Akaraanga i te Ao

▪ Te katoaanga o te New World Translation of the Holy Scriptures ka rauka te reira i roto i te au reo e 43 e i roto i te au tataanga Braille e 3; te New World Translation of the Christian Greek Scriptures ka rauka te reira i roto i tetai 18 reo akaou e e 1 tataanga Braille. Mei ia Tiurai 2007, te katoaanga o tei neneiia e 143,458,577 au kopi.

▪ Ko te tataanga Pipiria taito rava atu tei kiteaia e te vai ra koia oki ko tei karangaia e ko te Akameitakianga Taunga o Numero 6:​24-26. Kua tataia te reira ki runga i nga mea apinga akamanea ario e rua, tei roraia mei te au pokai, no te tuatau openga o te itu anere me kore no te akamataanga o te ono anere mataiti M.T.N.​—⁠BIBLICAL ARCHAEOLOGY REVIEW, MARIKE.

▪ Mei ia Titema 31, 2006, te numero o te au reo e te au reo keke e kua retitaia tetai puka okotai o te Pipiria e 2,426​—⁠e 23 te maata atu i te mataiti o muao.​—⁠UNITED BIBLE SOCIETIES, PERITANE.

▪ Mei tetai 28 patene o te au Marike te manako ra i te Pipiria e “ko te tuatua tikai a te Atua . . . kia marama tikaia,” e e 49 patene e ko te “tuatua akauruia a te Atua, inara auraka te au mea ravarai i roto i te reira kia marama tikaia,” e e 19 patene ei “puka tua maani ua.”​—⁠GALLUP NEWS SERVICE, MARIKE.

Pipiria Tinito Taito Rava Atu?

“Ko te rekoti taito rava atu no runga i tetai urianga Tinito o te Pipiria Epera, ka kiteaia i runga i tetai toka akamaaraanga [kaui] no te mataiti 781 TN mai,” i karanga ai te tangata apii ko Yiyi Chen, no te Apii Teitei o Peking. Te toka, tei akatuia e te au Kerititiano Nestoria, kua kiteaia mai i roto i te oire o Xiʼan i te mataiti 1625. “Te ingoa Tinito i runga i te akamaaraanga kua uriia e ko ‘te Akamaaraanga i te Totoaanga o te Akonoanga Luminous i Tinito mei Daqin mai’ ( . . . ko Daqin, ko te tuatua Tinito ia no te Patireia Roma),” i akamarama mai ei a Chen. “I roto i te au reta i runga i te akamaaraanga, ka kite mai tatou i te au tuatua Tinito mei te ‘papaanga tikai’ e te ‘urianga i te Pipiria.’”

[Akameitakianga no te Tutu i te kapi 30]

© Réunion des Musées Nationaux/Art Resource

Puapinga no Roto i te Vari

I te mataiti 2006, kua kite mai tetai aronga angaanga e keri ra i roto i tetai ngai vari i Airerani i tetai puka o Salamo, tei manakoia e no te varu anere mataiti T.N. Ko te tataanga Ratino, tetai o te nga mea tataanga ua tei vai ua rai mei taua tuatau ra, kua akatakaia ei apinga puapinga. Te 100 e ara atu kapi pakiri manu, i roto i to te reira vai mua, e tu meitaki tikai. “Te au potonga e toe ra o tetai moenga tapoki e tetai pute kiri pakiri manu, te akakite maira e kua uuna akakoroia te au puka Salamo, penei kia paruru i te reira mei te au aru anga a te Viking e 1,200 mataiti i topa,” i karanga ai The Times o London. Noatu e kua pipiri meitaki te reira e kua pe tetai apa, kua papu meitaki i te aronga kite e ka rauka ia ratou i te akapae e te akono i te reira.

Putunga Apinga Tuatua Enua

Te akakite maira te au ripoti e kua akaputu mai te aronga keri apinga taito e eru ra i te au toroka one mei te ngai o te iero o Ierusalema, i te au tauatini ua atu apinga ko taito mei te au tuatau i mua ake i te taime o te ngati Iseraela ki teia tuatau nei. E tao tetai tei taangaangaia ana e te nuku vaeau o Nebukanesa, tei takore i te iero mua o te ngati Iuda i runga i taua ngai ra. Ko te kiteaanga umere rava tikai koia oki ko tetai akairo karakaraea no te itu me kore te ono anere mataiti M.T.N. tei karangaia e kua akairo i te ingoa Epera ko Gedalyahu Ben Immer Ha-Cohen. Kua karanga te tangata keri apinga taito ko Gabriel Barkai e, te tangata e nana teia apinga “penei e ai taeake aia no Pashur Ben Immer, tei akatakaia i roto i te Pipiria ia [Ieremia 20:1] ei orometua e e tangata maata i roto i te iero.”