Au Tumu Kia Irinaki i te Pipiria
3. Tu Rotai i Roto
E akamanako ana i te pati anga e 40 tangata mei te au tupuanga tukeke kia tata i tetai puka, ia ratou e tata tataki tai ra i tetai tuanga. E noo ana ratou i roto i te au enua tukeke e kare ratou pouroa i kite i tetai e tetai. Kare tetai pae i kite e eaa ta tetai atu i tata. Ka irinaki ainei koe i tetai puka tei tataia mei teia kia rotai?
KO TE Pipiria taua puka ra. * Tataia i raro i te au turanga tuke rava roa atu i tei akamaramaia i runga akenei, e me umere tikai ra to te reira tu rotai i roto.
E kakau muramura ainei to Iesu me e kutekute?
Au turanga takake.
Kua tataia te Pipiria i roto i tetai tuatau e 1,600 mataiti e tere atu mei te mataiti 1513 M.T.N. ki te mataiti 98 T.N. No reira te maataanga o te aronga tata e 40, e tukeke te au anere mataiti i noo ei ratou. E tukeke ta ratou au angaanga. Tetai pae e aronga ravakai, tetai atu e au tiaki mamoe me kore e au ariki, e tetai e taote aia.
E karere rotai.
Kua akatupu te aronga tata Pipiria i tetai upoko tuatua maata okotai: ko te akakiteanga i to te Atua tikaanga kia tutara i te tangata ravarai e te akatupuanga i tona akakoroanga na roto i tona Patireia i te rangi, e kavamani no te ao katoa. Kua akakite muaia mai taua upoko tuatua i roto ia Genese, e kua akamaataia atu i roto i te au puka tei aru mai, e kua taopenga atu ki tetai tupuanga umere rava i roto ia Apokalupo.—Akara i te “No Runga te Pipiria i Teaa?” i te kapi 19.
Taokotai te au akakiteanga.
Kua taokotai te aronga tata Pipiria no runga katoa i te au akakiteanga rikiriki tikai, inara putuputu teia tu rotai i te kitea e kare i te mea akakoroia. E akatau ana i tetai akaraanga. Kua akakite mai te tata Pipiria ko Ioane kia tatou e, i te aere anga mai tetai aka pupu tangata i te akarongo kia Iesu, kua ui atu a Iesu kia Philipi i tetai ngai kia oko mai i tetai kai i te angai i te au tangata. (Ioane 6:1-5) I roto akaou i tetai papaanga aiteite, kua akakite mai a Luka e kua tupu teia i te pae ua mai i te oire o Betesaida. I te akamataanga o tana puka, kua karanga oki a Ioane e no Betesaida a Philipi. (Luka 9:10; Ioane 1:44) E no reira e mea natura ua no Iesu i te ui i tana uianga ki tetai tangata tei noo vaitata ua atu ki reira. Kua taokotai te au akakiteanga—inara kare i te mea akakoroia ai kia rotai te reira. *
Au tukeanga tau.
Te vai ra tetai au tukeanga i rotopu i tetai au tataanga , inara kare ainei e ka tupu rai te reira? Penei kua kite atu tetai pupu tangata i tetai angaanga kino. Me akakite mai ratou tataki tai i te au akakiteanga aiteite ma te au tuatua aiteite katoa, kare ainei koe e tarotokaka e kua akarotai muna rai ratou i ta ratou tua? Ka tau i reira e, ka tuke rai te akakiteanga tataki tai i te aruanga i tana uaorai i akara atu. Mei tera katoa rai te aronga tata Pipiria.
E akamanako i tetai akaraanga. Te akakite maira a Mataio 27:28 e kua aao a Iesu i te kakau “muramura” i te ra o tona mateanga, inara te tuatua Ereni mua tei uriia e ‘muramura’ ia Mareko 15:27 e Ioane 19:2 tona aiteanga tikai e ‘vareau.’ E vareau ainei me kore e muramura ainei te kakau o Iesu? Ko te tikaanga, kua tano nga mea roa ai. Ka kite mai koe i te muramura i roto i te kutekute. Tei runga ua i te ngai e akara atura tetai tangata, te ata o te marama e te ngai i muri ake, penei kua akamaratea i te au kara, i te oronga mai anga i te au kara tukeke i roto i te kakau. *
Te tu rotai o te aronga tata Pipiria, kapiti mai to ratou tu aiteite kare i akakoroia, te akataka katoa maira i ta ratou au tataanga ei mea kia irinakiia.
^ para. 4 Ko te Pipiria, e 66 au putunga puka, me kore au tuanga, tei akamataia e Genese e kua taopengaia e Apokalupo.
^ para. 7 No tetai atu au akaraanga no te tu rotai, e akara i te kapi 16-17 o te poroutia A Book for All People, neneiia e te Au Kite o Iehova.
^ para. 9 No tetai akakiteanga maata, e akara i te pene 7, “Does the Bible Contradict Itself?,” o te puka The Bible—God’s Word or Man’s? neneiia e te Au Kite o Iehova.