TE ROTAI ra te au tuatua a Shakespeare ki te au manako o te Ariki ko Solomona o Iseraela i taito, tei tata mei etai 3,000 mataiti i topa e: “Ka irinaki ua te neneva i tetai ua atu apinga; e matakite ana te au tangata kite i to ratou takainga.” (Maseli 14:15, Today’s English Version) Ae, e neneva ua rai te ka aere manako kore ua i roto i te oraanga i te arikianga i te au mea ravarai tana i akarongo, i te akatumuanga i tana au ikianga e te au angaanga ki runga i te akoanga puapinga kore me kore te au apiianga kare e tumuanga. I te tuku tarevake anga i to tatou irinaki​—⁠mei te takai anga ki runga i te au vaanga rakau pe​—⁠ka taki atu ki te mate. Penei ka manako mai koe e, ‘E tumuanga tikai ainei tetai no te aratakianga ka tau tatou kia irinaki?’

E mirioni ua atu te au tangata takapini i te ao nei tei tuku i to ratou irinaki pu tikai ki roto i tetai puka taito tei kapikiia e ko te Pipiria Tapu. Te irinaki ra ratou i teia puka kia arataki i to ratou au takainga. Kua akatumu ratou i ta ratou au ikianga ki runga i ta te reira akoanga e kua akarotai atu i ta ratou au angaanga ki ta te reira au apiianga. Ei tuatua akatutuanga, te takai ra ainei te reira au tangata ki runga i te au vaanga rakau pe? Te pauanga ki te reira uianga tei runga te maataanga i te pauanga ki tetai uianga akaou, E au tumu tau ainei tetai kia irinaki i te Pipiria? Te akara matatio nei teia itiu takake o te makatini E Ara! i te akapapuanga.

Kare te akakoroanga o teia itiu o te makatini E Ara! e kia maro i te au irinakianga me kore te au manakoanga akonoanga ki runga ia koe. Mari ra, kua akakoroia kia oronga ua atu i te akapapuanga pakari tei akapapu ki te au mirioni ua atu e ka tau ratou kia irinaki i te Pipiria. I muri ake i te tatauanga i te au atikara e aru mai nei, naau rai e iki noou uaorai me ka tau koe i te irinaki i te Pipiria.

Ka tau teia tumu manako kia akamanako oonuia atu. No te mea, me e tumuanga tau tikai to te Pipiria kia irinakiia ei aratakianga mei ko i Tei Anga mai ia tatou, e mea puapinga rai noou e te aronga tei akaperepereia e koe kia akamanako i ta te Pipiria e akakite maira.

Inara, ko te apinga mua, ka taiku atu matou i tetai au tikaanga takake rava no runga i te Pipiria. Kare e ekokoanga, e e puka umere rava atu tikai te reira.