Tua Maani ua me e Tika Tikai?

Kua apii te tangata pakari ko Timoteo i te aronga inangaro i te akamori i te Atua mou auraka e akono atu i te “au manako tuke ake rai” e te “au tua maani ua.” (1 Timoteo 1:​3, 4, Byington) Te anoanoia ra ainei taua akamatakiteanga no teia tuatau? Ae, no te mea te riro nei te au manako tarevake no runga i te Pipiria e tana au apiianga ei akaariu ke i te tangata mei te akamorianga mou. Tei raro akenei tetai au manako matauia no runga i te Pipiria. Akara i te au tuatua mei roto mai i te Pipiria uaorai. Ka tauturu teia ia koe i te akatakake mai i te tua maani ua mei te tika tikai.

▪ Tua maani ua: Kare te au temeio Pipiria e rauka i te akatupu.

Tika tikai: E maata tikai te ka anoanoia te tangata kia apii no runga i te au mea ta te Atua i anga. Kare rava e taineti e rauka i te akamarama mai te katoaanga o teia mea e gravity, i te akataka tika mai tikai i te au tuanga katoatoa o tetai atom, me kore i te akamarama mai i te tu tikai o teia mea e taime. “E kitea ainei te Atua ia koe kia kimi? e kitea puia ainei te Mana katoatoa ia koe?” (Iobu 11:⁠7) I te mea e kare rava e pou ia tatou kia marama pu tikai i te au mea i angaia, te maata ua maira te tu matakite o te au taineti tukatau tikai no runga i te tuatua anga e kare tetai apinga e rauka i te akatupu.

▪ Tua maani ua: Te arataki ra te au akonoanga katoatoa ki te Atua.

Tika tikai: “I tāpu tika kotou i taku tuatua,” i tuatua atura a Iesu, “e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:​31, 32) Me te arataki ra te au akonoanga katoatoa ki te Atua, ka anoanoia ainei to ratou au mema kia akarangatiraia mai? Ko te tika, kua apii mai a Iesu e e iti ua rai te tangata i runga i “te ara, e tae atu ei ki te ora.”​—⁠Mataio 7:​13, 14.

▪ Tua maani ua: Ka aere pouroa te au tangata meitaki ki te rangi me mate ratou.

Tika tikai: “Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira. E tiaki atu ia Iehova, e akono tikai i tona arataa, e nana koe e akateitei kia rauka ia koe te enua.” (Salamo 37:​11, 29, 34) E 144,000 ua rai au tangata akarongo mou ka aere ki te rangi. Ta ratou tukuanga angaanga i oronga te Atua koia oki kia “tutara ratou ei au ariki i rungao i te enua nei.”​—⁠Apokalupo 5:​9, 10, NW; 14:​1, 4.

▪ Tua maani ua: Kare o te “Koreromotu Taito” puapinga akaou no te au Kerititiano.

Tika tikai: “Te au tuatua tapu katoa i tataia ra, e mea akauruia mai e te Atua, e e mea meitaki.” (2 Timoteo 3:​16, 17) “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:⁠4) Te “Koreromotu Taito,” te au Tuatua Tapu Epera, te tumu mou tikai no te au ikuikuanga pae vaerua e te oronga maira kia tatou i te au tumuanga tau no te akarongo i roto i te “Koreromotu Ou,” koia te au Tuatua Tapu Ereni Kerititiano.

▪ Tua maani ua: Te maataanga o te puka Genese, kapiti mai te papaanga no runga ia Adamu raua ko Eva, e akatutu ua te reira.

Tika tikai: Te papaanga o Iesu tei akamata mai mei ia Adamu na te tangata tata Evangeria na Luka i tata. (Luka 3:​23-38) Me e tua maani ua a Genese, i teea ngai i reira i roto i te papaanga te au ingoa tika tikai i akamutu ei, e te au ingoa tei karangaia e e tua ua, i akamata mai ei? Kua irinaki a Iesu, tei noo ana i te rangi i mua ake ka aere mai ei ki te enua nei, i tei tataia i roto ia Genese, tei kapiti mai i te papaanga o Adamu raua ko Eva. (Mataio 19:​4-6) No reira, ko te akaekoko ia Genese, tera te aiteanga te akaekokoia ra rai to Iesu uaorai tu tau tikai kia irinakiia, e pera katoa to te manganui o te aronga tata Pipiria.​—⁠1 Paraleipomeno 1:1; 1 Korinetia 15:22; Iuda 14.