Ui te au Mapu E . . .

Eaa ka Aru ei i te au Turanga Pipiria?

TEI roto koe i tetai are kaikaianga e kai ra i taau kai ma tetai nga tamaine e rua i te apii. Kua akara atu tetai ia raua i te tamaiti ou.

“Kua kite koe, e reka ana tikai aia ia koe,” i karanga mai ei te tamaine mua kia koe. “Te kite ua atu nei au i te tu e akara matariki maira aia ia koe. Mei te mea rai e tei runga ua tona mata ia koe!”

“E kite koe eaa?” kua koumuumu ua mai te rua o te tamaine iaia e irinaki maira ki te pae ia koe. “Kare ana vaine!”

“Te ngai kino iaku, e tane taku,” i karanga mai ei te tamaine mua. “Naringa kare, kare roa au e emiemi i te aru iaia!”

E oti kua akakite mai te tamaine mua i tetai apinga e riri ua ana koe i te akarongo atu.

“Eaa te tumu e kare rai koe i tu ake i te tane?”

Kua kite ke ana koe e ka uiia mai tera uianga. Ko te tikaanga, te inangaro ra koe e e tane taau. Inara kua akakiteia mai kia koe e e meitaki atu kia tiaki e kia papa roa koe i te akaipoipo i mua ake ka akamata ai koe i te aru kapiti atu ki tetai tamaiti. Naringa kare te . . .

“No taau akonoanga, ea?” i karanga mai ei te rua o te tamaine.

‘Te kite maira ainei aia i toku manako?’ i akamanako ei koe kia koe uaorai.

“Ko te Pipiria, Pipiria, Pipiria ua ia koe,” i aviri ei te tamaine mua. “Eaa te kino i te tamataora i tetai taime?”

Kua kite mai ana ainei koe ia koe uaorai i roto i tetai turanga aiteite​—⁠i te aviriia anga no te mea te tauta ra koe i te aru i te au turanga Pipiria? Akapeea koe i te pau atu anga?

▪ Kua paruru papu meitaki tikai koe i toou au irinakianga no te tu akono tau.

▪ Kua manga akama mai koe, inara kua akamarama atu koe i toou au irinakianga i te ka rauka meitaki ia koe.

▪ Kua manako mai koe e te tano ua ra toou au oa apii​—⁠kare roa koe e piri ana ki roto i te tamataoraanga!

Kua manako ana ainei koe e, ‘E puapinga ainei tikai i te aru anga i te au turanga a te Pipiria?’ Kua akamanako atu ana tetai mapu ko Deborah tona ingoa i te reira. * “Kua rauka ua i toku au taeake i te rave i ta ratou i inangaro,” i karanga ai aia. “Mei te mea atura e tei ia ratou uaorai te tikaanga. Kua akaraanga kino pakari tikai te au turanga Pipiria. Kua reka mai au i te tu oraanga akatikatika ua o toku au oa apii.”

E Tarevake Ainei i te Akamanako Atu?

E tuatau rai tetai i roto i te oraanga o te tangata tata Pipiria ko Asapha e kua akamanako katoa aia me e pauna rai te taime i te akonoanga i tetai tu oraanga te akamareka ra i te Atua. “Iaku i vareae i  te aronga neneva, ka kite ei au i te meitaki o te aronga kino ra,” i tata ei aia. Kua karanga katoa aia e: “E tamā anga puapinga kore tikai toku e toku nei ngakau, e te orei anga oki i toku rima i te apa kore.”​—⁠Salamo 73:​3, 13.

Te taka meitaki ra e, te marama maira te Atua ko Iehova e, i tetai au taime ka ekoko rai te au tangata i te puapinga o te aruanga i tona au turanga. Ko te tika, kua maani aia kia rekotiia te au manako o Asapha ki roto i te Pipiria. I te openga ra, kua manako mai a Asapha e, ko te aruanga i te au ture a te Atua, te tu oraanga meitaki rava atuia. (Salamo 73:28) Akapeea aia i te tae anga ki te reira taopenga anga? I te akaraanga, e tangata kite pakari a Asapha. Kua akono aia i tana ikianga, kare e no te mea kua tupu tikai tetai tumatetenga kiaia, mari ra no te mea kua kite mai aia i te au apiianga mei te au tarevake o etai ke. (Salamo 73:​16-19) Ka rauka ainei ia koe i te rave katoa i te reira?

Tikaanga Tikai

Kare mei ia Asapha rai, kua kite mai tikai te Ariki ko Davida i te oraanga kino tei tupu ana ki te aronga e kopae ra i te au turanga a te Atua. Kua akaturi a Davida ki te vaine a tetai tavini ona e kua tauta aia i te uuna i tana au angaanga. Ei tupuanga, kua akamamae aia i etai ke, kapiti mai te Atua, e kua kite mai i te taitaia maata. (2 Samuela 11:​1–​12:23) I muri ake i to Davida tataraapa anga, kua akauruia aia e Iehova kia akakite mai i tona au manako na roto i te imene e kua vaio uaia te reira au tuatua i roto i te Pipiria ei puapinga no tatou. (Salamo 51:​1-19; Roma 15:⁠4) No reira e mea meitaki e te tau katoa ki te Pipiria kia apiiia mei te au tarevake o etai ke.

