Eaa Tei Tupu ki te Akangateitei i te Oraanga?

AKATANGI

TE TUMU I PUAPINGA AI KIA AKANGATEITEI I TE ORAANGA

Me rave koe i te au angaanga te ka takino i toou oraanga kopapa e to etai ke, te akaari maira te reira e kare koe e akaperepere ana i toou oraanga e to tetai ke.

Ka akatupu te kai avaava i te maki cancer e ka ngatā i toou kopapa i te paruru ia koe mei te maki. Te maataanga o te maki cancer o te atemāmā, ka tupu te reira na roto i te kai avaava e pera te akaea anga i te reira.
Ko te pupui anga i te ngai tangata, ka akatupu i te taitaia maata i te au mataiti ravarai. Akakite te Stanford University e: “Kua akaari mai te kimikimianga, ko te aronga tei ora mai mei te pupui anga i te apii, kua akatupu i te maki manako e te taitaia maata no tetai tuatau roa.”
Ko te aronga e akaoro ra ma te konā kava me kore te kai apinga akakona, ka akatupu ratou i te kino ki tetai ke i runga i te mataara e te aronga e aaere ra. Me kare te tangata e akangateitei i to ratou oraanga, ka takinoia te aronga meitaki ua.

TAAU KA RAVE

Paruru i toou oraanga kopapa. E mea meitaki i te akamutu i te au peu mei te kai avaava, vaping, te konā kava e te kai apinga akakona. Ka takino teia au peu i toou oraanga e to tetai ke, e pera toou pamiri.

“E tamā ua tatou ia tatou uaorai i te au viivii katoa o te kopapa.”—2 Korinetia 7:1.

Paruru ia koe e tetai ke mei te kino. E akaatea i te au mea te ka akatupu i te tumatetenga i toou ngutuare. E akaoro meitaki e te akono i te apinga akaoro. Auraka e akatika i tetai ke kia māro ia koe no te rave i te au angaanga te ka akatupu i te kino e te mate.

“Kia patu koe i te are ou ra, ei paruru taau e anga no rungao, ko te taka mai aea tetai tangata ki raro, ko te viivii aea to are ia koe i te toto.”—Deuteronomi 22:8. a

Kia takinga meitaki i tetai ke. Ko te akangateitei i te oraanga, te kapiti maira te tu takinga meitaki no te au tangata e tuke to ratou enua, au peu e to ratou turanga. Ka akatupu te tu papakitai e te makitakita i te takinokino anga e te tamaki takapini i teianei ao.

“Kia kopae ravaia oki te maru kore, e te rotoriri, e te makitakita, e te taumāro ra, e te tuatua akakino, e te vareae, auraka takiri ïa: Kia takinga-meitaki kotou ia kotou uaorai.”—Ephesia 4:31, 32.

TA MATOU E RAVE NEI

Te apii nei te Au Kite o Iehova i tetai ke kia akono i to ratou oraanga kopapa. Kua tauturu ta matou apii Pipiria i te tangata kia akamutu i te au peu te ka takino i to ratou oraanga kopapa.

Ka aru matou i te aratakianga no te paruru i te tangata i roto i te angaanga pātu are. Ko te aronga angaanga e tauturu ra i te pātu anga i te au are akamorianga, ka tereniia ratou kia kopae i te au tumatetenga. Ka aru to matou au ngai akamorianga i te ture paruruanga o te reira ngai.

Ka tauturu matou i te au tangata tei rokoia e te tumatetenga. I roto i te okotai mataiti, kua tauturu atu matou e 200 au tumatetenga takapini i teianei ao e kua pou e 12 mirioni tara no te moni oronga ei tauturu i te aronga tei rokoia e te tumatetenga.

Te totoa anga te maki Ebola i te au enua i West Africa (2014) e te Democratic Republic of Congo (2018), kua akakite matou ki te au tangata akapeea me paruru ia ratou mei teia maki kino. Kua tono matou i te au taeake ei akakitekite ki te tangata i teia tumu manako “Me Akarongo, Ka Akaoraia Toou Oraanga.” Kua akanoo matou i tetai ngai tamā rima me tomo ki roto i te ngai akamorianga. Kua akamatakite katoa matou i te puapinga no te tamā meitaki i te rima e kia paruru ia ratou mei teia maki.

I Sierra Leone, kua akameitaki te vaa tuatua i runga i te ratio i te Au Kite o Iehova no te tauturu i to ratou iti tangata e tetai ke i roto i te oire kia paruru ia ratou mei te maki kino Ebola.

Ngai tamā anga rima i vao i te Are Uipaanga Patireia no te maki Ebola i Liberia i te 2014

a I Iseraela i taito, kua akaari teia ture i te puapinga no te paruru i te oraanga o te ngutuare tangata e tetai ke.

E ARA!