Te Manako o te Pipiria

Naai i Atu i te Pipiria?

TE AKAKITE tika ua maira te Pipiria e naai i tata i te au tataanga. E maata te au tuanga o teia puka tei akamata ma te au takiato tuatua e “te tuatua a Nehemia,” “te orama a Isaia,” e “te tuatua a Iehova i tae mai kia Ioela.” (Nehemia 1:1; Isaia 1:1; Ioela 1:⁠1) Tetai au tuatua enua tikai kua akatakaia ei tataanga na Gada, Natana, me kore na Samuela. (1 Paraleipomeno 29:29) Te au tataanga i runga ake i te au Salamo e manganui, te akataka maira i te aronga tei atu i te reira.​—⁠Salamo 79, 88, 89, 90, 103, e te Sal 127.

No te mea kua taangaangaia te au tangata kia tata i te Pipiria, te karanga ra te aronga ekoko e e tataanga ua te reira i te kite pakari o te tangata, mei tetai puka ke rai. Inara e tumuanga meitaki ainei to te reira manako?

A Ngauru Aronga Tata, Okotai Atu

Kua akakite mai te maataanga o te aronga tata i te Pipiria e kua tata ratou i roto i te ingoa o Iehova, te Atua mou, e nana me kore na tetai angera i arataki ia ratou. (Zekaria 1:​7, 9) Kua akakite mai te au peroveta tei tata i te au Tuatua Tapu Epera e 300 taime e tere atu e: “Te na ko mairā Iehova.” (Amosa 1:3; Mika 2:3; Nahuma 1:12) Kua akamata te maataanga o ta ratou tataanga ma te au takiato tuatua e “te tuatua a Iehova i tae mai ia Hosea.” (Hosea 1:1; Iona 1:⁠1) No runga i te au peroveta a te Atua, te akakite maira te apotetoro ko Petero e: ‘Te au tangata tapu ra o te Atua tei tuatua i ta te vaerua tapu i tuku mai ia ratou ra.’​—⁠2 Petero 1:⁠21.

Te Pipiria, e maata tona au tuanga inara e puka rotai te reira e kua tataia e te au tangata e manganui tei akakite mai e ko te Atua te tumuanga o ta ratou au tataanga. Tera te aiteanga, kua taangaanga te Atua i te au tekeretere tangata kia tata i tona au manako. Akapeea aia i te raveanga i te reira?

‘Akauruia Mai e te Atua’

“Te au tuatua tapu katoa i tataia ra, e mea akauruia mai e te Atua,” i akamarama mai ei te apotetoro ko Paulo. (2 Timoteo 3:16) Te tuatua Ereni tei uriia e e “akauruia mai e te Atua” tona  aiteanga tikai “kua akapuangi te Atua.” Koia oki, kua taangaanga te Atua i tetai mana kitea koreia kia akakeu i te au manako o te au tangata tata, i te akakiteanga i tana karere kia ratou. Inara, no runga i te Ture Ngauru, na Iehova tikai i tata i te au tuatua i runga i te nga papa toka. (Exodo 31:18) Tetai taime kua akakite tika atu te Atua i tana karere ki tona au tavini tangata. Te karanga ra a Exodo 34:27 e: “Kua tuatua mairā Iehova kia Mose, E tata koe i taua tuatua nei . . . ”

I tetai au atianga, kua maani te Atua i te au tangata kia kite i te au orama no runga i tana i inangaro ia ratou kia tata ki raro. No reira i karanga ai a Ezekiela e: “E kite atura au i te orama a te Atua.” (Ezekiela 1:⁠1) Pera katoa, “e moe ta Daniela i kite, e te orama upoko nona ra ki runga i tona roi: e kua tata iora aia i taua moe ra, e kua akakite atura i taua tuatua ra.” (Daniela 7:⁠1) Te puka openga o te Pipiria, ko Apokalupo, kua akakite katoaia mai na roto i teia mataara. Kua tata a Ioane e: ‘I riro au i te vaerua i te rā o te Atu ra, e akarongo akera au i tetai reo maata i muri ake iaku, mei te tangi pu ra, I te na ko anga mai e, taau e kite nei, e tata ki roto i tetai buka.’​—⁠Apokalupo 1:​10, 11.

