No te tuatua pikikaa i tupu ei te tu papakitai. Akamanako ana i teia au akaraanga:

• Irinaki tarevake tetai au ona pitiniti e kare te vaine e kite ana i te angaanga taieni, matini e te komupiuta.

• I Europa taito, akaapa tarevakeia te ngati Iuda no te poitini i te au punavai e te akatotoa i te maki. Raro i te akaaerenga Nazi, kua akakino akaouia te ngati Iuda. Kua akaapaia ratou no te akatupu i te manamanata pae moni i Tiamani. Kua takinokinoia e kua tupu te tu papakitai kino ki te ngati Iuda, e te vaira teia tu i teia rā.

• Manako tarevake te maataanga o te tangata e e maromaroa e e riririri ana te aronga makimaki.

Te aronga tei irinaki i teia au tua tarevake, penei ka akakite ratou i te au akaraanga ei akapapu i to ratou tu papakitai. E me patoiia to ratou manako, karanga ratou e e kite kore te reira aronga.

“Kare oki te mea meitaki kia kore te vaerua e kite.”—MASELI 19:2.

Eaa te apiianga? Me kare tatou i kite i te tika, ka rave tatou i te au ikianga kino. Me irinaki tatou i te au tua tarevake, ka akava tarevake tatou i te tangata.

Me kite tatou i te tika no tetai pupu tangata, kare tatou e irinaki ua i te manako pikikaa no  runga ia ratou. Me kare te tika i akakiteia no runga i tetai pupu, kare tatou e irinaki ua atu i te reira au manako tarevake.

• Akamaara kare te au tu tau kore o tetai e aiteite ana ki te katoa anga o te reira pupu.

• Akamaara penei kare koe i kite tikai i te tu o tetai tangata.

• E kimi i te tika papu e te irinakiia.