Te Manako o te Pipiria

Eaa Tikai te Aiteanga o te Taoonga Upoko i Roto i te Akaipoipo?

I ROTO i te au enua e manganui, te au angaanga akaipoipo e kapiti ua mai ana te au papauanga koreromotu e ka taputou te vaine i te akarongo atu ki tana tane. Inara, e manganui te au vaine e patoi ra i te manako e ko te tane te upoko i roto i te akaipoipo. E akamanako ana i ta te Pipiria e apii maira no runga i teia tumu tuatua. Ka kite mai koe e to te reira turanga e mea papaki tai kore e te tau.

Taoonga Upoko Mei Tei Akatakaia e te Atua

Te tumu akatakaanga a te Pipiria no te taoonga upoko, ka kiteaia ia Ephesia 5:​22-24: “E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra.  Ko te tane oki te upoko o te vaine, mei te Mesia katoa ra te upoko ïa i te ekalesia . . . E teianei mei te ekalesia e kauraro i te Mesia nei, koia katoa oki te au vaine ki ta ratou uaorai au tane i te au mea katoa nei.” Ei “upoko o te vaine,” ko te tane te ka akono i te aratakianga i roto i te pamiri, ma te vaine e aru ra i tana aratakianga e te akangateiteianga i tona taoonga upoko.​—⁠Ephesia 5:⁠33.

Kua kotingaia te mana o te tane i tona uaorai kauraroanga ki te Atua e kia Karaiti. Kare ona tikaanga i te arataki i tana vaine kia aati i te au ture a te Atua me kore kia akaoko i tona uaorai akava ngakau tei tereniia e te Pipiria. Inara, i roto i teia au kotinga anga, kua oronga te Atua kiaia i te apainga no te akonoanga i te au tukuanga tika puapinga maata no te pamiri.​—⁠Roma 7:2; 1 Korinetia 11:⁠3.

Te akaue maira te Pipiria i te tane kia taangaanga karapii kore i tona taoonga upoko, i te tukuanga i te anoano o tana vaine i mua ake i tona uaorai. Te karanga ra a Ephesia 5:25 e: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” Ko tetai tane tei aru i te akaraanga teitei rava o Karaiti no te aroa, te kopae ra i te taangaanga anga i te taoonga upoko no tona uaorai au inangaro.

Pera katoa, te ikuiku maira te Pipiria i tetai tangata kia noo ki tana vaine “ma te kite.” (1 Petero 3:⁠7) E maata atu te o maira i te kite ua anga i te au tuke i te pae kopapa e te pae manako ngakau i rotopu i te tane e te vaine. Kia rauka iaia te maramaanga o te au anoano o tana vaine.

“Koia Oki Toou Tokorua”

Te umuumu maira ainei te kauraroanga a te vaine kia noo muteki ua aia? E akamanako ana ia Sara, tei taikuia i roto i te Pipiria ei akaraanga no te akarongo anga ki tana tane, ia Aberahama. (1 Petero 3:​5, 6) Kua kauraro aia iaia uaorai kiaia i roto i te au mea puapinga e te au mea rikiriki, mei te akarukeanga i tetai kainga meitaki tikai no tetai oraanga ori aere ua i te nooanga i roto i te au puakapa ki te akapapa vivikianga i tetai kai. (Genese 12:​5-9; 18:⁠6) Inara, no runga i tetai mea puapinga, kua ripiti ua rai aia i tetai manako tei tuke ki to Aberahama. Kua tupu teia i tona inangaro anga ia Aberahama kia tuku i tona tavini vaine ko Hagara, e tana tama mua, ko Isemaela kia akaruke i te ngutuare. Kare oki i ako ana ia Sara, kua akakite te Atua kia Aberahama kia ‘akarongo ki te reo o Sara.’ I taua taime ra, kua kauraro ua atu rai a Sara kia Aberahama i te tiaki anga iaia kia rave i tetai angaanga, kare oki aia uaorai i tauta ana i te tuaru ia Hagara raua ko Isemaela.​—⁠Genese 21:​8-14.

Te akaari maira te akaraanga o Sara e kare aia i aru patete ua atu i tana tane, kia riro te vaine ei “tokorua” no tana tane, i te akonoanga i tetai turanga ngateitei. (Malaki 2:14) Ei tokorua nona, ka oronga aia i te au manako puapinga no runga i te au ikianga pamiri, e kua orongaia tetai tuanga mana i roto i te pamiri, i te akono putuputu anga i te au mea e manganui o te ngutuare e tetai au mea katoa i te pae moni. E tika, ei upoko no te pamiri, tei runga i te tane te apainga no te akonoanga i te au ikianga openga.​—⁠Maseli 31:​10-31; 1 Timoteo 5:⁠14.

Akangateitei no Tei Anga Mai

Kua anga te Atua ko Iehova i te tane e te vaine, e kua akanoo i te akaipoipo ei kapitianga tapu i rotopu ia raua. (Genese 2:​18-24) Kua akataka meitaki katoa mai aia i te au tuanga takake no te tane e te vaine te ka oronga mai kia raua i te rekareka maata rava.​—⁠Deuteronomi 24:5; Maseli 5:⁠18.

I te mea koia Tei Akatumu i te akaipoipo, tei ia Iehova te tikaanga e te tu kite katoa i te akanoo i te au turanga no te akanoonooanga o te akaipoipo. Te au tokorua akaipoipo tei akatupu i ta raua tuanga tataki tai e tei aru i te akanoonooanga a te Atua no te taoonga upoko, kare anake ua no te tumu e e mea tau, mari katoa ra ei akangateitei anga i tona mana taoonga ei Atua, ka rauka tana akaperepereanga e te turuanga.

KUA MANAKO ANA KOE?

▪ Koai tei akanoo i te akaraanga meitaki rava no te taoonga upoko?​—⁠Ephesia 5:⁠25.

▪ Te kotinga ra ainei te Atua i te mana o te tane?​—⁠1 Korinetia 11:⁠3.

▪ Eaa te akakoroanga o te akaipoipo e te akanooanga no te taoonga upoko?​—⁠Maseli 5:⁠18.

[Tutu i te kapi 28]

Te taoonga upoko tei taangaangaia kia tau ki te akaraanga o Karaiti te taki atura ki te mataora e te merengo anga no nga tokorua