TAUTURU NO TE ARONGA TEI MII

Te Tauturu Meitaki Roa Atu no te Aronga Tei Mii

AKATANGI

KARE I ROA AKENEI KUA RIRO TE MII NO TEI MATE TETAI TEI AKAPEREPEREIA EI KIMIKIMIANGA MAATA NA TE ARONGA KITE. Noatu ra, mei tei uriuriia akenei, maata te taime kua rotai te au ravenga tauturu a te aronga kite ki te pakari o te Pipiria. Te akaari maira teia i te tu tinamou e te puapinga o te aratakianga a te Pipiria. Inara, kare te Pipiria e oronga ua mai i te tauturu meitaki. Mari ra, ka oronga katoa mai te reira i te au manako kare e kitea i te ngai ke atu e ka akapumaana tikai i te aronga e mii ra.

Akapapuanga e kare to tatou au akaperepere tei mate e mamae

“Kare ra a te aronga i mate ra e tuatua i kitea,” te na ko ra te Pipiria ia Koheleta 9:5. “Kore rava atura [ta ratou] i akakoro.” (Salamo 146:4) Mei te reira katoa, akaaite te Pipiria i te mate ki te moe tinainai.—Ioane 11:11.
Me irinaki pu tikai i te Atua aroa, ka apai mai te akapumaana

Te na ko ra te Pipiria ia Salamo 34:15: “Tei te aronga tuatua-tika ra to Iehova * mata, e tei ta ratou kapiki tona taringa.” Me akakite i to tatou manako ki te Atua na roto i te pure, kare te reira ei ravenga meitaki ua no te rapakau me kore te akapapa meitaki i to tatou manako. Mari ra, ka tauturu tikai ia tatou kia akatupu i te pirianga vaitata ki Tei Anga ia tatou, ko tei taangaanga i tona mana ei akapumaana ia tatou.
Tapapa atu i te oraanga meitaki no te tuatau ki mua

Tamanako ana i te tuatau ki mua me tuakaou mai te aronga i roto i te ngai tanumanga ki te oraanga i te enua nei! Te taiku putuputu ra te Pipiria i te reira tuatau. I te akataka anga eaa te ka tupu i te enua nei a tera tuatau, akakite mai te Pipiria e na te Atua “e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.”—Apokalupo 21:3, 4.

No te manganui tei irinaki i te Atua ko Iehova i roto i te Pipiria, kua akamaroiroi tikaiia ratou kia akakoromaki i te mii na te akaperepere anga i te manakonakoanga no te aravei akaou atu i to ratou au akaperepere tei mate. Ei akaraanga, karanga a Ann, kua takake tana tane i muri ake i te 65 mataiti i to raua akaipoipoanga e: “Akapapu mai te Pipiria kiaku e kare to tatou au akaperepere e mamae pera katoa ka akatuakaou mai te Atua i te aronga pouroa tana e akamaara ra. Ka oki ua rai au ki teia manako me akamaara au i toku tumatetenga e te ka tupu mai, ka rauka tikai te akakoromaki i te mea kino roa atu tei tupu kiaku!”

Karanga a Tiina, tei taikuia i te atikara i mua atu ana: “Mei te rā i takake ei a Timo, kua kite au i te turuturu anga a te Atua. Papu tikai iaku e kua kite au i to Iehova rima tauturu i toku tuatau tumatetenga. Pera katoa irinaki papu au i te manakonakoanga o te Pipiria no te tuakaouanga. Ka akamaroiroiia au kia akakoromaki ua atu rai e tae ua atu ki te rā me aravei akaou maua ko Timo.”

Te akaata ra te tuatua a teia nga vaine i te manako o te mirioni ua atu tangata tei irinaki pu tikai i te Pipiria. Penei ka manako koe e e moemoea ua teia e kare i te mea tika ta te Pipiria e karanga ra, noatu ra ka paunaia toou taime me kimikimi matatio koe i te akapapuanga e e tika tikai te akoanga e te au taputou a te Pipiria. Penei ka kite mai koe e ko te Pipiria te tauturu meitaki roa atu no te aronga e mii ra.