E mirioni ua atu tangata tei taangaanga i te kaveinga tei taikuia i te au atikara i mua akenei e kua kiriti tumu i te tu papakitai mei to ratou ngakau. Kare e rauka ia tatou anake i te akakore takiri i te tu papakitai. Ka kore takiri ainei te tu papakitai?

Puapinga kore te au kavamani a te tangata kia taui i te tu papakitai o te tangata. E kavamani ainei tetai te ka akakore i te tu papakitai?

Te kavamani te ka rapakau i te tu papakitai, ka anoanoia te reira kia

1. 1. Akakeu i te tangata kia taui i to ratou manako i tetai ke.

2. 2. Rapakau i te au mamae i ngata ei te akono atu i tetai ke.

3. 3. Rauka te au arataki tiratiratu te ka akaperepere i te tangata.

4. 4. Taokotai i te iti tangata katoatoa.

Te akapapu maira te Pipiria e kua akanoo te Atua i teia kavamani. Kapikiia te reira ko “te Basileia o te Atua.”—Luka 4:43.

Akamanako ana i ta teia kavamani ka oronga mai.

“Te apii ra to te ao nei i te tuatua-tika.”—ISAIA 26:9.

“E ko ta te tuatua-tika angaanga, ko te au ïa; e te openga o te tuatua-tika ra, ko te pekapeka kore ïa, e te mataku kore, e tuatau ua atu.”—ISAIA 32:17.

Eaa te aiteanga i teia? Ka apii te Patireia o te Atua i te apiianga tika. Me kite te tangata i te apiianga tika mei te tarevake—te tu tika mei te tika kore—ka taui to ratou tu no tetai ke. Ka kite te katoatoa i te akaperepere i te au tu tangata ravarai.

Na te Atua “e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—APOKALUPO 21:4.

Eaa te aiteanga i teia? Ka takore te Patireia o te Atua i te mamae tei akatupuia e te tu tika kore. Pouroa te aronga tei takinokinoia, kare ratou e makitakita akaou.

“Kare aia e akava ua i ta ona mata i akara ra, kare katoa e akatika ua i ta ona taringa i akarongo ra: i te tuatua-tika ra ka akava mai ei aia i te aronga ao ra, e akatika oki aia ma te tuatua-tau, no te aronga maru o te enua nei.”—ISAIA 11:3, 4.

Eaa te aiteanga i teia? Ka tutara a Iesu Karaiti, te Ariki o te Patireia o te Atua i te rangi, ma te aroa e te papakitai kore i te enua nei. Kare a Iesu e piripiri ana ki tetai enua e ka akapapu aia ka akonoia tana au ture tika e te tangata i te ao katoa.

Ka apii te Patireia o te Atua i te tangata e “te tavaitai anga i to [ratou] manako, ma te inangaro okotai, ma te kapitianga o to [ratou] ngakau, i te akono anga i te tuatua okotai.”—PHILIPI 2:2.

Eaa te aiteanga i teia? Ka taokotai te iti tangata o te Patireia o te Atua. “Ma te inangaro okotai,” ka akaperepere tikai ratou i tetai e tetai.