Me kimi koe i te tauturu no te akakoromaki i te mii, mea papu e tumatatini ua atu te au manako taau ka kite mai​—tetai pae ka riro ei tauturu e tetai pae kare e tauturu. Penei te tumu i pera ai, no tei taikuia i mua atu ana, e tukeke te tu e mii ra te katoatoa. Penei ka riro tetai ravenga ei akapumaana i tetai tangata, kare ra te reira e tauturu i tetai tangata ke.

Noatu ra, te vai ra tetai au ravenga taka meitaki tei tauturu i te manganui kia akakoromaki. Kua taiku putuputu te aronga oronga akapumaana i te reira e te akaata katoa ra i te au kaveinga tinamou tei kiteaia i roto i tetai puka taito tei kī i te pakari, ko te Pipiria.

• Karanga tetai aronga kite e ko teia te ravenga meitaki roa atu no te akakoromaki i te mii. Inara i tetai taime, penei ka inangaro koe kia noo ko koe anake ua. Penei ka ‘iu koe i te aronga e inangaro ra i te tauturu ia koe. Mea mātau ua teia.

• Eiaa e manako e ka anoanoia koe kia kapiti atu ki te tangata i te au taime ravarai, inara eiaa katoa e kopae takiri ia ratou. Tetai tumu, penei ka anoano koe i ta ratou tauturu a te tuatau ki mua. E akakite maru i taau e anoano ra e kare e anoano ra no tera taime.

• Kia tau ki toou turanga, akanoo meitaki i tetai tuatau no te kapiti atu ki etai ke e tetai taime noou uaorai.

KAVEINGA: “E meitaki nga tangata toko rua i te takitai; no te mea . . . kia inga oki tetai ra, na te tokorua e rave e akatu ki runga.”​—Koheleta 4:​9, 10.

• Me kai koe i te kai memeitaki, ka tauturu ia koe kia akakoromaki i te taitaia no te mii. Tauta kia kai i te kai raurau, te ua rakau tukeke e te au kai kare e maata te matu.

• Inu maata i te vai.

• Me kare koe e kakī ana i te kai, ei manga katikati ua e kia putuputu te reira. Penei ka ui koe ki toou taote no runga i te kai tukeke. *

• Me aaere e me rave i te angaanga akaetaeta uaua, ka riro ei akaiti i te manako taitaia. Penei ka riro katoa te reira tuatau ei taime no te akamanako no runga i te tumatetenga me kore te apai ke i toou manako mei te reira.

KAVEINGA: “Kare ua e tangata e makitakita i tona uaorai kopapa . . . kareka e angai e te akaperepere marie.”​—Ephesia 5:​29.

• E puapinga kia moe meitaki i te taime tikai e mii ra tetai tangata no te mea ka viviki ua i te roiroi no te taitaia.

• E matakite eiaa e inu maata i te kaope e te kava no te mea ka tamanata te reira i taau moe.

KAVEINGA: “E noonoo iti ua na.”​—Mareko 6:31.

• E akamaara e tukeke te tu e mii ra te tangata. Te mea maata, kia kimi koe eaa te ravenga meitaki noou uaorai.

• E manganui tei āriki e me akakite i toou mamae ngakau ki etai ke, ka tauturu ia koe kia akakoromaki inara kare tetai pae e inangaro kia akapera. Kare katoa e rotai ana te manako o te aronga kite no te puapinga o te akakite anga i te mii ei tamaru i te mamae ngakau. Me inangaro koe i te tuatua no runga i toou mamae ngakau ki tetai ke inara te emiemi ra koe, penei ka tamata koe i te akakite i toou manako ki tetai oa piri vaitata.

• Kite mai tetai pae e me aue ratou, ka iti atu to ratou mamae, kareka tetai pae i te akara anga te akakoromaki ra ratou noatu kare ratou e aue putuputu ana.

KAVEINGA: “Te kite ra te ngakau i tona uaorai tumatetenga.”​—Maseli 14:10.

• Penei ka tauta tetai pae i te apai ke i to ratou mamae ngakau na te inu maata i te kava me kore te kai apinga akakona. Inara e “ravenga” kino teia. Tetai ua atu akapumaana ka rauka mai, e mea poto ua te reira e ka taki atu ki te tumatetenga maata. Tamata i te au ravenga meitaki e te kino kore no te tamaru i toou taitaia.

KAVEINGA: “E tamā ua tatou ia tatou uaorai i te au viivii katoa.”​—2 Korinetia 7:1.

• Manganui tei tauturuia na te akanoo anga i tetai tuatau no te mii (tei na roto atu e te akakoromaki anga i te mamae ngakau) e tetai tuatau no te akangaroi (te rave i te au angaanga ei apai ke i te mamae no tetai tuatau).

