AU MAPU
12: Akakoroanga
EAA TE AITEANGA
Ko te akakoroanga, kare te reira i aite ki tetai moemoea—ka inangaro koe kia tupu. Mari ra te kapiti maira te au akanoonoo anga, akatanotano me kore tauiui anga e te angaanga pakari.
Ka rauka ia koe i te akanoo i tetai au akakoroanga no te tuatau poto me kore no te tuatau roa. Kia itae atu koe ki te au akakoroanga o te tuatau roa, e rave i te au akakoroanga rikiriki.
EAA I PUAPINGA AI
Me taeria e koe taau akakoroanga, ka tupu te tu irinaki papu, ka akaketaketaia toou pirianga oa, e ka maata atu toou mataora.
Toou tu irinaki papu: Me akanoo koe i te au akakoroanga rikiriki e me taeria e koe, ka tupu te tu irinaki papu e ka rauka ia koe i te rave i te au akakoroanga ngatā. Kare katoa koe e mataku me tupu te au manamanata—me māro mai toou oa ia koe kia rave i te kino.
Pirianga oa: E mataora ana te tangata i te piri atu ki te aronga e akakoroanga ta ratou—kua kite ratou i ta ratou e inangaro ra, e ka rave i te reira. Ko tetai ravenga puapinga ei akaketaketa i toou pirianga oa, e angaanga kapiti ki tetai tangata tei aiteite ta korua akakoroanga.
Te mataora: Me taeria taau akakoroanga i akanoo, ka kite rai koe i te mataora.
“Mataora tikai au i taku au akakoroanga. No te mea e maata taku angaanga ka rave kia itae i te reira. E me taeria taau akakoroanga, ka akamanako akaou koe i te reira e ka karanga koe, ‘Ae, aue te reka e! Kua rave au i taku i akanoo.’”—Christopher.
KAVEINGA PIPIRIA: “Ko tei tiaki i te matangi ra, kare aia e ruru i te ua; e ko tei akara i te tumurangi ra, kare aia e kokoti.”—Koheleta 11:4.
TAAU KA RAVE
Au tauturu kia akanoo e kia taeria taau akakoroanga.
Akataka i te reira. E tata i te au akakoroanga taau ka inangaro kia rave—e iki i te mea mua, te rua, te toru e tae ua atu ki te openga.
Parani. E taangaanga i teia, me iki koe i taau akakoroanga:
-
Akanoo i tetai tuatau tau.
-
Parani eaa taau ka rave.
-
Akamanako i te au arairaianga te ka tupu, e akapeea koe e autu ei i te reira.
Rave. Eiaa e tiaki kia kite pouroa koe te au apinga no runga i taau akakoroanga. E ui kia koe uaorai, ‘Eaa taku ka rave na mua kia taeria taku akakoroanga?’ E oti, e rave i te reira. A muri ake, e akara me te tere ra toou akakoroanga ki mua.
KAVEINGA PIPIRIA: “Te kimianga o te aronga maroiroi ra, tei runga ïa i te apinga maata.”—Maseli 21:5.
Ka Reka Katoa Koe i Teia
TA TOOU AU OA I KARANGA
Te Oraanga Meitaki Rava Atu
Ka inangaro koe te oraanga mataora? Akarongo akapeea i rauka ai ia Cameron te oraanga mataora i tetai enua ke.