Kia tauturu ia koe i te aru i te akaraanga o Asapha e kia kopae i te au tarevake o Davida, e akamanako ana i te au manako o tetai au mapu mei te au enua tukeke e no tetai tuatau kua patoi i te au turanga Pipiria. Ko te tikaanga tikai, kua piri atu ratou ki roto i te pirianga ainga tau kore. Mei ia Davida rai, kua tataraara ratou i to ratou au tarevake e kua rauka akaou tetai turanga ma e te Atua. (Isaia 1:18; 55:⁠7) E akamanako ana i ta ratou i tuatua mai.

E Ara!: Eaa te au apinga tei akakeu i toou manako e taau au angaanga?

Deborah: “Kua kite mai au i te apii i te katoatoa e kua tu ratou i te au tane e te au vaine, e kua akaraanga mataora ratou. Me aru ana au ia ratou e te kite ra ia ratou e ongi ra e te takave ra, kua vareae mai au e kia maromaroa. E maata te taime ka moemoea ua au no runga i tetai tamaiti tikai e reka ana au. Kua akamaata atu teia i toku inangaro kia aru iaia e kia rave i tetai ua atu apinga kia akatupu i te reira inangaro.”

Mike: “Kua tatau au i te au puka e kua akarakara i te au porokaramu tei akangateitei i te pirianga ainga. I te pukapukaanga ki toku au oa no runga i te pirianga ainga, kua akamaata rava atu ia toku inangaro i te kite maata atu no te reira. E oti, me tae mai ana ki te taime e ko au ua rai e tetai tamaine, kua manako au e ka rauka ua iaku i te mirimiri iaia ma te kore e pirianga ainga, e ka rauka ua iaku i te tapu ua i tetai ua atu taime.

Andrew: “E akara putuputu ua ana au i te ravenga ainga viivii i runga i te Internet. Kua akamata au i te inu maata i te kava. E kua aere au ki te au tamataoraanga ma te au mapu kare takiri e akangateitei ana i te au turanga a te Pipiria no te tu akono tau.”

Tracy: “E 16 oku mataiti, ko te aru ua anga i taku tane te apinga puapinga maata anake ua kiaku. Kua kite oki au i roto i toku manako e e tarevake te pirianga ainga i mua ake te akaipoipoanga, inara kare au i rikarika ana i te reira. Kare au i akakoro ana i te akamata i tetai pirianga ainga i mua ake i te akaipoipoanga, inara, kua riro toku au manako ngakau i te akaaere i toku manako. No tetai tuatau, kare toku akava ngakau i kinokino ana.”

E Ara!: Kua mataora ainei koe i toou tu oraanga?

Deborah: “I te akamataanga, kua kite mai au i tetai manako navenave tikai no te tu rangatira e kua mataora au e kua aite atu au mei toku au oa rai. Inara kare te reira au manako ngakau i vai ua ana. Kua manako viivii mai au iaku uaorai, kare e tiama akaou, e te puapinga kore. Kua tataraapa tikai au e kua piri au ki te tane, ko tetai apinga kare e rauka akaou mai iaku. Mei te reira taime mai, e ui putuputu ana au kiaku uaorai e, ‘Koai au i te akamanakoanga e e kare au e kino?’ E ‘Eaa​—⁠eaa ra au i kopae ei i te au turanga takinga meitaki a Iehova?’ ”

Mike: “Kua akamata mai au i te manako e mei te mea rai e kua mate tetai tuanga iaku. Kua tauta au i te akamanako kore atu i te tupuanga o taku au  angaanga e akatupu ra ki runga i etai ke, inara kare i rauka ana iaku. Kua mamae au i te kiteanga e, i te kimianga i toku uaorai navenave, te akamamae ra au i etai ke. Kare au i moe meitaki ana. I te openga, kare e mataora akaou ana te navenave no te pirianga ainga, e te au manako ngakau mamae e te akama, ko te apinga maataia i roto i toku manako.”

Andrew: “Kua mama takiri mai i te rave i te au inangaro tarevake. Inara i taua taime ra, kua rokoia au e te au manako tataraara e kua mareka kore tikai au iaku uaorai.”

Tracy: “Kare i roa ana i muri mai i kite mai ei au i te tikaanga marikonga kore. Kua takino tikai te pirianga ainga tau kore i toku mapuanga. Kua manako oki au e ka mataora tikai maua ko taku tane. Kare maua i mataora ana. I te openga kua tamamae rai maua i tetai e tetai ki te mamae, taitaia, e te mamae ngakau. E aue ua ana au i te au po, i te akamanakoanga e naringa rai au i rave i te au mea na to Iehova arataa.”

