Eaa Tei Tupu ki te Akangateitei no Tetai Ke?
TE TUMU I PUAPINGA AI KIA AKANGATEITEI I TETAI KE
Me akangateitei tatou i tetai ke, ka akakore te reira i te riri e ka marū mai te turanga.
-
Karanga te Pipiria: “Ko te tuatua maru ra tei akaanga ke i te riri: kareka te tuatua akakoko ra, ko te riri ïa te tupu.” (Maseli 15:1) Ka akatupu te au tuatua e te tu akangateitei kore i te manamanata te ka taki atu ki te tumatetenga.
-
Karanga a Iesu: “No te ki oki o te ngakau ra e tuatua’i te vaa.” (Mataio 12:34) Ka akaari te au tuatua akangateitei kore i to tatou tu tikai. Ka akaari mai te reira e te akavaavaa ra tatou i te aronga e tuke to ratou enua e to ratou turanga mei to tatou.
I roto i tetai kimikimianga, e 32,000 tangata i te 28 enua, e 65 patene tei karanga e kua kino roa atu te tu akangateitei kore i teia tuatau.
TAAU KA RAVE
I te apii me kore i te ngai angaanga, e akangateitei i te tangata ravarai, noatu e tuke to ratou manako. E kimi i te au manako ka āriki korua. Ka tauturu teia ia koe kia kore e akaapa e te akava atu iaia.
E akono meitaki i tetai ke. Me akaari koe i te tu takinga meitaki e te marū ki tetai ke, ka akono meitaki mai ratou ia koe.
E akakore i te ara. Auraka e riri me akakino mai e me rave tetai i te kino kia koe.
TA MATOU E RAVE NEI
I te au ngai e noo ana te Au Kite o Iehova, ka akangateitei ratou i tetai e tetai.
Ka apii matou i te Pipiria ki te katoatoa e kare e tutaki kare ra matou e māro i tetai ke kia āriki i to matou irinakianga. Mari ra, ka tauta matou i te aru i te akoanga Pipiria kia akakite i ta matou karere “ma te maru e te kauraro marie.”—1 Petero 3:15; 2 Timoteo 2:24.
Kare matou e akavaavaa i te au tu tangata ka āriki ua matou i te katoatoa tei inangaro i te apii i te Pipiria i ko i ta matou au uipaanga. Ka tauta matou i te akaari i te tu akakoromaki e te “akangateitei atu i te tangata ravarai.”—1 Petero 2:17.
Ka kauraro matou i te au kavamani i te au enua e noo ra matou. (Roma 13:1) Ka akono matou i te au ture o te enua e ka tutaki i te tero. E noatu kare matou e piri ki roto i te angaanga poritiki, ka akangateitei ra matou i te tikaanga o tetai ke kia rave i ta ratou uaorai ikianga no te angaanga poritiki.
