Te Manako o te Pipiria

Aea te Paruru Anga ia Koe Uaorai e Tau Ei?

KUA akaara poitirere ia koe e tetai turituri i te turuaipo. Kua rongo atu koe i te au takainga vaevae. Kua tomoia mai toou are e tetai tangata. Ma to pukuatu e tukituki ra, te akamanako ra koe ma te mataku e eaa taau ka rave a muri mai.

E aro atu ana tetai ua atu tangata i teia tu. Te takinga kino​—⁠e te kino rikarika katoa​—⁠kare e tupu ua ana i tetai au enua me kore ki te au oire mamaata ua mari ra te tupu nei i te au ngai ravarai. No te mataku maata i te kino, e manganui te au tangata tei kimi i te au paruru anga na te okoanga i tetai au apinga ta tangata me kore na te apiianga i te karate. Kua akamana tetai au kavamani i te au ture i te akatikaanga i te au tangata o te enua kia tamate atu no te paruru anga ia ratou uaorai. Inara eaa ta te Pipiria e akakite nei? Kua tau tikai ainei tetai tangata i te maro pakari atu no te paruru anga iaia uaorai me kore i tona pamiri?

E Mea Riri Roa na te Atua te Takinga Kino

Kua patoi pakari te Pipiria i te kino e te aronga rave kino. Te tuatua nei te tata taramo ko Davida i te Atua ko Iehova e: “Tei inangaro i te takinga-kino, kua riri roa tona ngakau iaia.” (Salamo 11:⁠5) Kua akautunga te Atua i tetai au enua i taito, pera katoa tona iti tangata no ta ratou au takinga kino e te akamaringi toto. (Ioela 3:19; Mika 6:12; Nahuma 3:⁠1) E kino pakari katoa te ta tangata akakoro koreia e tei raveia ma te tu manako kore i raro ake i te Ture tei orongaia ki to Iseraela.​—⁠Deuteronomi 22:⁠8.

Te ako maira te Pipiria i te tangata tataki tai kia kopae i te au taumaroanga na te aruaruanga i te au i te au ra ravarai. E tupu ua ana te taanga kino na roto i te au tuatua anga riri tetai  ki tetai. Mei ta te Pipiria i akakite mai e: “Kare e vaie ra, e mate ïa ai: e kare oki e taoi tuatua ra, e kore katoa te karo.” (Maseli 26:20) E akakore ua ana te tu maru i te riri e te kopaeanga i te aro atu anga i te tu takinga kino. Kua tata te apotetoro ko Paulo e: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.”​—⁠Roma 12:⁠18.

Me Tamatakuia Koe

Kare te aruaruanga i te au e akapapu maira e kare rava koe e taia mai. E manganui te aronga akamori tiratiratu o te Atua i roto i te au tuatua enua tei tamateia. (Genese 4:8; Iobu 1:​14, 15, 17) Me tamatakuia etai e tetai tangata keikeia e apinga ta tangata tana, ka akapeea aia? Kua ikuiku mai a Iesu e: “Auraka e akaoki atu i te kino.” (Mataio 5:39) Kua tuatua katoa aia e: “Tei rave i to kakau pu na, auraka katoa e tāpu i to pereue.” (Luka 6:29) Kare a Iesu i ariki ana i te taangaanga i te apinga ta tangata no te paruru anga i te au apinga materia. Me ka tano atu ki tetai tangata keia e apinga ta tangata tana, kare tetai tangata tu pakari e tapu i tana au apinga puapinga. E mea papu, e e puapinga rava atu te oraanga i te au apinga materia!

I tetai tua ra, akapeea me ka takinoia to tetai oraanga e te tangata kino? Te oronga mai nei tetai ture a te Atua ki to Iseraela taito i te akatakaanga no runga i teia. Me opuia tetai keia i te avatea e kua tamateia, ka akaapaia tei ta iaia ei tangata ta tangata. E akapapuanga teia e kare te angaanga keikeia i te tu tau kia tamateia e ka kitea ua ia te tangata keia e ka akautungaia kia tau ki te ture. Inara, me kua tamateia te tangata tei tomo mai i te po, kare te tangata ngutuare e akaapaia e te ture no te mea e ngata iaia i te kite atu e eaa ta te tangata i tomo mai e rave ra e kare e papuanga e eaa tona akakoroanga. Ka akamanako tau te tangata ngutuare e tei roto tona pamiri i te turanga kino e kia rave aia i te paruru ia ratou.​—⁠Exodo 22:​2, 3.

Kua akakite mai rai te Pipiria e kia paruru tetai tangata iaia uaorai me kore i tona pamiri me ka taia mai ratou. Penei ka arairai atu aia i te au papaanga, i te tapuanga i te tangata takinga kino, me kore kia moto atu iaia kia akamutu aia me kore kia akaparuparu atu iaia. Ko te akakoroanga kia akaiti mai i te tu kino me kore kia akamutu i tana taanga. Me ko te tuia, e ka kino rava te tangata takino me kore kua mate i roto i te reira turanga, e mea tupu ua i reira tona mate e kare i te mea akakoroia.

Te Paruru Anga Meitaki Rava Atu

Te taka papu nei, e e au turanga tetai e kia tau rai kia maroia te paruru anga ia koe uaorai. E tikaanga to tetai tangata i te paruru ia ratou uaorai e to ratou au akaperepere mei te kino e te takino anga. Me kare e rauka i te oro kia ora, kare a te Pipiria ture araianga i te paruru anga tau ia tatou uaorai. Noatu rai, ko te ravenga tu pakari koia oki kia tauta pakari i te kopae i te au turanga te ka akatupu i te takinga kino.​—⁠Maseli 16:⁠32.

Te akamaroiroi mai nei te Pipiria ia tatou e kia “kimi i te au, e aruaru atu” i roto i te au tuanga ravarai o to tatou oraanga. (1 Petero 3:11) E tu kaveinga tau teia i te turuturuanga i te oraanga au.

KUA MANAKO ANA KOE?

▪ Eaa ra tatou ka kopae ei i te takinga kino?​—⁠Salamo 11:⁠5.

▪ Eaa ra te ravenga pakari no te paruru atu anga i te au apinga materia? ​—⁠Maseli 16:32; Luka 12:⁠15.

▪ Eaa ra te tu manako no runga i te taumaroanga te ka kopae atu i te kino?​—⁠Roma 12:18.

[Tataanga i te kapi 12]

Kua akakite mai te Pipiria e kia tau tetai tangata i te paruru iaia uaorai me kore i tona pamiri me ka taia mai ratou