Ka akatupu te nengonengo i te tu papakitai. E tu akatietie to te tangata nengonengo. Ka akateitei aia iaia uaorai e ka akava i te tangata tukeke ei aronga rikiriki. Ka tupu teia ki tetai ua atu. Karanga te Encyclopædia Britannica e: “Manako te maataanga o te au pupu [iti tangata] e—e meitaki atu to ratou oraanga, te kai, kakau, peu, irinakianga, puapinga, e te vai atura, i to tetai pupu ke.” Akapeea tatou me kopae i teia manako tarevake?

“Ei ngakau akaaka ra, i te manako akameitaki atu tetai ki tetai.”—PHILIPI 2:3.

Eaa te apiianga? Ei kopae i te tu ngakau parau, ka anoanoia tatou—kia akaaka. Ka akatupu te akaaka ia tatou kia āriki e e meitaki atu tetai pae ia tatou. Kare okotai pupu e meitaki atu e te karape atu i tetai.

Akamanako ana i te akaraanga o Stefan. Kua maata mai aia i te enua Communist, inara kua akaruke aia i tona tu akavaavaa i te tangata mei te au enua kare i te Communist.  Karanga aia: “Irinaki au e me e meitaki atu tetai ke iaku, e mea puapinga te reira no te akakore i te tu papakitai. Kare au i kite i te au mea ravarai. Ka rauka te apii anga mei tetai ua atu tangata.”

Akamanako meitaki ia koe uaorai e kia matakite i toou uaorai tarevake. Āriki e karape atu tetai ia koe i te au ngai te paruparu ra koe. Eiaa e manako e aiteite te au tarevake o tetai pupu.

Eiaa e manako tau kore i te tangata o tetai pupu, e ui kia koe uaorai:

• ‘E au tu kino ainei to te tangata kare au e reka ana, me e tu tuke ua te reira?’

• ‘Kite maira ainei te reira tangata i toku tarevake?’

• ‘Eaa te au ngai e karape atu teia tangata iaku?’

Me pau tika koe i teia au uianga, ka akakore koe i te tu papakitai e ka kite koe i te au tu meitaki o te reira tangata.