Te tu Tangata

Kare te akauruanga a te Atua i apai ke i te tu tikai o te tangata tataki tai. Ko te tikaanga, kua umuumuia te tautaanga uaorai kia tata i te karere a te Atua. Ei akatauanga, te karanga ra te tangata tata o te puka Pipiria o Koheleta, e kua kimi aia “kia kitea te tuatua te ka ārikiia ra: e ko tei tataia ra, e mea tiratiratu ïa, e te tuatua-mou.” (Koheleta 12:10) I te akapapaanga i tana rekoti tuatua enua, kua taangaanga a Ezera e 14 au puka ke atu, mei te “tuatua no te au rā a te ariki ra a Davida” e “te tuatua a te au ariki o Iuda e no Iseraela ra.” (1 Paraleipomeno 27:24; 2 Paraleipomeno 16:11) Kua tata te tangata tata Evangeria ko Luka e ‘kua kitea puia e au te au tuatua katoa mei muatangana mai, e mea tika kia tata akapapa atu i taua tuatua ra.’​—⁠Luka 1:⁠3.

Te akakite maira tetai au puka Pipiria i tetai au tua o te tu tikai o te tangata tata. Ei akaraanga, ko Mataio, e tangata koi tero i mua ake i tona riro mai anga ei pipi na Iesu, e tangata akara meitaki aia i te au tareanga. Koia anake ua te tangata tata Evangeria tei tata i te moni oko o to Iesu pikikaaia anga e “nga moni e toru ngauru.” (Mataio 27:3; Mareko 2:14) Kua rekoti tika mai te taote ko Luka i te au akatakaanga pae rapakau maki. Ei akatauanga, i te akamarama mai anga i te turanga o tetai aronga ta Iesu i akaora atu, kua taangaanga aia i te au tuatua mei te “vera maata” e ‘kua pini rava i te lepera.’ (Luka 4:38; 5:12; Kolosa 4:14) E no reira kua akatika putuputu a Iehova i te aronga tata kia akakite mai i to ratou uaorai manako i roto i ta ratou uaorai au tuatua e ta ratou uaorai tu tataanga; inara, i taua taime rai, kua arataki aia i to ratou au manako kia tano meitaki te tataanga e kua akakite mai i tana karere.​—⁠Maseli 16:⁠9.

Te Pipiria Katoa

Kare ainei i te mea umere e kua rauka mei tetai 40 tangata e tata ra i roto i te au enua e manganui, no te 1,600 tuma mataiti te roa, i tata i tetai puka tei rotai pu tikai i roto i te au tuanga ravarai e te vai ra i roto i tetai upoko tuatua manea kare e tauianga? (Akara i te “No Runga te Pipiria i Teaa?” kapi 19.) Kare teia e rauka naringa kare ratou i arataki katoatoaia e te Atu okotai.

Kua anoanoia ainei te Atua kia taangaanga i te au tangata kia tata i tana Tuatua? Kare. Inara i tana raveanga i te reira, e akakiteanga te reira i tona kite pakari. E tika, ko tetai tumu e reka ana te maataanga o te au tangata i te Pipiria koia oki, te akakite papu maira tana aronga tata i te au tu manako ngakau ravarai o te tangata nei​—⁠no runga i te Ariki ko Davida, i te akakite mai anga i te apa o tetai tangata ara tei tataraara tei pati atu i to te Atua aroa.​—⁠Salamo 51:​2-4, 13, 17, tataanga i runga ake.

Noatu e kua taangaanga a Iehova i te au tangata tata, ka rauka katoa ia tatou i te irinaki papu ki roto i ta ratou tataanga mei te au Kerititiano mua rai, tei ariki i te au Tuatua Tapu ‘kare ei tuatua na te tangata, ei tuatua ra na te Atua, e koia tika rai oki.’​—⁠1 Tesalonia 2:⁠13.

I MANAKO ANA AINEI KOE?

▪ Koai tei Atu i te “tuatua tapu katoa”?​—⁠2 Timoteo 3:⁠16.

▪ Eaa te au ravenga ta te Atua ko Iehova i taangaanga kia oronga mai i tona au manako?​—⁠Exodo 31:18; 34:27; Ezekiela 1:1; Daniela 7:⁠1.

▪ Akapeea te tu tikai e te au inangaro o te aronga tata akauruia, i te akaataia anga i roto i ta ratou i tata ei?​—⁠Mataio 27:3; Luka 4:38.