• Penei ka maru mai toou mamae me akatupu e me akamatutu i toou pirianga oa, me apiipii i tetai tareni ou, e me rave i tetai angaanga tarekareka.

• I te tuatau ka aereia, mea papu ka taui te akaaere anga i toou taime. Penei ka riro te tuatau taau i akanoo no te akatakake ia koe mei te mii ei mea putuputu e te roa—tei tupu me maru akaou te ngakau.

KAVEINGA: “E atianga to te au mea katoa nei, . . . e tuatau to te aue, e e tuatau to te kata; e tuatau to te mii, e e tuatau to te ura.”​—Koheleta 3:1, 4.

• Me ka rauka ia koe i te rave viviki i te reira, e tamou i tetai akapapaanga no toou oraanga.

• Me akono tamou koe i tetai akapapaanga no te ora moe, te angaanga moni, e te au mea ke, mea papu ka māmā ake te akakoromaki i te mii.

• Me varenga ua koe i te rave i te au angaanga memeitaki e te mataora, ka tauturu i te akaiti i toou mamae ngakau.

KAVEINGA: “Kare aia e maata rava i te maara i tona ra puke rā i te ora anga nei, kia oronga mai te Atua i te rekareka ki roto i tona ngakau.”​—Koheleta 5:​20.

• Te manganui tei rave i te au ikianga puapinga i muri ua ake i te takake anga to ratou akaperepere, kua tataraapa i te reira.

• Me ka rauka, e tiaki no tetai tuatau i mua ake ka neke ei ki tetai ngai ke, ka taui i te ngai angaanga me kore ka titiri i te au apinga a toou akaperepere.

KAVEINGA: “Te kimianga o te aronga maroiroi ra, tei runga ïa i te apinga maata: kareka ta te aronga rapurapu ua ra, tei te putaua ïa.”​—Maseli 21:5.

• Maata te aronga e mii ra tei puapingaia me rave i te au angaanga ei akamaaraara ia ratou i to ratou akaperepere tei mate.

• Penei ka rauka te akapumaana me akaputu koe i te au tutu e te apinga me kore me tata koe i te au tupuanga mataora e te au tua taau ka inangaro kia akamaara.

• Akaputu i te au apinga tei riro ei akamaara ia koe i te au tuatau mataora e e akara i te reira i muri mai, me papa koe.

KAVEINGA: “Ka akamanako ana i te au rā taito.”​—Deuteronomi 32:7.

• Penei ka orote koe.

• Me kare ra e rauka tetai orote roa, penei ka rave koe i tetai angaanga taau e reka ana no tetai rā ua me kore nga rā mei te piki maunga, te atoro i tetai ngai vairanga apinga taito, me kore te koka aere na runga i te apinga akaoro.

• Ka riro tetai manga akangaroi anga ei tauturu ia koe kia akakoromaki i te mii.

KAVEINGA: “Ka taki aere tatou ko tatou anake uaorai i tetai ngai motutaa, e noonoo iti ua na.”​—Mareko 6:​31.

• E akamaara me akapou koe i tetai taime no te tauturu i etai ke, ka riro ei tauturu ia koe.

• Penei ka akamata koe na te tauturu anga i tetai ke, mei te au oa me kore kopu tangata tei anoano i te akapumaana no te takake anga toou akaperepere.

• Me turu e me akapumaana koe i tetai ke, ka apai mai i te rekareka maata e ka oronga mai i tetai akakoroanga penei i ngere ana koe.

KAVEINGA: “E mea meitaki i te oronga atu i te rave mai.”​—Angaanga 20:35.

• Ka riro te mii ei tauturu ia koe kia mārama eaa te mea puapinga i roto i te oraanga.

• Taangaanga meitaki i teia atianga kia akamanako e te peea ra toou oraanga.

• Rave i te au akatanotanoanga me anoanoia, ko teea ua ai te mea puapinga kia koe.

KAVEINGA: “E mea meitaki te aere ki te are aue anga, i te aere ki te are kaingakai; ko te openga oki te reira o te tangata katoa ra; e riro oki te aronga i ora i te akamaara i te reira.”​—Koheleta 7:2.

Te tika, kare e apinga e akakore takiri i toou mamae ngakau. Inara, e manganui kua takake to ratou akaperepere tei akapapu mai e me aru koe i te au takainga meitaki, mei tei taikuia i roto i teia atikara, ka rauka mai te akapumaana. E tika, kare teia papaanga e akakite pouroa mai i te au ravenga no te tamaru i te mii. Inara me tamata koe i tetai pae o teia au ravenga, ka kite mai koe i te akapumaana meitaki tikai taau e inangaro ra.