Ka Rauka Ainei ia Koe te Irinaki i te Ako a te Pipiria?

‘Ka irinaki ainei au i ta teia tangata e akakite maira kiaku?’ Penei ka ui koe i taua uianga ra kia koe uaorai me tauta tetai tangata okooko i te oko mai tetai motoka kua akaoroia ana kia koe me kore me papau mai tetai tangata poritiki i roto i tetai kamupeini ikianga i tetai au taputou. Kare koe inangaro i te kaimoumou moni me kore i te taime ki runga i te au apinga e te tuatua kare e puapinga.

PENEI ka manako katoa rai koe e: ‘E apinga puapinga ainei tetai i roto i te Pipiria noku kia apii? Me tatau e me apii au i taua puka ra, ka rauka ainei iaku te irinaki e ka paunaia toku taime e te maroiroi?’ Te pauanga ki taua au uianga ra tei roto i tetai irava i roto i te Pipiria uaorai: “Ka tu te pakari me kore ka inga i tana uaorai au angaanga.” (Mataio 11:19, Phillips) Ae, na te au mea ka rauka mai i te tangata mei te akono anga i tetai tu akoanga, me kore i te “pakari,” e akapapu mai e me e puapinga rai to taua akoanga ra. Te ka aru mai e au akakiteanga na te aronga uaorai tei akataka i tetai tuatau i te apii i te Pipiria. Ka tauturu ta ratou au tuatua ia koe kia iki e me ka tau rai kia tatau e kia apii koe i taua puka umere ra.

Au Uianga no te Mate e te Oraanga a Muri Atu

Tetai taime akenei, kua mate te mama o Karen. E noo ana a Karen i Marike e, mei te tamarikianga mai kua irinaki aia e ka aere te au tangata meitaki pouroa ki te rangi me mate. E meangiti ua rai te pumaana ta teia irinakianga i apai mai nona. Kua akamanako aia e: ‘Mei teaa ra te tu o toku mama, i na tei te rangi aia i teianei? Akapeea ra au e kite ei iaia me tae au ki reira, me ka tae oki au ki reira? Me mate au, ka taopenga atu ainei au ki tetai ngai ke?’

Kua akamata a Karen i te apii marie i te Pipiria ki te Au Kite o Iehova. Kua apii aia e kare tei mate i runga i te rangi mari ra mei te mea rai e te moe tinainai ra. “Te aronga i mate ra kare a ratou apinga i kite,” e akakite ra a Koheleta 9:5. (NW) Akapeea ra i reira no runga i te kite akaou anga i tona mama?

Kua riro te akakiteanga taka meitaki a te Pipiria ka aru mai ei oronga i te pumaana e te manakonakoanga nona: “Auraka e poitirere ua i te reira: te vaitata mai nei oki te ora, e akarongo ei te aronga katoa i roto i te rua i [to Karaiti] reo, E kua aere mai ki vao.” (Ioane 5:​28, 29) Kua apii a Karen e na roto i tana Tamaiti, e akaora akaou mai ei te Atua o te Pipiria i tei mate ki runga nei tikai i te enua. “Te mako meitaki ua ra te au apiianga a te Pipiria no runga i te mate e te tuakaouanga,” i tuatua ai aia.

Teea te Arataa Tika no te Akamorianga?

I te tae anga a Angela, e tamaine Romania, ki te 14 mataiti, kua pure tetai orometua Penetekote nona kia rauka iaia te vaerua tapu, e kua akamata aia i te tuatua i te au reo ke. Inara kua manako tona nga metua e, kare te au apiianga a te Penetekote e au ana ki te Pipiria. Kua akamutu te pamiri i te aere ki te pure e kua akamata i te apii i te Pipiria ki te Au Kite o Iehova.

I te akamataanga kua taitaia rai aia, kare ra i roa kua kite a Angela i te au tu tuke i rotopu i te au peu matau a tana akonoanga mua e te au apiianga a te Pipiria. Ei akaraanga, kua tatau aia ia Ioane 17:3, e akakite ra e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” Kua kite a Angela i reira e ko te aronga ka rauka te akaperepereanga a te Atua ka anoanoia kia kite no runga iaia na mua. “Akapeea ake i rauka ai iaku te  vaerua o te Atua na roto i tetai mataara takake rava mei te mea e vaitata rai e kare roa aku apinga i kite no runga iaia?” i ui ei aia. Te karanga ra a Angela e, “Te akameitaki nei au ia Iehova no tei tauturu mai iaku kia kite i te arataa no te akamorianga mou na roto i tana Tuatua akauruia.”

