Āriki Au i to te Atua Manako no te Toto

Akakite Tetai Taote i Tona Tua

TEI mua au i tetai pupu taote i roto i te ngai akaputuputuanga o te aremaki, te akakite ra i taku i kite mai mei te akarakara anga i tetai kopapa mate. E maki tuma to te tangata tei mate, e kua karanga au, “Kiteaia mai ko te tumu i mate ei teia tangata no te hemolysis [te takore anga i te au cell muramura] pera katoa kare e angaanga akaou ana tona mape [kidney] no te pāmu maata roa i te toto.”

Kua tu viviki tetai taote e kua kapiki maata ma te riri, “Te karanga ra koe e kua tarevake ta matou toto i pāmu?” Pau atu au, “Kare ko tera taku i tuatua.” Kua akaari au i te au tutu no te mape o te tangata maki tei akamaataia, e kua karanga, “Te kite nei tatou e kua takoreia te au cell muramura i roto i te mape e no reira ka taopenga tatou e na teia i akatupu i te mape kia kore e angaanga akaou.” * Kua muteki te katoatoa, e kua marōkaua toku vaa. Noatu e taote mapu ua au e e taote maata aia, kare au i inangaro i te tuku atu i taku māroanga.

I te tupu anga teia uipaanga, kare au i riro mai ake ei Kite no Iehova. Anauia au i te mataiti 1943 i Sendai, e oire i te tua tokerau o Tiapani. No te mea e taote toku papa no te rapakau i te au tu maki tukeke e te maki manako, kua iki au kia apii i te rapakau maki. E rua mataiti iaku i te apii no te rapakau maki i te mataiti 1970, kua akaipoipo au i tetai vaine mapu ko Masuko tona ingoa.

Iki Au te Apii i te au tu Maki Tukeke

Kua angaanga moni a Masuko no te turuturu ia maua e kia akaoti au i taku apii. Reka tikai au i te apii i te au ravenga rapakau maki. Umere au i te tu manea i angaia ai te kopapa tangata! Noatu te reira, kare au i manako ana e na Tei Anga mai i maani i te reira. Manako au e ka riro taku apii e te kimikimianga i te au ravenga rapakau maki ei apai mai i te akakoroanga ki toku oraanga. No reira te riro anga mai au ei taote, kua iki au i te apii tamou i te au tu maki tukeke—te tumu i tupu ei me kore i totoa ai te reira, e ta te reira ka akatupu ki te kopapa.

I toku akarakara anga i te au kopapa mate o te aronga tei tu i te maki cancer, kua akamata au i te ekoko i te taangaanga i te pāmu toto no te rapakau maki. Te aronga kua roa i te tu anga i te maki cancer, penei ka topa te vaito o to ratou toto no tei taʼetaʼe ua te toto. Pera katoa ka iti roa atu te vaito o te toto no te chemotherapy, e ravenga rapakau maki cancer, e no reira te au taote i akamaroiroi ei i te pāmu toto. Inara, kua akamata au i te manako e na te pāmu toto e akatotoa viviki i te maki cancer i roto i te aronga maki. Noatu te tu, i teia tuatau kua āriki te manganui e na te pāmu toto e akaparuparu i te au ravenga a te kopapa no te paruru anga mei te maki, e tei tupu, ka oki ua mai te maki tuma me kore ka viviki atu te aronga maki cancer i te mate. *

I te mataiti 1975, kua tupu te uipaanga tei taikuia i te akamataanga. Te taote maata nana i vaʼi i te tangata maki, e tangata kite karape aia no te toto. No reira aia i riri ei i taku tuatua anga e na te pāmu toto i akatupu i te tangata maki kia mate. Inara, kua oronga ua atu au i taku kimikimianga, e i muri mai kua maru aia.

Ka Kore te Maki e te Mate

I taua taime rai kua atoroia taku vaine e tetai vaine pakarikari, e Kite no Iehova. Kua tuatua te vaine pakarikari no runga ia “Iehova” e kua ui taku vaine eaa te aiteanga o te reira. Kua pau atu aia, “Ko Iehova te ingoa o te Atua mou.” E tatau ua ana a Masuko i te Pipiria mei tona tamarikianga mai, inara i roto i tana Pipiria kua monoia te ingoa o te Atua ki te tuatua “ATU.” I teianei kua kite aia e e ingoa rai to te Atua!

