapeea koe me tauturu ia ratou i te akapou meitaki i to ratou taime?—EPHESIA 5:15, 16.

TUATUA KINO

I runga i te Initaneti, e kino tikai te tu o te tangata me pukapuka e me tuku karere ki tetai ke—te ka taki atu ki te tu rave kino.

Te akaari maira te tu tau kore o teia aronga e ka inangaro ratou kia akaraia e kia inangaroia mai e te tangata. Me kore, me kite mai tetai e kare aia i kapitiia ana—ei akaraanga, kare aia i patiia ki tetai tamataoraanga—penei ka manako aia e te rave kinoia ra aia.

AKAMANAKO ANA: E tuatua kino ana taau tamariki i runga i te Initaneti? (Ephesia 4:31) Ka kinokino ainei to ratou manako me kare ratou i kapitiia atu ana?

TUTU VIIVII

Māmā ua i te akarakara i te au mea viivii i runga i te Initaneti. Penei ka akaaere te au metua i te au mea ka akarakara te tamariki, inara i tetai taime kare teia e angaanga ana e ka kite rai te tamariki i te mea kino.

Te sexting—te tuku e te akarakara i te au tutu tau kore i runga i te tereponi apaipai—te aati ra i te ture. I tetai au atianga, ka akautungaia te au mapu no te tuku e te akarakara i te au tutu viivii o te tamariki me kore te au tutu tau kore no tetai au mapu ke.

AKAMANAKO ANA: Akapeea koe me tauturu i taau tamariki kia patoi i te timataanga i te akara me kore i te tuku i te au tutu tau kore no te ainga i runga i te Initaneti?—EPHESIA 5:3, 4.

TERENI I TAAU TAMARIKI

Noatu e māmā ua no te tamariki i te taangaanga i te au apinga apaipai, ka inangaro tauturu rai ratou. Karanga ra tetai puka e e mea kino tikai i te akatika i te tamariki kia taangaanga i te Initaneti me kare ratou i tereniia akapeea me taangaanga meitaki i te reira.

Iki i te au manako taau ka inangaro i te rave, me kore tata i toou uaorai manako.

• Akakite ki taku tamaiti auraka e tuatua kino i runga i te Initaneti

• Tauturu i taku tamaiti kia kore e manako kinokino me kare aia i kapitiia atu

• Paruru i taku tamaiti kia kore e kite i te au mea kino i runga i te Initaneti

• I tetai au taime, e akara eaa te au mea i runga i tana tereponi

• Iki eaa te roa ka akatika koe i taau tamaiti kia akara i tana tereponi i te au rā katoatoa

• Eiaa e akatika i te tereponi i roto i te pia moe o taau tamaiti i te po

• Eiaa e akatika i te apinga apaipai i te tuatau kai manga