Akoanga e Taui ra i te au Oraanga

“E tangata riri vave ua au,” e karanga ra a Gabriel, e tangata noo i Initia. “Me akamaituia mai, ka vaa pu ua au, ka pepei i te au apinga, e ka tanga katoa atu ki runga i te tangata. Na te Pipiria i tauturu iaku kia tapu i toku riri. Noatu i roto i te au turanga kino, e muteki ua ana au i teianei.”

Kua tatau a Gabriel i te au irava mei ia Maseli 16:32, e akakite ra e: “Te kore e rapurapu i te riri ra, e meitaki maata tona i to te aronga ririnui; e tei vi tona uaorai vaerua, i tei pou iaia te oire.” Te karanga ra a Dhiraj, tetai tangata ke mai tei rauka i te akakore i te tu riririri e, “Kua tauturu taua irava rai iaku kia kite e me riri vave au e akairo te reira no te tu paruparu, kareka te tapu marie i te reira e akapapuanga ia no te ngakau toa.”

E mema a Philip no tetai pupu tangata kino i Aperika Apatonga. Kua riro te ta, te keikeia, e te tuatua viivii ei tuanga no tona tu oraanga. Kua pou iaia tetai tuatau i roto i te are auri no tana au angaanga aati ture. Noatu ra tona tu oraanga, te nakunaku ua ra a Philip kia kite no runga i te Atua. Muri ake i tona akamata anga i te apii i te Pipiria ki te Au Kite o Iehova, kua tupu te anoano kia tavini i te Atua e kua manako aia e kia akamako i tona oraanga. Kua akamutu aia i te rave i tana au angaanga kino e kua momotu i tona pirianga ki tona au oa aati ture. Eaa te au tuatua mou o te Pipiria tei akakeu iaia kia rave i taua au tauianga ra?

Kua akaari te Au Kite o Iehova kiaia i te au tuatua a Iesu tei kiteaia i roto ia Ioane 6:44. Te tatau ra te reira e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” Karanga a Philip e, “kua kite a Iehova i tetai apinga meitaki i roto iaku e kua akaariu mai iaku ki tona iti tangata, koia oki teia taokotaianga taeake umere tikai.” Kua tamou marie katoa a Philip i te au papaanga Pipiria no runga i to Iehova aroa i te aronga ara tei tataraara tikai. “Teia au papaanga,” i karanga aia a Philip, “kua riro ei tauturu iaku kia kite i to Iehova tu tau i te akonoanga i te au tangata ara tei tataraara.”​—⁠2 Samuela 12:​1-14; Salamo 51.

E taangaanga tau kore ana tetai mapu tane Autireria ko Wade te ingoa, i te kava e te au apinga akakona, te peti, e e maata katoa tona au pirianga ainga tau kore. Inara kare aia e mataora ana. Tetai ra kua pukapuka atu aia ki te Au Kite o Iehova e kua ariki i tetai apiianga Pipiria i te kainga kare e tutaki. Eaa ta Wade i mou mai?

“Kua umere tikai au i to Iesu tu i te akonoanga i etai ke,” i karanga ai a Wade. “Kua akaari aia i te tu takinga meitaki, te ngakau aroa, e te aroa ki te katoatoa, kapiti mai te tamariki. Te maata atu i taku i kite, ko te maata atu ia toku inangaro kia aite mei iaia rai. Kua apii mai te Pipiria iaku e akapeea e riro ei ei tangata tikai, e akapeea me taui toku tu kia meitaki roa atu.” Akapeea i reira te au mea kino pouroa tana i rave? Kua na ko atu rai a Wade e: “Kua apii mai te Pipiria iaku  e me tataraara au no taku au ara e me taui i toku tu, ka akakore mai te Atua i taku ara. E tika e, ka rauka iaku kia noo e mutu kore ua atu i runga nei te enua parataito. I te openga iora kua rauka iaku tetai manakonakoanga no te tuatau ki mua!” (Mataio 5:⁠5) Kua akamako a Wade i tona oraanga e te akamori nei ia Iehova ma te akava ngakau ma.

