Eaa ta te Apinga Apaipai ka Akatupu ki Toou Akaipoipo?
Me taangaanga meitakiia te apinga apaipai, ka akaketaketa te reira i te pirianga i rotopu i te tane e te vaine. Ei akaraanga, ka tauturu te reira i te nga tokorua kia pukapuka ki tetai e tetai i te au rā.
Inara, me taangaanga tau kore te au tokorua i te apinga apaipai, ka tupu teia au manamanata:
-
kare o raua taime no tetai e tetai.
-
ka akaoki mai i ta raua angaanga ki te kainga.
-
ka akatupu i te tu irinaki kore e te tiratiratu kore.
TAAU KA ANOANOIA KIA KITE
ME NOO KAPITI
Karanga tetai tane ko Michael: “Ia maua ko taku vaine e noonoo kapiti ra, tetai taime kare aia e akarongo mai kiaku. Te akarakara ra aia i tana tereponi e ka karanga mai, ‘I teia taime ua i akara ai au i taku tereponi.’” Karanga tetai tane ko Jonathan e me tupu te reira, “te noonoo ra te nga tokorua e kare raua e piri vaitata ana.”
AKAMANAKO ANA: Ka tuatua putuputu ainei au i runga i taku tereponi me kore te tuku karere ki tetai ke e kare e tuatua atu ki toku tokorua?—EPHESIA 5:33.
ANGAANGA
No te angaanga, ka anoanoia tetai pae kia pau i te tereponi me kore te au imere noatu tei te kainga ratou. Ko tetai pae ra, e ngata ia ratou i te akaruke i ta ratou angaanga me akamutu te reira. “E ngata i te akaruke i taku tereponi me tangi mai e me tuku karere mai te angaanga i te tuatau taku i akanoo no taku vaine,” i na tetai tane ko Lee. Karanga tetai vaine ko Joy: “No te mea e angaanga ana au i te kainga, e ngata iaku i te akaruke i taku angaanga. Ka anoanoia te tauta pakari kia akanoo meitaki i te taime no te angaanga.”
AKAMANAKO ANA: Ka akarongo meitaki ainei koe ki toou tokorua me tuatua mai aia kia koe?—LUKA 8:18.
TIRATIRATU
Karanga te manganui e taumāro ana ratou e to ratou tokorua no te mea, tarotokaka tetai i ta tetai i tuku ki runga i te social media. Karanga ra tetai pae e ka uuna ratou i ta ratou i tuku ki runga i te Initaneti kia kore to ratou tokorua e kite atu.
Irinaki tetai aronga e ka riro te social media ei mea kino tikai no te aronga akaipoipo, e māmā ua i te tangata i te rave i te akaturi. Kare i te mea poitirere e te karanga ra te au roia akaipoipo e na te social media i akatupu maata i te tatara anga akaipoipo.
AKAMANAKO ANA: Ka uuna ainei koe i taau pukapukaanga ki tetai tane me kore vaine mei toou tokorua?—MASELI 4:23.
TAAU KA RAVE
AKANOO I TE MEA PUAPINGA
Me kare tetai tangata e kaikai, kare aia e matutu. Pera katoa, me kare tetai e akapou i te taime ki tona tokorua, kare e matutu to raua pirianga akaipoipo e ka tupu te manamanata.—Ephesia 5:28, 29.
KAVEINGA PIPIRIA: “Kia timata oki kotou i te au mea e maata ua atu te meitaki.”—PHILIPI 1:10.
Iki i te au manako taau ka inangaro i te rave, me kore tata i toou uaorai manako kia kore te apinga apaipai e tamanata i toou akaipoipo.
-
E kaikai kapiti e tai taime i te au rā ravarai
-
Akanoo i tetai tuatau kia tamate i ta maua apinga apaipai
-
Parani i tetai taime kia noo kapiti e kia rave i tetai mea e reka ana maua
-
Tamate i ta maua apinga apaipai i te po, eiaa e taporo i te reira i te ngai moe anga
-
Akapou e 15 miniti i te au rā no te pukapuka ki tetai e tetai e kia tamate i ta maua apinga apaipai
-
Tamate i te Initaneti i te ora tei akanooia
Ka Reka Katoa Koe i Teia
ORAANGA AKAIPOIPO & NGUTUARE
Akapeea me Akaruke i te Apinga Apaipai i Tona Ngai
Ko te taangaanga i te au apinga apaipai, ka akameitaki me kore ka akaparuparu i toou oraanga akaipoipo. Eaa ta te reira e akatupu ra ki toou oraanga akaipoipo?
ORAANGA AKAIPOIPO & NGUTUARE
Akaruke i te Angaanga “ki te Angaanga”
E rima tauturu kia kore te angaanga e tamanata i toou oraanga akaipoipo.
