Mei ta Tatou Aronga Tatau

Te Araka o Noa e te Parani Maani Pai (Tianuare 2007) Kua kite ua ana au e e mea umere tikai te araka i te maani angaia, inara kare au i marama ana e mei teaa tikai te meitaki i tona maani angaia. Te akataka maira teia atikara na roto i tetai tu ngoie ua i te marama e akapeea te roaroa, te atea, e te teitei i te akariroanga i te reira kia tau tikai i te teretere na te moana. Kua manako mai au i te maani i tetai akatutuanga o te araka ma te au mapu i roto i to matou putuputuanga, i te taangaanga anga i te tutu e orongaia maira. Kua maani matou i te au animara origami (akatutuanga pepa) e kua tuku matou i te reira ki roto i te araka e kua toro matou i te au tutu o Noa e tona pamiri. Kua maata atu to matou kite no runga i teia tupuanga Pipiria na te raveanga tikai i te reira. Meitaki maata tikai.

T. A, Tiapani

E reka ana taku tamaiti e ono mataiti i te maani i te au akatutuanga. Kua mataora tikai maua i te kiteanga e, i te openga o te atikara Awake!, kua kite mai maua i te au akakiteanga e akapeea i te maani i tetai akatutuanga meangiti ua o te araka o Noa. Mei teaa atura to maua mataora i teia avatea, mari ake ta kotou atikara manea tikai! Ma teia ao varenga angaanga ua ta tatou e noo nei ki roto e te au taomianga ta tatou au tamariki rikiriki e aro atura i te au epetoma ravarai i te apii, e akameitakianga tikai te orongaia mai anga teia tataanga mei te makatini Awake! kia tauturu i te au metua i te utuutu i ta ratou tamariki rikiriki i roto i to Iehova arataa.

M. F., Marike

Ui te au Mapu . . . Akapeea au i te Autu Anga i Teia Peu Matauia? (Noema 2006) Kua akakeu tikaiia toku ngakau i toku tatauanga i te atikara e te kite mai anga e akapeea a Iehova i te akamanakoanga ia tatou e te tauturu anga ia tatou i te akatikatika i to tatou au manamanata. Noatu e e oki akaou ana tatou i te rave i te au angaanga kino, kua papa ua a Iehova i te “akakore mai i te ara.” (Salamo 86:⁠5) I te kite anga i teia, te tauturu maira ia matou, te aronga mapu kia ‘rere ke i te au anoano o te mea ou anga ra.’​—⁠2 Timoteo 2:⁠22.

V.F.F., Paratiri

Ui te au Mapu . . . Eaa i Maata ei te au Ture? (Titema 2006) E ono oku mataiti i teianei i te apiianga i te Pipiria. Noatu e e pakari tikai to matou nga metua ki runga ia matou, kua kite au e te manako maira tikai raua iaku. I toku tatau anga i teia atikara, kua tauturu teia iaku kia marama i te au apiapi o toku nga metua e kua tauturu mai iaku kia kite mai i to Iehova manakoanga uaorai noku.

K. T., Tairani

E Tamaiti Kaimoumou Apinga Au (Titema 2006) Kua kite mai ana au ia Iehova mei te mataiti 1992. Inara e tuatau tetai i roto i toku oraanga e kua inangaro au i te akono i tetai oraanga ke. Mei ia Meros Sunday rai, kua kite mai au i te au meitaki e te au taitaia e manganui, e i muri ake i te toru mataiti i te akarukeanga ia Iehova, kua akamata au i te pati atu kiaia no te tauturu. I teianei tei te “kainga” nei au. Meitaki maata no ta kotou angaanga.

D. K., Ukarania

Ui te au Mapu . . . Aea e Rauka ai Iaku i te Aru Kapiti i Tetai Tane? (Tianuare 2007) E 15 oku mataiti. Iaku e atoro atura i toku aniti e toku angakara, kua aravei au i tetai tamaiti Kite e 17 ona mataiti. Kua akamata maua i te pukapuka i runga i te internet, i te akamataanga e takitai ua ake taime. Inara, kare i roa ana, te pukapuka ra maua i te au ra ravarai, e kua akatupu te akainangaro i rotopu ia maua. I reira kua tatau mai au i teia atikara e kua kite mai e te aere kapiti tikai ra maua.” Ma te tauturu a toku nga metua e te atikara a te makatini Awake!, kua akono au i te ikianga meitaki tikai​—⁠kia akakore atu i te pirianga ki te reira tamaiti. E taeake ua maua i teianei, inara kua tuku au i toku pirianga kia Iehova e ko te apinga muaia. E rekareka tikai toku e kua tauturu teia atikara iaku kia kite meitaki tikai i te au mea.

D. D., Kanata