Na te Atua ainei i anga i te ao rangi e pini ua ake e te au mea ora me e mea tupu ua mai te reira? Tuke te pauanga a te nga physicist i runga ake nei e te au tuatua akamataanga a te Pipiria. E maata te tangata tei irinaki i teia nga pauanga. Inara, e maata te tangata kare i papu. Te taumāroia ra teia i roto i te au puka oko maata e te au ngai taumāro anga i te ngai tangata.

Penei kua akakite atu toou au puapii i te apii e kare te ao rangi e pini ua ake e te au mea ora, i angaia e Tei Anga mari ra e mea tupu ua te reira. Inara kua oronga atu ainei te au puapii i te au tika e kare Tei Anga e ora ra? Penei kua rongo koe i te au arataki akonoanga te akakite anga e te ora ra Tei Anga. Inara kua oronga atu ainei ratou i te au tika papu ei turu i te reira? Me kua karanga atu ainei ratou kia āriki koe i te reira ma te “akarongo”?

Kare e ekoko, kua manako koe i teia uianga e kare e rauka i tetai ua atu i te karanga e te ora ra Tei Anga. Penei e uianga ke atu taau: E puapinga ainei kia rauka te pauanga?

Ka na mua teia makatini E Ara! i te oronga atu i te au tika tei akakeu i te tangata e manganui kia irinaki i Tei Anga. E oti ka uriuri te reira eaa i puapinga ai te pauanga no runga i te akamata anga o te au mea ora.