Manakonakoanga​—E Puapinga Ainei?

E TAI NGAURU rai o Daniel mataiti, inara kua pou e tai mataiti tona tu anga i te maki cancer. Maromaroa tikai tona au taote, e te aronga piri vaitata kiaia. Kareka ko Daniel, kare aia i maromaroa ana. Kua papu iaia e me mamaata mai aia, ka riro aia ei tangata kimi rapakau no te tauturu i te aronga maki cancer. E tu oraora e te manako papu to Daniel no te mea ka atoroia mai aia e tetai taote tukatau i te rapakau i teia maki cancer. Inara te taeanga ki tera rā, kare te taote e rauka i te aere mai no te kinokino o te reva. Taitaia tikai a Daniel. Ko te taime mua teia i apikepike tikai ei tona manako. I nga rā i muri mai, kua mate aia.

Kua akakiteia mai te tupuanga o Daniel e tetai tangata akono i te aronga maki, tei apii no runga i te turanga o te manakonakoanga e te manako apikepike i roto i te oraanga kopapa. Penei kua rongo koe i tetai tua mei teia rai. Ei akaraanga, te vaitata atura tetai tangata pakarikari i te mate, inara kua tapapa mataora aia i tetai akakoroanga puapinga​—penei ka atoroia mai aia e tona kopu tangata me kore te tapapa ra i tetai rā akamaaraanga nona. Me oti ua ana tera akakoroanga, kare e roa kua mate te tangata. Eaa te mea puapinga i roto i teia nga akaraanga? Ka rauka ainei te manakonakoanga i te akameitaki atu i te oraanga mei ta tetai pae i irinaki?

E maata te aronga kimikimi i te au ravenga no te rapakau tei akakite mai e ka riro te manakonakoanga, te manako papu e te au manako meitaki ei mea ririnui no te akameitaki atu i te oraanga kopapa. Inara, e tuke te manako o tetai pae. Ko tetai aronga kimikimi, akakite ratou e kare te reira e rotai ki te kite taieni. Irinaki ratou e ko te tumu anake i maki ei te tangata, no te tu apikepike o te kopapa.

Te tika, kua roa te manako ekoko anga o te tangata no runga i te puapinga o te manakonakoanga. I te tuatau i taito, kua uiia ki te tangata kimi kite o Ereni ko Aristotle kia akataka mai i te aiteanga o te manakonakoanga. Akakite aia: “Mei te moemoea rai te ara ua ra koe.” I teia tuatau, karanga tetai tangata poritiki i Marike ko Benjamin Franklin: “Ko tei irinaki i te manakonakoanga, kare aia e tauturuia.”

Eaa i reira te manakonakoanga? E moemoea ua ainei kia kimi i te akapumaana i roto i te au manako papu kore? Me e mea maata atu ainei te manakonakoanga—tei anoanoia kia mataora e kia meitaki atu te oraanga, e mea tinamou e te puapinga tikai?