E tu papakitai to te tangata ki te aronga enua ke, te katiri, te kopu, te reo, te akonoanga tukeke, te tane e te vaine e te turanga. Ka akava tetai pae i te mataiti o tetai, te apii, te au tu maki, e te turanga o te kopapa e te manako ra rai e kare o ratou tu papakitai.

Kua tuia ainei koe e teia tu papakitai? Ka kite ua tatou i te tu papakitai o tetai ke, kare ra tatou e kite ana i te reira ia tatou uaorai. Te tika, kua tupu teia tu papakitai kia tatou katoatoa. Me akara tau kore tetai pae i tetai pupu e kua aravei atu i tetai o te reira pupu, i karanga ai te tangata kite ko David Williams, “ka tuke to ratou tu ki te reira tangata e kare ratou i kite e kua rave ratou i te reira.”

Ei akaraanga, i te enua Balkan e noo ana a Jovica, te noo ra tetai manga pupu tangata ki reira. “Manako au kare e tangata meitaki i roto i te reira pupu,” i nana ai. “Kare au i kite ana e e tu papakitai toku. ‘Mei te mea e,’ irinaki au, ‘e tika te reira.’”

E tuku ana te au kavamani i te ture no te patoi i te tu iriiri tangata e te au tu papakitai. Inara, kua tupu ua atu te reira. Eaa ra? No te mea te arai ua ra te reira i te angaanga a te reira tangata. Kare te ture e akatere ana i te manako e te manako ngakau o tetai tangata. Ka akamata te tu papakitai i roto i te manako e te ngakau. Ka kore ainei te tu papakitai? E rapakau ainei tetai no te tu papakitai?