KAVEINGA PIPIRIA: “Te kimianga o te aronga maroiroi ra, tei runga ïa i te apinga maata: kareka ta te aronga rapurapu ua ra, tei te putaua ïa.”​—Maseli 21:5.

EAA TE AITEANGA: E mea puapinga me aru meitaki koe i taau i parani. No reira, akamanako meitaki i mua ake ka akapou ei i taau moni. E akamaara, kare e peke ia koe te oko mai i te au mea ravarai. No reira, kia matakite i taau moni.

TAAU KA RAVE:

• Akarava i te moni. Tata eaa taau kaiou, e akapapa meitaki. E oti, e akapae i te moni no te reira. Me kare e rava te moni, e rave mai i te reira mei tetai ngai. Ei akaraanga, me kare e rava te moni ei tutaki i te penitini o te motoka, rave mai i te moni i akanooia no tetai akakoroanga ke​—ei akaraanga, te moni no te kaikai i vao.

• Auraka e kaiou. Me ka rauka, auraka e kaiou. Mari ra, e akaputu i te moni ei oko i te apinga tei anoanoia. Me ka tutaki na roto i te credit card, e tauta kia tutaki pouroa i te kaiou i te openga o te marama. Me e kaiou taau, e parani kia tutaki i te reira, e peke ua atu.

  Karanga tetai akakite anga e ka pou te moni me tutakiia na roto i te credit card. No reira me e credit card taau, kia matakite.

KAVEINGA PIPIRIA: “Kare te moe ua e arote i te tuatau anu; e ori ra aia i te tuatau mou ra, e kare tana e rauka.”​—Maseli 20:4.

 EAA TE AITEANGA: E putaua ta te kope ka akatupu. Tauta kia riro mai ei tangata angaanga meitaki, e parani i toou turanga pae moni no te tuatau ki mua.

TAAU KA RAVE:

• Angaanga pakari. Ei paruru i taau ngai angaanga ka anoanoia koe kia angaanga pakari. Mataora te pu angaanga i te aronga angaanga meitaki.

• Kia tiratiratu. Auraka e keia mei toou pu. Me keia koe, ka akakino teia ia koe e ka ngata i muri mai te kimi i tetai angaanga ke.

• Auraka e noinoi. Me aruaru ua rai koe kia maata atu te moni, ka takino te reira i toou oraanga e toou pirianga ki tetai ke. E akamaara kare ko te moni te mea puapinga roa atu i roto i te oraanga.

EIAA E KAIMOUMOU I TE TAIME E TE MONI KI RUNGA I TE AU PEU KINO.

“Ko te konā kava oki, e te kaki nui ra, ka putaua ïa; e na te moe ua e akakakau mai ki te kakau ngaengae.”​—MASELI 23:21.

AURAKA E APIAPI.

“Auraka e apiapi i to kotou ora, i ta kotou e kai, e ta kotou e inu, e te kakau no to kotou kopapa.”​—MATAIO 6:25.

AURAKA E VAREAE.

“Te tangata mata noanoa, te rapurapu ra ïa kia maata te apinga; kare ra aia i kite e, ka rokoia mai aia e te putaua.”​—MASELI 28:22.