Au Tumu Kia Irinaki i te Pipiria
2. Tu Tika ua e te tu Tika
Te oronga maira te tu tika i te tumuanga no te irinaki. Ko te tangata e rongo tona no te tu tika penei ka irinaki rai koe, inara me pikikaa ana aia ia koe e okotai ua taime, penei ka ngere aia i te reira.
E ARONGA tuatua tika te aronga tata Pipiria, tei tata ma te ngakau tae tikai. Te akaari taka meitaki maira to ratou tu tika ua e e mea tika tikai ta ratou au tataanga.
Au tarevake e te au tu apa.
Kua akakite atea ua mai te aronga tata Pipiria i to ratou uaorai au tarevake e te au tu paruparu. Kua akakite mai a Mose e kua rave aia i tetai tarevake e kua kokoti aia i te au tupuanga kino. (Numero 20:7-13) Kua akamarama mai a Asapha e no tetai tuatau kua vareae aia i te oraanga puapinga o te tangata kino. (Salamo 73:1-14) Kua akakite a Iona i tona akarongo kore e tona manako kino i te akamataanga, i to te Atua akaoraanga i te aronga ara tei tataraara. (Iona 1:1-3; 3:10; 4:1-3) Kua akakite atea ua mai a Mataio e kua akaruke aia ia Iesu i te po o to Iesu opuangaia.—Mataio 26:56.
Kua akakite mai te aronga tata o te au Tuatua Tapu Epera i te au koumuumuanga e te meameaauanga a to ratou uaorai iti tangata. (2 Paraleipomeno 36:15, 16) Kare te aronga tata i akaruke ana i tetai tangata, kare katoa i te au tutara o to ratou pa enua. (Ezekiela 34:1-10) Ma te reira tu tika ua katoa, kua ripoti mai te au reta a te au apotetoro i te au manamanata kino pakari tei tupu ki tetai au Kerititiano, kapiti mai te aronga pakari, e pera katoa tetai au putuputuanga i roto i te anere mataiti mua T.N.—1 Korinetia 1:10-13; 2 Timoteo 2:16-18; 4:10.
Kua rekoti te aronga tata Pipiria, mei ia Iona rai, i to ratou uaorai au tarevake
Tuatua tika mareka koreia.
Kare te aronga tata Pipiria i uuna i tetai apinga tei manakoia e etai pae ei tuatua tika akama tikai. Kua akakite tika mai te au Kerititiano i te anere mataiti mua e kare te ao takapini ia ratou e reka ana ia ratou mari ra kua manakoia e e aronga neneva e te akaaka. (1 Korinetia 1:26-29) Kua akakite mai te aronga tata e kua manakoia te au apotetoro a Iesu ei aronga ‘apii koreia e te kite kore.’—Angaanga 4:13.
Kare te aronga tata Evangeria i takaviri i te au tumu tika kia manako meitakiia mai a Iesu. Mari ra, kua ripoti tika mai ratou e kua anauia aia i roto i te au turanga akaaka ki tetai pamiri e aronga angaanga noa ua ratou, e kare aia i apii ana i roto i te au apii teitei o tona tuatau, e kua patoi te maataanga o te aronga e akarongo ra iaia i tana karere.—Mataio 27:25; Luka 2:4-7; Ioane 7:15.
Te taka meitaki ra e, te oronga maira te Pipiria i te akapapuanga maata e e tataanga te reira na te aronga tata tuatua tika. No to ratou tu tika, ka irinaki ainei koe ia ratou?