E Puapinga Kia Kite Tatou i te Pauanga
Eaa i puapinga ai kia kite tatou e te ora ra Tei Anga? Me akaari mai te au akapapuanga e te ora ra te Atua mana katoatoa, ka inangaro i reira koe i te kimikimi i teia akapapuanga e nana i tata i te Pipiria. Me irinaki koe i ta te Pipiria e karanga ra, ka puapingaia koe i roto i teia au turanga.
Ka rauka te oraanga puapinga
KARANGA TE PIPIRIA: “[Ko te Atua tei] takinga-meitaki mai, i te oronga anga mai i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.”—Angaanga 14:17.
EAA TE AITEANGA: Te au mea natura taau e mataora nei, e apinga aroa ïa no ko mai i Tei Anga ia tatou. Ka akaperepere maata koe i teia apinga aroa me kite koe e te akaperepere maira Tei Oronga mai ia koe.
Ka rauka te aratakianga tau no te au rā
KARANGA TE PIPIRIA: “Ei reira koe e kite ei i te tuatua-tika e te tuatua-tau, e te tiratiratu; te au mataara memeitaki katoa ra.”—Maseli 2:9.
EAA TE AITEANGA: Kua kite te Atua, Tei Anga ia koe i taau e anoano ra kia mataora koe. Na te akara matatio anga i te Pipiria, ka kite mai koe i te au apiianga te ka akapuapinga ia koe.
Ka rauka te pauanga ki taau uianga
KARANGA TE PIPIRIA: “Ei reira koe e kite ei i te mataku ia Iehova, e e rauka ia koe te kite i te Atua.”—Maseli 2:5.
EAA TE AITEANGA: Te kiteanga e te ora ra Tei Anga, ka tauturu ia koe kia kitea te pauanga ki te au uianga puapinga maata: Eaa te akakoroanga no te oraanga? Eaa ra i maata ai te mamae? Eaa te ka tupu me mate tatou? Ka kitea taau au pauanga pumaana i roto i te Pipiria.
Ka rauka te manakonakoanga meitaki
KARANGA TE PIPIRIA: “Kua kite oki au i te au akakoro anga taku i akakoro ia kotou nei, te tuatua mairā Iehova, e akakoro anga au ïa, kare to te kino, kia oronga atu au ia kotou i te openga ta kotou i manako ra.”—Ieremia 29:11.
EAA TE AITEANGA: Kua taputou mai te Atua kia takore i te kino, te mamae, e te mate a te tuatau ki mua. Me irinaki koe i ta te Atua au taputou, ka riro toou manakonakoanga no te tuatau ki mua kia ngakau toa koe e kia akakoromaki i te au manamanata.