E Ara!: Eaa taau akoanga ka oronga ki te au mapu te manako ra e e pakari tikai te au turanga a te Pipiria no te tu akono tau?

Deborah: “Kare toou oraanga e meitaki atu me akaruke koe i te au turanga a te Pipiria. E akamanako atu ana i to Iehova manako me aru koe i tana akoanga. E e akamanako pakari tikai i te au tupuanga no te kopae anga i tana akoanga. E akamaara, e kare taau au angaanga e akakeu ua ana ia koe e taau e inangaro ra. E akakeu katoa ana taau au angaanga i etai ke. E me kopae koe i ta te Atua akoanga, ko koe rai taau e akakino ra.”

Mike: “E tika, penei me akaraia atu, e akaraanga manea tikai te tu oraanga o to tatou au oa. Inara e akara meitaki tikai koe i te turanga i mua ake ka rave ei koe i tetai apinga. I roto i te au mea puapinga rava atu ta Iehova i oronga mai kia koe koia oki ko toou tu ngateitei e toou tu tiama. Kia titiri i te reira au apinga aroa no te mea kare i rauka ana ia koe i te tapu ia koe uaorai, ko te taakaaka tikai ia ia koe uaorai. E tuatua koe ki toou nga metua e ki tetai atu au tangata pakari no runga i toou au manamanata. Me rave koe i tetai tarevake, kia viviki koe i te akakite atu i te reira e kia akatikatika atu i te turanga. Me rave koe i te au mea na to Iehova arataa, ka rauka ia koe tetai tu au tikai.”

Andrew: “Me kare koe i rako tangata ake, ka manako rai koe e e mataora tikai te tu oraanga o toou au oa. Ka akakeu to ratou au tu ia koe. E no reira e iki meitaki tikai i toou au oa. E irinaki kia Iehova, e ka kopae atu koe i te au manako tataraapa.”

Tracy: “Auraka e manako e, ‘Kare te reira e tupu kiaku.’ Kua akanoo toku mami iaku ki raro e kua akakite tika mai kiaku e ka taopenga atu taku angaanga ki te mamae ngakau. Kua riri tikai au! Kua manako rai oki au e kua kite atu au. Kare au i kite. E aru i te au turanga a Iehova, e e akapiri atu ki etai e rave katoa ra i te reira. Ka mataora atu koe me na reira koe.”

Au Turanga Pipiria​—⁠Pereue Tapu Rima me e Ruru Nooanga Motoka?

Me aviri mai toou au oa ia koe no te tautaanga i te aru i te au turanga a te Pipiria, e ui koe kia koe uaorai e: ‘Eaa ratou i patoi ei i te manako no te aruanga i te ture a te Pipiria no te tu akono tau? Kua tatau ainei ratou uaorai i te Pipiria e kua akara meitaki tikai ainei i te au puapinga tei tupu mai mei te akarongo anga ki te au ture a te Atua? Kua akamanako meitaki tikai ainei ratou i te au tupuanga no te kopaeanga i te reira au turanga? Me kare, penei, kua aru patete ua ainei ratou i ta te katoatoa e rave ra?’

Penei kua kite mai koe i te au tangata tei “aru [ua] i te urupu tangata.” (Exodo 23:⁠2) Kare ainei koe e inangaro e kia meitaki atu i te reira? Akapeea koe i te raveanga i te reira? Na te aruanga i te akoanga a te Pipiria kia “taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:⁠2) E “Atua” mataora a Iehova, e te inangaro ra ia koe kia mataora katoa. (1 Timoteo 1:11; Koheleta 11:⁠9) Te au turanga tei rekotiia i roto i te Pipiria, e puapinga rai noou. E tika, ka rauka ia koe i te akamanako atu i te reira ei pereue tapu rima te kotinga ra i toou tu rangatira. Inara, ko te tikaanga, mei tetai ruru nooanga motoka rai te ture a te Pipiria no te tu akono tau, tei tauturu i te paruru i tetai tangata mei te kino.

Ma te papu, ka rauka ia koe te irinaki i te Pipiria. Me iki mai koe i te aru i ta te reira au turanga, kare e ka akamareka anake ua koe i te Atua, mari ra ka puapinga katoa koe i te reira.​—⁠Isaia 48:⁠17.

[Tataanga Rikiriki i Raro]

KIA AKAMANAKO

▪ Eaa te ka akangata ia koe kia kore koe e aru i te au turanga a te Pipiria?

▪ Eaa koe ka anoanoia ai i te akapapu kia koe uaorai e ko te aruanga i te au turanga a te Atua ko te tu oraanga mataora rava atuia?