Kua akamata viviki a Masuko i te apii i te Pipiria ma tera vaine pakarikari. Te oki anga au ki te kainga mei te aremaki i te ora tai i te popongi, kua akakite taku vaine kiaku ma te oraora, “Te karanga ra te Pipiria e ka kore te maki e te mate!” Pau atu au, “E mea manea tera!” Karanga i reira aia, “No te mea kare e roa atu ka tae mai te ao ou, kare au e inangaro ia koe kia kaimoumou i toou taime.” Manako au e kua inangaro aia iaku kia akamutu i taku angaanga ei taote, no reira kua riri au e kua tupu te māroanga i roto i to maua akaipoipo.

Inara, kare taku vaine e tuku i te au. Kua pure aia e kua kimi i te au irava tau ei akaari mai kiaku. Kua pakia toku ngakau e te au tuatua ia Koheleta 2:​22, 23: “Eaa iora ta te tangata i tana katoa ra au angaanga, e te manamanata o tona ra ngakau, i rave uaʼi aia i te angaanga i raro ake i te rā nei? . . . e te po katoa ra kare tona ngakau e meitaki i te moe. E mea puapinga kore katoa tei te reira.” Kua tau tikai teia irava ki taku angaanga​—te tauta pakari nei au i te kimikimi i te au ravenga rapakau e te vairakau i te po e te ao e kare au i mataora ana.

I tetai popongi Tapati ia Tiurai 1975, kua aere taku vaine ki te Are Uipaanga Patireia a te Au Kite o Iehova, e kua manako mai au kia aru iaia. Poitirere tikai taku vaine i te kite anga iaku i reira, e kua āriki pumaana te Au Kite iaku. Mei reira mai, kua aere au ki te au uipaanga Tapati i te au epetoma ravarai. E tai marama i muri mai, kua akamata au i te apii i te Pipiria ki tetai Kite. E toru marama i muri ake i te atoro anga mua te Au Kite o Iehova i taku vaine, kua papetito aia.

Āriki Au i to te Atua Manako no te Toto

Kare i roa kua apii au e te akakite ra te Pipiria ki te au Kerititiano e ‘auraka e kai i te toto.’ (Angaanga 15:28, 29; Genese 9:4) I te mea kua ekoko takere au i te pāmu toto, kare i te mea ngata noku kia āriki i to te Atua manako no te toto. * Manako au, ‘Me te ora ra Tei Anga mai e ko teia tana i tuatua, e mea papu e tika te reira.’

Apii katoa au i te tumu i maki ei tatou e i mate ei, no te ara a Adamu tei iri mai ki runga ia tatou. (Roma 5:​12) I tera taime, te kimikimi ra au no runga i te maki o te ara toto. Me ruaine tatou, ka ketaketa e ka oʼiti ua te ara toto, e no reira i tupu ei te maki pukuatu, te au manamanata no te ara toto ki te roro e te maki mape. Mārama au e na te tu apa tei iri mai ki runga ia tatou i akatupu i teia au maki. Aere ua rai, kua iti atura toku inangaro no te apii i te au ravenga rapakau. Na te Atua ko Iehova anake e akakore i te maki e te mate!

Ia Mati 1976, e itu marama i muri ake i te akamata anga taku apii Pipiria, kua akamutu au i taku apii i ko i te apii teitei o te aremaki. Mataku au e kare au e angaanga akaou ei taote, inara kua rauka mai tetai ngai angaanga i tetai aremaki ke atu. Papetitoia au ia Me 1976. Kua iki au e ko te mataara meitaki roa atu no te akapou i toku oraanga koia oki, kia tavini ei tangata tutu evangeria tamou, me kore ei painia, e kua akamata au i te reira ia Tiurai 1977.

Paruru Anga i to te Atua Manako no te Toto

Ia Noema 1979, kua neke maua ko Masuko ki tetai putuputuanga i Chiba Prefecture, e ngai te anoanoia ra te tauturu a te aronga tutu aere. Rauka mai tetai angaanga no tetai nga rā i te epetoma i ko i te aremaki. I toku rā mua i te angaanga, kua aravei mai tetai pupu taote iaku. Ui mai ratou, “Ei Kite no Iehova, eaa taau ka rave me aere mai tetai tangata maki te anoano ra kia pāmu toto?”

Ma te tu kauraro, kua akamārama au e ka aru au i ta te Atua i karanga no te toto. Akamārama au e te vai ra te au ravenga rapakau ke atu kare e taangaangaia te pāmu toto e ka tauta au i te akono i te aronga maki. Muri ake i te uriurianga manako no tetai ora, kua pau mai te taote maata no te vaʼi anga, “Kua mārama ua au. Inara me aere mai tetai tangata maki e iti roa tona vaito toto, na matou e akono iaia.” Kua kiteaia te taote maata o te vaʼi ei tangata marokiakia, inara i muri ake i teia uriurianga kua akatupu maua i tetai pirianga meitaki, e kua akangateitei ua rai aia i toku irinakianga.

