Akakiteanga Mou i to te Atua Aroa

KUA taikuia te au mea umere e itu o te ao taito no te mea kua akatupu te reira i te tu va ua i roto i te manako o te tangata. Inara, i te au patuanga mamaata pouroa, ko te au piramiti ua rai te vai nei. I tetai tua ra, te vai ua nei rai te Pipiria, noatu e kua tataia e te au tangata akaaka ki runga i te au mea pe, e kua tuku tika uaia mai te reira e tae ua mai ki to tatou tuatau nei tikai. Ka rauka ia tatou i te irinaki pu tikai ki roto i teia puka umere rava atu.​—⁠Isaia 40:8; 2 Timoteo 3:​16, 17.

Na te tataanga i tona au manako ki raro, kua akapapu te Atua ko Iehova e kare tona manako e tauiia e te au manako apa ua o te tangata nei. Pera katoa, te reo ngoie ua tei taangaangaia e te aronga tata o te Atua, kua tauturu i te manganui katoa e iti ua to ratou kite apii kia marama ua i te tatau i te Pipiria. (Angaanga 4:13) Ka ariki anei koe i tetai apinga ke atu mei Tei Anga mai e tona au tekeretere akauruia? Pera katoa, te akapapu maira te tua maataanga o te Pipiria, i to te Atua aroa maata no tana au tangata i anga mai, noatu e te noo ra te tangata kiea me kore eaa te reo e tuatua ra ratou. (1 Ioane 4:19) Kia papu e, kare te tua maataanga i te Pipiria e akameangiti mai i tona puapinga mari ra, ka akateitei ra i te reira!

Te au tataanga i roto i te Pipiria, te akapapu maata maira i to te Atua aroa. Mei ta tatou i kite mai i roto i te au atikara i mua atu, te akamarama maira te Tuatua a te Atua i to tatou kapuaanga mai, eaa i poto rava ai te oraanga e eaa i ki ei i te manamanata, e akapeea te Atua i te rapakauanga i teia turanga na roto i tana kavamani Patireia. Kua akamanako katoa tatou i tetai akoanga Pipiria meitaki tikai e akapeea i te rekarekaanga i tetai oraanga mataora e te merengo i teia taime nei. (Salamo 19:​7-11; Isaia 48:​17, 18) Tei runga ravao, kua kite mai tatou e akapeea Tei Anga mai ia tatou i te akarangatira anga i tona ingoa mei te au akakinoanga pouroa tei akatupuia e te au pikikaa a Satani.​—⁠Mataio 6:⁠9.

E puka ke atu ainei tetai tei puapinga maata, tei tau meitaki, tei tau tikai, e tei ki meitaki i te manakonakoanga no te au tangata taitaia ravarai? Ae, kare mei te au mea umere e itu o te ao taito ra, te maataanga kua patuia ei akangateitei i te au atua pikikaa me kore i te au aronga mana, e akakiteanga mou tikai te Pipiria i to Iehova aroa karapii kore no te au tangata tana i anga.

Me kare koe i rave ake i te reira, kore koe e akara matatio marie i te au Tuatua Tapu. I teianei, te akono ra te Au Kite o Iehova i te au apii Pipiria oronga ua ki te au tangata e ono mirioni e tere atu takapini i te ao katoa. Kua manako ratou i te reira ei tikaanga manea i te tauturu i te au tangata ngakau tae kia kite ratou uaorai e e mea irinakiia tikai te Pipiria, te Tuatua akauruia a te Atua.​—⁠1 Tesalonia 2:13.