Ko te au akakiteanga taau i tatau akenei no ko mai i te aronga tei inangaro kia meitaki atu to ratou oraanga. Kua kimi marie ratou ki roto i te Pipiria kia kite e me ka rauka i tana au apiianga i te tauturu ia ratou i to ratou au manamanata e te pau i ta ratou au uianga. Kua riro te au mea meitaki tei rauka mai ia ratou ei akapapu kia ratou e ka rauka ia ratou te irinaki i te aratakianga tau a te Pipiria. E ka rauka katoa ia koe.

Te tatau ra tetai tuatua akauruia mei ito mai e: “E ao to te tangata i kitea iaia te pakari, e te tangata i rauka iaia te kite ra: Ko te apinga oki i oko naʼi aia ra, e meitaki maata ïa i to te ario; e kia maata oki aia ra, e meitaki maata ïa i to te auro meitaki ra. E meitaki maata tona i to te poe: e te au mea katoa i inangaroia e koe ra, kare rava ïa e aite kiaia. E au rā roa tei tona rima katau; te apinga nui e te akangateitei, tei te rima kaui ïa. Tona au arataa, e arataa mataora ïa; e e au tei tona ra au aerenga katoa. Ko te rakau ora aia i te aronga e opu iaia; e ko tei tāpu iaia, e ao tona.”​—⁠Maseli 3:​13-18.

[Pia/​Tutu i te kapi 25]

TAUTURU TE PIPIRIA I TETAI MOUAURI

Tetai tangata ko Bill te ingoa, e oraanga akaipoipo mataora tikai tona. Inara i mua ake i te ra akamaaraanga mua o tona akaipoipoanga, kua peke aia ki roto i te are auri no tetai angaanga kino tana i rave i te au mataiti i muao.

I muri ake i te ngaro anga te ngakau taitaia no tei kore tona turanga rangatira, kua manako a Bill e kia akapuapinga meitaki i tona tuatau i reira. “E noo ua ana au i runga i toku roi i te tatau e te apii i te Pipiria,” i karanga ai aia. E taangaanga katoa ana aia i tana e apii ra. “E takinga meitaki ana au e te akaoaoa atu ki toku au oa mouauri, tei kite ua e kare au e inangaro i te rave i te au mea kino e rave ra ratou. E karanga ana ratou no runga iaku e: ‘Te inangaro ra a Bill i te akapou i tona taime na te mataara tana uaorai i inangaro, kia kite i te Atua e te Pipiria. Kare aia e akatupu pekapeka mai ana ki tetai ua atu.’

“No toku rongo, kare te au mouauri e akao atu ana iaku ki roto i te au manamanata, e tetai atu au turanga tau kore. Kua kite te au tiaki e kare au e akatupu pekapeka kia ratou. I te openga kua tuku ratou iaku ki te au angaanga ka akatakake mai iaku mei te pupu maata o te au mouauri no te maataanga o te ra. Kua riro te taangaanga anga i te Pipiria i roto i toku oraanga ei paruru maata.”

E aere ana a Bill ki te au uipaanga a te Au Kite o Iehova e raveia ana i roto i te are auri e kua akakite maroiroi atu ki te au mouauri i te au mea tana e apii ra. Koia tetai tei papetitoia ei Kite no Iehova iaia e akapou ra i tana utunga. I te akamaaraara anga, kua karanga aia e: “Kua kaimoumou tikai au vaitata rai e 50 mataiti o toku oraanga, e kua inangaro au i te akameitaki atu i te reira. Papu iaku e ko te mataara ua rai e rauka ai i tetai mouauri i te rave i te reira koia oki na te taangaanga anga i te au apiianga a te Pipiria. E ko te mataara e kite meitaki ei i te Pipiria ko te apii ki te Au Kite o Iehova. Na ratou ua rai te akonoanga e apii ana i te tuatua mou o te Pipiria. Kare i te angaanga maata.”

Teianei tei vao aia, te tavini maroiroi nei a Bill i roto i tetai putuputuanga o te Au Kite o Iehova i Marike. Te apii ua nei rai raua ko tana vaine i te Tuatua a te Atua e te tarotai ra ki ta te reira au apiianga. Te ariki rekareka nei raua i te manako tei kiteaia i roto ia Isaia 48:​17, 18 e: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”

[Tutu i te kapi 23]

Karen, Marike

[Tutu i te kapi 23]

Angela, Romania

[Tutu i te kapi 24]

Dhiraj, Initia

[Tutu i te kapi 24]

Gabriel, Initia

[Tutu i te kapi 24, 25]

Philip e tona pamiri, Aperika Apatonga

[Tutu i te kapi 24]

Wade, Autireria