E Mea Maaniia Ainei?

Te Tukutukuraonui Tirika

▪ E mama ake i te taura, inara no runga i tona teimaa e ketaketa ake i te auri. No tetai rau ngauru mataiti kua apii ana te au tangata taineti no runga i te tirika e maaniia ana e te tukutukuraonui taviri pungaverevere porotaka. Ko te tirika dragline​—⁠te mea pakari roa atu i te au tirika e itu ta teia au tukutukuraonui e taviri ana​—⁠e ko teia te inangaro maata roa ia atu ana. E ketaketa atu e te mau kore atu i te au kata o te roeroe tirika, e taangaanga maataia ana i roto i te kakau.

Akamanako ana: Te maanianga o te au taura ketaketa pakari tikai no te angaanga vakatori mei te Kevlar rai, e umuumuia ana kia pakari tikai te vaitoanga o te vera e te taangaanga i te au vairakau akatae. Ei tukeanga, e maani ana te au tukutukuraonui i te tirika i roto i te vera tau ua, e te taangaanga ra i te vai ei vairakau akatae. E tetai atu, e pakari atu te tirika dragline i te Kevlar. Me akamaataia ki te vaitoanga o tetai ngai tue poro anga, ko te pungaverevere o te tirika dragline ka rauka i te tapu i tetai aka pairere maatamaata e rere ra!

Kare i reira i te mea poitirere e, te umere nei te aronga kimikimi i te tu ketaketa o te tirika dragline. “Te inangaro nei te au taineti i te taangaanga i taua apinga ketaketa ra i roto i te au apinga mei te au pereue kare e puta i te katiriti pupui ki te au uaea akatautauia no te au ana,” i tata ei a Aimee Cunningham i roto i te makatini Science News.

Inara e ngata tikai i te kopi i te tirika dragline, no te mea e maaniia ana teia apinga ki roto i te kopapa o te tukutukuraonui e kare ake rai i maramaia ake e i akapeea te maaniia anga. “E tu akaaka tikai i te kite mai e e maata te aronga kite tikai e tauta ra i te rave i ta te tukutukuraonui i raro i te taua o to tatou au are e rave nei i roto i te tu natura,” i karanga ai te vaine apii no te oraanga a Cheryl Y. Hayashi, tei taikuia i roto i te makatini Chemical & Engineering News.

Eaa toou manako? E mea tupu ua mai ainei te tukutukuraonui e tona tirika ketaketa mei te auri rai, me e angaanga teia na Tei Anga mai ma te kite maata?

[Tutu i te kapi 26]

E akaraanga no te tukutukuraonui e akatae ra i te tirika i roto i te io akamaata

[Akameitakianga]

Copyright Dennis Kunkel Microscopy, Inc.