Takinokino i te Vaine—E Manamanata i te ao Katoa

KO NOEMA 25 te Ra Pa Enua no te Akakoreanga i te Takinokinoanga i te Vaine. Kua arikiia teia ra e te Akaputuputuanga a te Katoatoa no te United Nations i te 1999 ma te akakoroanga kia akamatakite maata atu i te au tangata no runga i te akakinoanga i te au tikaanga o te vaine. Eaa ra teia takainga i anoanoia ai?

I roto i te au peu e manganui, kua manakoia e kua akonoia te vaine ei aronga akaaka roa. E pakari tikai te au akavaavaaanga ia ratou. Te takinokinoanga i te vaine na roto i te au tu ravarai e manamanata ia te tupu ua atura, i roto katoa i te au enua turanga teitei te oraanga. Kia tau ki te Tekeretere Tianara o te UN i mua ana ko Kofi Annan, “kua tae rava te takinokinoanga i te au vaine ki te ao katoa, e te tupu ra te reira i roto i te au taiate e te au peu ravarai. E tupu ana te reira ki te au vaine noatu e eaa te iti tangata, te tu eteniki, te kapuaanga mai, te anauanga me kore tetai ua atu turanga ke.”

Kua karanga a Radhika Coomaraswamy, e Tangata UN Takake i mua ana no te Kimikimi Manamanata o te Kumitiona o te Au Tika Anga Tangata no runga i te takinokinoanga i te au vaine e, no te maataanga o te vaine, “e maroanga muna e te unaia i roto i te taiate e e tikaanga akama tikai no te oraanga.” Te au tareanga tei orongaia mai e tetai akaaereanga no te aronga takinokinoia i Orani, te akakite maira e e 23 patene o te vaine i roto i tetai enua i Marike Apa Tonga, me kore e 1 i roto i te 4, te mamae ra i tetai tu takinokinoanga i roto i te ngutuare. Pera katoa, te karanga ra te Konitara o Europa e e 1 i roto i te 4 vaine Europa e mamae ra i te takinokinoanga i roto i te ngutuare i tona oraanga. Kia tau ki te Tipatimani Paruru o Peritane, i roto ua akenei i tetai mataiti okotai i Engarani e Wales, e rua vaine te avereti i te epetoma tataki tai tei tamateia e to ratou tokorua ou me kore te tokorua i mua ana. Te ripoti maira te makatini India Today International e “no te au vaine i roto katoatoa ia Initia, e mataku ua ana ratou e penei ko te kukumi vaine te tangata ke ta ratou ka aro atu i te au ngai tapaeanga ravarai, i runga i tetai ua atu mataara, i roto i tetai ua atu ngai tangata, i tetai ua atu ora.” Te akataka maira te Amnesty International i te takinokinoanga i te au vaine e te au tamariki tamaine e ko te “akaaoanga totoa rava atu no te au tika anga tangata.”

Te akatutu maira ainei te au tareanga tei taikuia i runga akenei i to te Atua manako ki te au vaine? Ka uriuriia teia uianga i roto i te atikara ka aru mai.