Timataia te Akangateitei no te Toto

Ia maua e tavini ra i Chiba, te akatuia ra tetai opati maata ou no te Au Kite o Iehova i Tiapani i te oire ko Ebina. E tai rā i te epetoma ka akaoro maua ko taku vaine ki reira no te akono atu i te oraanga kopapa o te aronga tauturu, e Au Kite ratou, te akatu ra i teia ngai ou tei kapikiia e ko Betela. I nga marama i muri mai, kua patiia maua kia tavini tamou i ko i te Betela i Ebina. No reira ia Mati 1981, kua neke maua ki te au are e noo ra te 500 tuma aronga tauturu no tetai tuatau ua. I te popongi, ka tauturu au i te tamā i te au are pā’ī e te are meangiti o te ngai patu anga, e oti i te aiai ka atoro au i te aronga tauturu ei akarakara i to ratou turanga pae kopapa.

Tetai vaine maki taku i akono ko Ilma Iszlaub, e mitinari tei neke ki Tiapani no Autireria mai i te mataiti 1949. Kua tu aia i te maki leukemia e kua karanga te au taote e ka ora aia no nga marama ua. Patoi a Ilma i te pāmu toto ei akaroa atu i tona oraanga e kua iki aia kia noo i ko i te Betela e mate ua atu ei. I tera tuatau, kare i maaniia ake te au vairakau no te akamaata i te au cell muramura, mei te erythropoietin. No reira kua topa te vaito o tona toto mei te 3 me kore 4 karama! (Te vaito meitaki, mei te 12 ki te 15.) Noatu ra, kua tauta au i te akono iaia. Kua akaari tamou a Ilma i tona akarongo ngaueue kore i roto i te Tuatua a te Atua e tae ua atu ki tona mateanga ia Tianuare 1988​—mei te itu mataiti i muri mai!

I te au mataiti i aereia, e maata te aronga tauturu i ko i te opati Betela o te Au Kite o Iehova i Tiapani tei anoano i te vaʼi anga. Mea meitaki, kua āriki te au taote i roto i te aremaki i te pae mai kia rave i te vaʼi anga ma te kore e pāmu toto. Maata te taime kua patiia au ki roto i te ngai vaʼi anga ei akarakara ua, e i tetai taime kua tauturu au i te vaʼi anga. Akameitaki au i teia au taote tei akangateitei i te ikianga a te Au Kite o Iehova no te toto. Me angaanga kapiti au kia ratou, maata te taime kua rauka iaku i te akakite i toku au irinakianga. Kare i roa akenei, kua papetitoia tetai o teia au taote ei Kite.

Te mea umere, kua riro te tautaanga a te au taote i te rapakau i te Au Kite o Iehova ma te kore e pāmu toto ei akameitaki roa atu i te au ravenga rapakau. Kua akapapuia e me rave i te vaʼi anga ma te kore e pāmu toto, e meitaki atu te reira. Kua kiteaia mai i roto i te au kimikimianga e ka viviki atu te aronga maki kia meitaki akaou e e iti ua to ratou manamanata i muri ake i te vaʼi anga.

Apii ua Atu Mei te Taote Maata

E tatau ana au i te au ravenga ou no te rapakau e te au vairakau ou. Noatu ra, te apii nei rai au mei ia Iehova, te Taote Maata. Kare aia e akara ua i te tu o vao, mari ra te kite ra aia i to tatou tu tikai. (1 Samuela 16:7) I taku angaanga ei taote, ka tauta au i te akamanako i te tu tikai o te tangata maki me rapakau iaia, kare ki runga ua i tona maki. Na teia mataara, ka akameitaki atu te reira i taku akono anga e te rapakau anga i te tangata maki.

Te tavini nei rai au i ko i te Betela, e me tauturu au i etai ke kia apii no runga ia Iehova​—e tona manako i te toto​—ko toku rekareka maata roa atu ïa. Te pure nei au kia takore takiri te Taote Maata, ko te Atua ko Iehova i te maki e te mate.​—Akakiteia e Yasushi Aizawa.

[Au Tataanga Rikiriki i Raro]

[Tataanga]

“Akamārama au e te vai ra te au ravenga rapakau ke atu kare e taangaangaia te pāmu toto e ka tauta au i te akono i te aronga maki”

[Tataanga]

“Kua akapapuia e me rave i te vaʼi anga ma te kore e pāmu toto, e meitaki atu te reira”

[Tutu]

I runga: Oronga anga i tetai ako Pipiria

Tua katau: Maua ko taku vaine ko Masuko i teia rā